'ஏன்ட தெய்மே.. எங்கையா போன...' கிளிநொச்சியில் சோகம் : 9 வருடங்களின் பின் உணர்வுபூர்வமாக அனுஸ்டிக்கப்பட்டது மாவீரர் நாள்
'வாழும் உரிமையை பறிக்காதே' : கண்டியில் ஆர்ப்பாட்டம்
கூட்டு உடன்படிக்கை விதியை மீறிய தோட்ட நிர்வாகத்திற்கு எதிராக மக்கள் கோஷம்
கருணாவுக்கு விளக்கமறியல்
கருணா குழுவினருடன் இணைந்து கிழக்கில் பல கொலைகளை செய்தேன்.!
பாராளுமன்றத்தை நோக்கி படையெடுக்கும் 3000 இற்கும் அதிகமான மாணவர்கள்?
பிள்ளையான் உட்பட நால்வரின் விளக்கமறியல் நீடிப்பு.!
முல்லைத்தீவு ஒதியமலை படுகொலை : 32ஆம் ஆண்டு நினைவுதினம் அனுஷ்டிப்பு!
'ஏன்ட தெய்மே.. எங்கையா போன...' கிளிநொச்சியில் சோகம் : 9 வருடங்களின் பின் உணர்வுபூர்வமாக அனுஸ்டிக்கப்பட்டது மாவீரர் நாள்
28/11/2016 கிளிநொச்சி கனகபுரம் மாவீரர் துயிலுமில்லத்தில் நேற்று இரவு மாவீரர் நாள் நிகழ்வுகள் பெருமளவு மாவீரர்களின் உறவுகள் மற்றும் பொது மக்கள் ஒன்று கூடி கண்ணீர் மல்க உணர்வுபூர்வமாக அனுஸ்டித்தனர்.
கடந்த 2007 ஆம் ஆண்டு இறுதியாக கிளிநொச்சி மாவீரர் துயிலுமில்லத்தில் மாவீரர் நாள் சிறப்பாக நடத்தப்பட்டது.
அதன் பின்னர் யுத்தம் முடிவுக்கு கொண்டுவரப்பட்டு படையினரின் கட்டுப்பாட்டிற்குள் இப்பிரதேசங்கள் காணப்பட்ட போது தமிழ் மக்களின் பிரதேசங்களில் உள்ள அனைத்து மாவீரர் துயிலுமில்லங்களிலும் காணப்பட்ட கல்லறைகள் மற்றும் நினைவுக்கற்கள் படையினரால் இடித்து ஒதுக்கப்பட்டு துயிலுமில்லங்கள் இருந்த இடம்தெரியாது மாற்றப்பட்டிருந்தன.
அதன் பின்னர் துயிலுமில்லங்களில் படையினர் முகாம்கள் அமைத்து சில வருடங்கள் சில வருடங்கள் தங்களது கட்டுப்பாட்டில் வைத்திருந்தனர்.
தற்போது படையினர் அங்கிருந்து வெளியேறிய நிலையில் கடந்த வெள்ளிக்கிழமை கிளிநொச்சி கனகபுரம் மாவீரர் துயிலுமில்லத்திற்கு சென்ற மாவீரர்களின் உறவினர்கள், மற்றும் பொது மக்கள் ஆகியோர் பற்றைகளால் சூழப்பட்டு காணப்பட்ட மாவீரர் துயிலுமில்லங்களை துப்பரவு செய்தனர்.
நேற்று கார்த்திகை 27 இல் தமிழ் மக்களின் விடுதலைக்காக போராடி உயிர் நீத்த உறவுகளுக்கு சுடரேற்றி அகவணக்கம் செலுத்தி உணர்வுபூர்வமாக மாவீரர் நாள் நிகழ்வை அனுஸ்டித்தனர்.
மாலை 6.5 மணிக்கு மணியோசை எழுப்பட்டு பொதுச் சுடரேற்றப்பட்டது. கனகபுரம் மாவீரர் துயிலுமில்லத்தில் பொதுச் சுடரை பாராளுமன்ற உறுப்பினர் சிறிதரன் ஏற்றி வைக்க தொடர்ந்து மாவீரர்களின் பெற்றோர்கள் மற்றும் உறவினர்கள் சுடரேற்றி அஞ்சலி செலுத்தினார்கள்.
