.

இருபதாவது ஆண்டாகத் தைத்திருநாளுக்கு விழா எடுக்கிறது விக்ரோறியத் தமிழ்க் கலாச்சாரக் கழகம்

சாந்தினி புவனேந்திரராஜா

தை முதல் நாள் – தைத்திருநாள் –  தமிழ்ப் புத்தாண்டு நாள் – தமிழருக்குத் தனிப்பெருந் திருநாள். இயற்கையை வழிபட்டு, இயற்கையோடு இணைந்து வாழ்ந்த பண்டைத் தமிழரின் பண்பாட்டுப் பெருமை மிக்கது தைத்திருநாள். – தைமாதப்பிறப்பைத் தமிழரின் ஆண்டுப் பிறப்பாகத் தரை குளிர்ந்த கறவைத் திங்கள் முதல் நாளில் கொண்டாடி வந்திருக்கிறார்கள் நமது முன்னோர்.  

புத்தாடை அணிந்து, புதுப்பானையில் புத்தரிசிப் பொங்கல் பொங்கிப் புத்தாண்டை வரவேற்றிருக்கிறான் பண்டைத்தமிழன். 

காலஓட்டத்தில், ஆரிய ஆதிக்கத்தில்  தைமுதல் நாள் தமிழர் புத்தாண்டு என்பது மறைந்து, தைப்பொங்கல் என்று மட்டும் ஆகிவிட்டது. சித்திரை மாதப்பிறப்புத் தான் தமிழரின் ஆண்டுப்பிறப்பாகவும் மாறிவிட்ட்து.

அந்த வகையில் தைத்திருநாளைப் பொங்கல் விழாவாகவே கொண்டாடி வந்த விரோறியத் தமிழ்க் கலாச்சாரக் கழகத்தினால் 2007ஆம் ஆண்டுப் பொங்கல் விழாவில் “தைமுதல் நாளே தமிழ்ப் புத்தாண்டு - தைத்திருநாளே தமிழர் திருநாள்” என்ற உறுதிமொழி பிரகடனம் செய்யப்பட்டு, அன்றிலிருந்து இத்திருநாள் தமிழ்ப் புத்தாண்டு விழாவாகக் கொண்டாடப் பட்டு வருவது தமிழர்களாகிய எம்மையெல்லாம் பெருமைப்பட வைக்கிறது அல்லவா?

கடந்த 19 ஆண்டுகளாக, ஆண்டு தோறும் தைத்திருநாளைக் கொண்டாடி வருகின்ற விக்ரோறியத் தமிழ்க் கலாச்சாரக் கழகம், இந்த ஆண்டு, எதிர்வரும் தைமுதல் நாள் – 15-01-2011 அன்று 20ஆவது ஆண்டாக இவ்விழாவினை மிகச் சிறப்பாகக் கொண்டாடுவதற்கான ஆயத்தங்களை மேற்கொண்டிருக்கிறது.

சித்திரை மாதப்பிறப்புத் தான் தமிழருக்கு ஆண்டுப் பிறப்பென்று இன்றும், இன்னமும் விடாப்பிடியாக நிற்கின்ற எம்மவரில் சிலரையும் சிந்திக்க வைக்கும் விதத்தில் தமிழ்ப் புத்தாண்டு விழா விக்ரோறியத் தமிழ்க் கலாச்சாரக் கழகத்தினால் கொண்டாடப்படுவது பாராட்டுக்குரியது.

நாம் புலம்பெயர்ந்து வாழுகின்ற நாடொன்றில், பல்லினக் கலாச்சாரத்தில் எமது மொழி, கலை, கலாச்சாரம், பண்பாடுகள் தொலைந்து போய் விடாமலும், எமது அடையாளம் அழிந்து போய் விடாமலும் பாதுகாக்கப் படுவதற்கு வழிகோலும் வகையில் ஆண்டு தோறும் தமிழுக்குத், தமிழ் ஆண்டுப் பிறப்பில் எடுக்கப்படுகின்ற இந்த விழா  “சங்கே முழங்கு! எங்கள் வாழ்வும் எங்கள் வளமும் மங்காத தமிழ் என்று சங்கே முழங்கு” என்றாரம்பிக்கும், பாவேந்தர் பாரதிதாசனின் உணர்ச்சி மிக்க பாடலுடன், வரவேற்பு நடனத்துடன் ஆரம்பிக்கப்பட்டு, இயல் இசை நாடகம் - இவை மூன்றும் ஒருங்கிணைந்த முத்தமிழ்த் திருநாளாக மட்டுமல்லாமல்., விக்ரோறிய மாநிலத்தில் பன்னிரண்டாம் வகுப்புப் பல்கலைக்கழகப் புகுமுகப் பரீட்சையில் அதி உயர் புள்ளிகளைப் பெற்ற, மற்றும் இப்பரீட்சையில்  தமிழ் மொழியில் அதிக புள்ளிகளைப் பெற்ற மாணவர்களுக்குச் சான்றிதழ்களை வழங்கி அவர்கள் கௌரவிக்கப்பட்டு  ஊக்கிவிக்கப்படுவது எமது இளைய சமுதாயத்தினர் கல்வியிலும், தாய்மொழியைக் கற்பதிலும் மேலும் ஆர்வத்தை ஏற்படுத்துகின்றது என்றால் அது மிகையாகாது.

அத்துடன் தமிழுக்கும், தமிழ் இனத்துக்கும் சேவை ஆற்றிய, சேவை ஆற்றிக் கொண்டிருக்கும் பலரும் ஆண்டு தோறும், தைத்திருநாளில் பாராட்டப்பட்டுக் கௌரவிக்கப்படுவதும் இவ்விழாவின் சிறப்பம்சமாகும்.

இருபது ஆண்டுகளாகத் தொடர்ந்து இடம்பெற்று வருகின்ற தைத்திருநாள், இங்குள்ள தமிழரை ஒன்றிணைத்து முத்தமிழ் அமுதூட்டும் இத்திருநாள்  இனிவரும் ஆண்டுகளிலும் இனிதாகத் தொடரட்டும்.

வாழ்க தமிழ்

வளர்க விக்ரோறியத் தமிழ்க் கலாச்சாரக் கழகம்