யேமனில் புதிதாக இடம்பெற்ற மோதல்களில் 17 பொதுமக்கள் உட்பட 58 பேர் உயிரிழப்பு
யேமனில் இடம்பெற்று வரும் மோதல்களில் சிக்கி 540 பேர் உயிரிழப்பு; 1,700 பேர் காயம்
தொடரும் இனப்படுகொலை: வெள்ளையரின் துப்பாக்கி சூட்டுக்கு இலக்கான கறுப்பினத்தவர்: வீடியோ காட்சி வெளியானது
ஐ.எஸ். தீவிரவாதிகளால் ஆங்கில மொழி வானொலி ஒலிபரப்புச் சேவை ஆரம்பிப்பு
யேமனில் புதிதாக இடம்பெற்ற மோதல்களில் 17 பொதுமக்கள் உட்பட 58 பேர் உயிரிழப்பு
07/04/2015 தென் யேமனில் ஜனாதிபதி மன்சூர் ஹாடிக்கு விசுவாசமான படையினருக்கும் கிளர்ச்சியாளர்களுக்குமிடையில் கடந்த புதிதாக இடம்பெற்ற மோதல்களில் 58 பேர் பலியாகியுள்ளனர்.
பலியானவர்களில் 17 பொதுமக்களும் 26 கிளர்ச்சியாளர்களும் 15 படையினரும் உள்ளடங்குவதாக அந்நாட்டு அதிகாரிகள் திங்கட்கிழமை தெரிவித்துள்ளனர்.
டாலெஹ் நகரில் ஞாயிற்றுக்கிழமை இரவு முதல் திங்கட்கிழமை காலை வரை நடைபெற்ற மோதல்களிலேயே இந்த உயிரிழப்புகள் இடம்பெற்றுள்ளன.
கடந்த மார்ச் மாதம் 26 ஆம் திகதி ஈரானிய ஆதரவுடன் செயற்படும் யேமனிய ஹோதி கிளர்ச்சியாளர்களுக்கு எதிராக சவூதி அரேபியா தலைமையிலான கூட்டமைப்பு நாடுகளின் படையினர் வான் தாக்குதல்களை ஆரம்பித்தது முதற் கொண்டு யேமனில் வன்முறைகள் உக்கிரமடைந்துள்ளன.
தென் துறைமுக நகரான ஏடனில் மோதல்கள் தீவிரமடைந்து வருவதாக அங்கிருந்து வரும் செய்திகள் தெரிவிக்கின்றன.
யேமனில் இரு வாரங்களாக இடம்பெற்று வரும் மோதல்களில் 500 பேருக்கும் அதிகமானோர் உயிரிழந்துள்ளதாக ஐக்கிய நாடுகள் சபை கூறுகிறது.
இந்நிலையில் தாக்குதல்களில் காயமடைந்தவர்களுக்கு சிகிச்சைகளை அளிக்கும் பொருட்டு யேமனிய தலைநகரான சனாவில் மருத்துவ உத்தியோகத்தர்கள் மற்றும் மருந்துகளுடன் இரு விமானங்களைத் தரையிறக்குவதற்கு சர்வதேச செஞ்சிலுவைச் சங்கம் அனுமதி பெற்றுள்ளது.
யேமனிலான மோதல்களால் அந்நாடு மனிதாபிமான நெருக்கடியொன்றை எதிர்கொண்டுள்ளதை கவனத்திற் கொண்டே இந்த விமானங்களை தரையிறக்குவதற்கான அனுமதி பெறப்பட்டுள்ளதாக சர்வதேச செஞ்சிலுவைச் சங்கம் தெரிவித்தது.
இதன் பிரகாரம் முக்கியமான மருத்துவ விநியோகங்களுடன் சரக்கு விமானம் ஒன்றும் மருத்துவ உத்தியோகத்தர்களை ஏற்றிக் கொண்டு சிறிய ரக பயணிகள் விமானம் ஒன்றும் யேமனில் தரையிறக்கப்படவுள்ளதாக சர்வதேச செஞ்சிலுவைச் சங்கத்தின் பேச்சாளர்களில் ஒருவரான மேரி கிளயர் பெக்காலி கூறினார்.
யேமனில் ஏடன் நகரிலுள்ள மக்கள் உண்ண உணவும் அருந்த நீருமின்றி வாழும் நிலைக்குத் தள்ளப்பட்டுள்ளதாக அவர் தெரிவித்தார்.
மேலும் யேமனில் மோதல்களால் பாதிக்கப்பட்டவர்களுக்கு உதவும் முகமாக 24 மணி நேர ஊரடங்குச் சட்டத்தை அமுல்படுத்த சர்வதேச செஞ்சிலுவைச் சங்கம் அழைப்பு விடுத்துள்ளது.