அதனைத் தொடர்ந்து சாவினைத் தழுவிய சந்தனப் பேழைகள் எனும் மாவீரர் வணக்கப் பாடல் ஒலிபரப்பப்பட அப் பாடலில் வருகின்ற வரிகளான எங்கே எங்கே உங்களின் இருவிழி திறவுங்கள் எனும் வரிகள் ஒலிக்கும் போது கலந்து கொண்ட அனைவரதும் கண்களில் கண்ணீருடன் உணர்வு பூர்வமாக காட்சியளித்ததனைக் காணக் கூடியதாக இருந்தது
கல்லறைகள், நினைவுக் கற்கள் இல்லாத போதும் எங்கள் பிள்ளைகள் புதைக்கப்பட்ட இந்த இடத்தில் நின்று அவர்களை நினைவு கூற கிடைத்த சந்தர்ப்பத்தை என்னால் எவ்வாறு கூறுவது என்று தெரியவில்லை. எனது பிள்ளையை அவனது புதைக்குழியில் நின்று நினைவு கூறுவதற்கு இனி சந்தர்ப்பமே இல்லாது போய்விடுமோ என்று ஏங்கிய எனக்கு இப்பொழுது ஆத்ம திருப்தி ஏற்பட்டுள்ளது. ஏழு ஏட்டு வருடங்களுக்கு பின் இந்த இடத்தில் நின்று சுடரேற்றி அஞ்சலி செலுத்வேன் என்று நான் ஒருபோதும் நினைக்கவில்லை. ஆனால் இன்று அது நடந்திருக்கிறது. எனவே எனக்கு இப்போதுள்ள ஒரு ஆசை இந்த மாவீரர் துயிலுமில்லம் கடந்த காலத்தில் இருந்தது போன்று மீண்டும் மாறவேண்டும். அதுவும் ஒருநாள் நடக்கும் என்ற நம்பிக்கை உண்டு என்றார் ஒரு மாவீரரின் தாய்.
இவ்வாறு பலர் தங்களினது உணர்வுகளை கண்ணீராகவும் வார்த்தைகளாலும் வெளிப்படுத்தியவாறு மாவீரர் நாள் நிகழ்வுகளில் கலந்துகொண்டனர்.
யுத்தம் முடிவுக்கு வந்த பின் முதல்முதலாக துயிலுமில்லங்களில் அனுஸ்டிக்கப்பட்ட மாவீரர் நாள் நிகழ்வுகளில் ஆயிரக்கணக்கான பொது மக்கள் மற்றும் அரசியல் தரப்புகள் ஆகியோர் கலந்துகொண்டனர்.
இவ்வாறு முழங்காவில் மற்றும் வடமராட்சிக் கிழக்கு உடுத்துறை மாவீரர் துயிலும் இல்லங்களிலும் மாவீரர் தின நிகழ்வுகள் அனுஷ்டிக்கப்பட்டன. 
'வாழும் உரிமையை பறிக்காதே' : கண்டியில் ஆர்ப்பாட்டம்
28/11/2016 பெருந்தோட்ட காணிகளை தனியார் நிறுவனங்களுக்கு விற்பனை செய்வதை எதிர்த்து, கண்டி மாவட்ட செயலகத்துக்கு முன்பாக இன்று பகல் ஆர்ப்பாட்டம் ஒன்று முன்னெடுக்கப்பட்டுள்ளது.
தெல்தோட்டை லிட்டில்வெளி பிரதேச மக்களால் முன்னெடுக்கப்பட்ட இந்த ஆர்ப்பாட்டத்தின் போது, ‘எமது காணியை அபகரிக்காதே’ ‘எமது வாழும் உரிமையை பறிக்காதே’ ‘தனியாருக்கு தோட்டக் காணிகளை விற்பனை செய்வதை உடன் நிறுத்து’ என கோஷங்கள் எழுப்பப்பட்டன.
மாவட்ட அபிவிருத்தி சபைக் கூட்டம் முடிவடைந்து ஆர்ப்பாட்ட இடத்திற்கு வந்த, சமூக வலுவூட்ல் அமைச்சர் எஸ்.பி.திசாநாயக்கவிடம் ஆர்ப்பாட்டக்காரர்கள் தமது கோரிக்கையை முன்வைத்தனர்.