இந்நிலையில் யேமனிய கிளர்ச்சியாளர்களுக்கு எதிராக வான் தாக்குதல்களை நடத்தும் சவூதி தலைமையிலான கூட்டமைப்பு நாடுகளின் படையினருடன் இணைந்து கொள்வதா அல்லது இல்லையா என்பதை தீர்மானிக்கும் முகமாக பாகிஸ்தானிய பாராளுமன்றம் திங்கட்கிழமை விசேட கூட்டமொன்றைக் கூட்டி விவாதித்துள்ளது.
பாகிஸ்தானிய விமானமொன்று ஞாயிற்றுக்கிழமை யேமனிய சனா நகரிலிருந்து 170 பேரை மீட்ட நிலையிலேயே இந்தக் கூட்டத்தைக் கூட்ட ஏற்பாடு செய்யப்பட் டுள்ளது.
அதேசமயம் சீனாஇ எகிப்துஇ சூடான் ஆகிய நாடுகளும் யேமனிலுள்ள தமது பிரஜைகளை மீட்க விமானங்களை அனுப் பவுள்ளன.
ஏற்கனவே யேமனிலிருந்து தமது பிரஜைகளை மீட்ட நாடுகளில் ரஷ்யாஇ இந்தியாஇ இந்தோனேசியா ஆகியன உள்ள டங்குகின்றன. ;நன்றி வீரகேசரி
யேமனில் இடம்பெற்று வரும் மோதல்களில் சிக்கி 540 பேர் உயிரிழப்பு; 1,700 பேர் காயம்
08/04/2015 சவூதி அரேபியா தலைமையிலான கூட்டமைப்பின் வான் தாக்குதல்களுக்கு எதிர்ப்பு தெரிவித்து யேமனிய சனா நகரில் கிளர்ச்சிக் குழுவை சேர்ந்த உறுப்பினர்கள் ஆர்ப்பாட்டத்தில் ஈடுபடுவதை படத்தில் காணலாம்.
யேமனில் கடந்த சில வாரங்களாக இடம்பெற்றுவரும் மோதல்களில் சிக்கி 540 பேருக்கும் அதிகமானோர் உயிரிழந்துள்ளதுடன் 1,700 பேர் வரை காயமடைந்துள்ளதாக உலக சுகாதார ஸ்தாபனம் செவ்வாய்க்கிழமை தெரிவித்துள்ளது.
அதேசமயம் அந்நாட்டில் கடந்த மார்ச் 19 ஆம் திகதி முதல் இடம்பெற்று வரும் வன்முறைகளில் பலியானவர்களில் குறைந்தது 74 சிறுவர்கள் உள்ளடங்குவதாக ஐக்கிய நாடுகள் நம்பிக்கை நிதியம் கூறுகிறது.
காயமடைந்தவர்களில் 44 பேர் சிறுவர்களாவர். மேலும் 100,000 பேருக்கும் அதிகமானோர் இடம்பெயர்ந்துள்ளதாக மதிப்பிடப்பட்டுள்ளது.
யேமனிலான இந்த மோதல்களில் சிறுவர்கள் சகிக்க முடியாத விலையொன்றை செலுத்த நேர்ந்துள்ளதாக ஐக்கிய நாடுகள் சிறுவர் நம்பிக்கை நிதியத்தின் யேமனுக்கான பிரதிநிதி ஜூலியன் ஹார்னிஸ் தெரிவித்தார்.
இந்நிலையில் யேமனில் சவூதி அரேபியா தலைமையிலான படையினரின் வான் தாக்குதல்களின் துணையுடன் அந்நாட்டு ஜனாதிபதி மன்சூர் ஹாடிக்கு ஆதரவான படையினர் செவ்வாய்க்கிழமை நடத்திய தாக்குதலில் குறைந்தது 19 பேர் உயிரிழந்துள்ளனர்.
துறைமுக பிராந்தியமான முவல்லாவிற்குள் பிரவேசிக்க முயன்று வரும் கிளர்ச்சியாளர்களுக்கு எதிராக நாட்டை விட்டு வெளியேறியுள்ள ஜனாதிபதி மன்சூர் ஹாடிக்கு விசுவாசமான படையினர் போராடி வருகின்றனர்.
இந்நிலையில் பிந்திய மோதல்களில் 4 படைவீரர்கள் உயிரிழந்துள்ளதுடன் 12 பேர் காயமடைந்துள்ளனர்.அதேசமயம் ஹோதி கிளர்ச்சியாளர்கள் மத்தியில் ஆறு பேர் பலியாகியுள்ளனர்.
ஏடன் நகரிலுள்ள கிளர்ச்சியாளர்களின் தளங்களை இலக்குவைத்து சவூதி தலைமையிலான கூட்டமைப்பின் படையினர் உக்கிர வான் தாக்குதலை நடத்தி வருகின்ற நிலையில் ஜனாதிபதி ஹாடிக்கு விசுவாசமான படையினர் துறைமுகப் பிராந்தியத்திலிருந்து கிளர்ச்சியாளர்களை பின்வாங்கச் செய்துள்ளதாக அங்கிருந்து வரும் செய்திகள் தெரிவிக்கின்றன.
அந்நாட்டில் முதல்நாள் திங்கட்கிழமை இடம்பெற்ற மோதல்களில் 140 பேருக்கும் அதிகமானோர் பலியானதுடன் பெருந்தொகையானோர் காயமடைந்துள்ளனர்.
இந்த வன்முறை மோதல்களால் யேமனிய பிராந்தியத்திற்குத் தேவையான மருத்துவ உதவிகளை விநியோகிப்பதற்கு செஞ்சிலுவைச் சங்கம் மேற்கொண்ட முயற்சிகள் தாமதத்தை எதிர்கொண்டுள்ளதாக தெரிவிக்கப்படுகிறது.
யேமனின் சட்டபூர்வமான தலைவராக ஐக்கிய நாடுகள் சபையால் கருதப்படும் ஹாடி, கிளர்ச்சியாளர்களின் தாக்குதல்கள் அதிகரித்ததையடுத்து கடந்த மாதம் நாட்டை விட்டு வெளியேறி சவூதி அரேபியாவை தஞ்சமடைந்துள்ளார்.
செஞ்சிலுவைச் சங்கம் சனா நகரிலிருந்து தனது 11 உத்தியோகத்தர்களை வெளியேற்றியுள்ளது.யேமனில் மனிதாபிமான நடவடிக்கை யின் பொருட்டு சவூதி அரேபியா தலைமை யில் எகிப்து, ஜோர்தான், மொரோக்கோ மற்றும் சூடான் ஆகிய நாடுகளால் மேற்கொள்ளப்படும் வான் தாக்குதல்களை இடைநிறுத்த ஐக்கிய நாடுகள் சபையை ரஷ்யா வலியுறுத்தியுள்ளது.
அதேசமயம் இந்திய கப்பலொன்றின் மூலம் மேற்கு ஹொடேய்டா துறைமுகத்திலிருந்து 450 பேர் வெளியேற்றப்பட்டுள்ளனர்.ஏனைய சுமார் 100 பேர் சீனக் கப்பலொன் றின் மூலம் வெளியேற்றப்பட்டுள்ள னர்.பிரான்ஸானது யேமனிய கிழக்கு பால் ஹாப் துறைமுகத்திலிருந்து 63 வெளிநாட் டவர்களை வெளியேற்றியுள்ளது.
மேலும் ஜோர்தான் 300 க்கு மேற்பட்ட தனது பிரஜைகளை யேமனிலிருந்து வெளி யேற்றியுள்ளது.
அதேசமயம் தமது பிரஜைகளை வெளி யேற்றும் முகமாக 3 இந்திய விமானங்களும் ரஷ்ய விமானம் ஒன்றும் திங்கட்கிழமை சனா நகரில் தரையிறங்கியுள்ளமை குறிப் பிடத்தக்கது. நன்றி வீரகேசரி
தொடரும் இனப்படுகொலை: வெள்ளையரின் துப்பாக்கி சூட்டுக்கு இலக்கான கறுப்பினத்தவர்: வீடியோ காட்சி வெளியானது
08/04/2015 அமெரிக்காவில் கறுப்பினத்தவர் சுட்டுக்கொலை செய்யப்படுவது வருவது தொடர் கதையாகி வரும் நிலையில், தற்போது மேலும் ஒருவர் பொலிஸ் அதிகாரி ஒருவரால் சுட்டுக்கொலை செய்யப்பட்டுள்ளமை தொடர்பில் வீடியோ காட்டிசியொன்று வெளியாகி பெரும் பரபரப்பை ஏற்படுத்தியுள்ளது.
தெற்கு கரோலினாவில் உள்ள வடக்கு சார்லஸ்டன் பகுதியில் நான்கு பிள்ளைகளின் தந்தையான 50 வயதுடைய வோல்டர் ஸ்கோட்டை, ரோந்து நடவடிக்கையில் ஈடுபட்டிருந்த பொலிஸ் அதிகாரியான 33 வயதுடைய மைக்கல் ஸ்லேகர் தடுத்து நிறுத்தினார்.
இதன்போது குறித்த நபர் தப்பியோட முற்பட்ட போது அவர் சுட்டு கொலை செய்துள்ளார்.இதில் சம்பவ இடத்திலேயே வோல்டர் ஸ்கோட் பலியானார்.
முன்னாள் கடற்படை காவலரான வோல்டர் தன்னை தாக்க முனைந்ததால் தற்காப்புக்காக அவரை சுட்டுக்கொன்றதாக மைக்கல் உயரதிகாரிகளிடம் தெரிவித்துள்ளார்.
ஆனால், சம்பவ இடத்தில் நடைபெற்ற நிகழ்வுகளை பார்த்தபோது, தப்பி ஓடிய வோல்டரை, முதுகில் 5 முறை மைக்கல் சுடுவது தெளிவாக தெரியவந்துள்ளது.
இருவருக்குமிடையே எந்த வித உரையாடலும் இடம்பெறவில்லை என்பதும் வீடியோ காட்சியிலிருந்து தெரியவந்தது.
வோல்டர் தப்பியோடும் போது, 8 முறை மைக்கல் துப்பாக்கியால் சுடுவதும், அதில் 3 குண்டுகள் குறி தவறி போவதும், எஞ்சிய 5 குண்டுகள் வோல்டரின் உடலை துளைப்பதும் வீடியோ காட்சிகளிலிருந்து தெரிய வந்துள்ளது.
இந்த சம்பவத்தை வீடியோ பதிவுகள் மூலம் தெரிந்து கொண்ட அதிகாரிகள், பொலிஸ் அதிகாரியை கைது செய்து அவர் மீது கொலை வழக்கு பதிவு செய்து சிறையிலடைத்துள்ளனர். நன்றி வீரகேசரி
ஐ.எஸ். தீவிரவாதிகளால் ஆங்கில மொழி வானொலி ஒலிபரப்புச் சேவை ஆரம்பிப்பு
09/04/2015 ஐ.எஸ். தீவிரவாதிகள், தமது பிந்திய தற்கொலைக் குண்டுத் தாக்குதல்கள் மற்றும் மரணதண்டனை நிறைவேற்றங்கள் என்பன தொடர்பான தகவல்களை வெளியிடும் முகமாக ஆங்கில வானொலிச் செய்திச் சேவையை ஆரம்பித்துள்ளனர்.
மேற்படி ஆங்கில செய்தி அந்த தீவிரவாத குழுவின் அல் -பாயன் வானொலி வலைப் பின்னலில் செவ்வாய்க்கிழமை ஒலிபரப்பப்பட்டது.
அந்த வானொலி வலைப்பின்னலில் ஏற்கனவே அரேபிய மற்றும் ரஷ்ய மொழி வானொலி ஒலிபரப்புகள் இடம்பெற்று வருகின்றன.
இந்நிலையில் புதிதாக ஆரம்பிக்கப்பட்டுள்ள ஒன்பதரை மணி நேர ஆங்கில வானொலி ஒலிபரப்பானது அமெரிக்க ஆங்கிலம் பேசும் ஒருவரால் நடத்தப்பட்டது.
அந்த ஒலிபரப்பின் முடிவில் அரேபிய மொழியிலான பாரம்பரிய இசை இசைக்கப்பட்டது. அந்த வானொலி ஒலிபரப்பில் யர்மொக் பிராந்திய மோதல்கள் குறித்து அதிக கவனம் செலுத்தப்பட்டது.
அத்துடன் சிரியா, ஈராக் மற்றும் லிபியாவிலான தீவிரவாதிகளின் செயற்பாடுகள் தொடர்பில் விபரிக்கப்பட்டது.மேலும் சிரிய தலைநகர் டமஸ்கஸிலுள்ள யர்மொக் அகதிகள் முகாமில் ஐ.எஸ். கட்டளைத் தளபதிகளில் ஒருவர் கொல்லப்பட்டமை, சிரியாவின் சிர்ட் பிராந்தியத்திலான மோட்டார் தாக்குதல்கள் மற்றும் ஈராக்கிய கிர்குக் நகரிலான தற்கொலைக் குண்டுத் தாக்குதல் என்பன உள்ளடங்கலான பல தரப்பட்ட விடயங்கள் தொடர்பில் இந்த ஒலிபரப்பில் கலந்துரையாடப்பட்டமை குறிப்பிடத்தக்கது.
ஏற்கனவே ஐ.எஸ். போராளிகள் டபிக் என்ற மாதாந்த ஆங்கில சஞ்சிகையை வெளியிட்டுள்ள நிலையிலேயே இந்த ஒலி பரப்பு ஆரம்பிக்கப்பட்டுள்ளது. நன்றி வீரகேசரி
No comments:
Post a Comment