இதன் போது இவ்விடயமாக நடவடிக்கை எடுக்கப்படும் என அமைச்சர் தெரிவித்தார். எக் காரணம் கொண்டும் அரச காணிகளை தனியாருக்கு வழங்கப்படமாட்டாது. அது உடன் நிறுத்தப்படும் என உறுதி வழங்கினார்.
இதனையடுத்து ஆர்ப்பாட்டக்காரர்கள் குறித்த இடத்தை விட்டு விலகிச் சென்றனர்.
நன்றி வீரகேசரி
கூட்டு உடன்படிக்கை விதியை மீறிய தோட்ட நிர்வாகத்திற்கு எதிராக மக்கள் கோஷம்
28/11/2016 கூட்டு உடன்படிக்கையில் கைச்சாத்திடப்பட்டுள்ள விதி முறைகளை மீறி செயல்பட்டதாக களனிவெளி பெருந்தோட்ட கம்பனியின் கீழ் இயங்கும் அட்டன் போடைஸ் தோட்ட தொழிலாளர்கள் அத்தோட்டத்தில் தேயிலை தூள் பொதிகளை கொழும்புக்கு விற்பனைக்காக கொண்டு செல்லப்படுவதை தடுத்து நிறுத்தியுள்ளனர்.
இன்று காலை 9 மணியளவில் இடம்பெற்ற இச்சம்பவத்தில் போடைஸ் தோட்ட தொழிலாளர்கள் அத்தோட்ட நிர்வாகத்தின் செயல்பாட்டுக்கு எதிர்ப்புகாட்டியுள்ளனர்.
இது தொடர்பாக மேலும் தெரியவருவதாவது,
கூட்டு ஒப்பந்தம் கைச்சாத்திடப்பட்டு ஒரு மாத காலம் மேலாகியும் அக்கூட்டு ஒப்பந்தத்தில் தோட்ட முதலாளிமார் சம்மேளனம் மற்றும் தொழிற்சங்கங்கள் இணைந்து கைச்சாத்திடப்பட்டுள்ள விதி முறைகளுக்கு அப்பால் போடைஸ் தோட்ட நிர்வாகத்தில் தொழிலாளர்களுக்கு எதிராக மாறுப்பட்ட தொழில் விதி முறைகள் உள்வாங்கப்பட்டுள்ளது.
“நோம்” அடிப்படையில் பறிக்கப்பட வேண்டிய கொழுந்தினை அதற்கும் அதகிமாக பறிக்கும் படி போடைஸ் தோட்ட நிர்வாகம் தொழிலாளர்களை வற்புறுத்தியுள்ளது.
அதேவேளை கூட்டு உடன்படிக்கையின் அடிப்படையில் திறன் கொடுப்பனவான 140 ரூபாவை அத்தோட்ட நிர்வாகம் தொழிலாளர்களுக்கு வழங்கவில்லை. அதேபோன்று மேலதிகமாக பறிக்கப்படும் தேயிலை கொழுந்திற்கான தொகையினையும் மறுத்திருக்கும் இத்தோட்ட நிர்வாகம் ஞாயிற்று கிழமைகளில் வழமைபோல் வழங்கப்பட்ட ஒன்றரை நாள் சம்பளத்தை தவிர்த்து கைக்காசு அடிப்படையில் சம்பளத்தை வழங்க முன்வந்திருந்துள்ளதாக தொழிலாளர்கள் தெரிவித்துள்ளனர்.
இவை அனைத்திற்கும் எதிர்ப்பினை தெரிவித்த தொழிலாளர்கள் இவ்விடயம் தொடர்பில் இலங்கை தொழிலாளர் காங்கிரஸின் பொது செயலாளர் ஆறுமுகன் தொண்டமானின் கவனத்திற்கு கொண்டு வந்துள்ளனர்.
இதனடிப்படையில் இத்தோட்ட நிர்வாகத்தினரிடம் பேசப்பட்டுள்ளது. அதேவேளை கொடுக்கப்படும் கொடுப்பனவுகளை முறையாக கொடுக்காத பட்சத்தில் தொழிலாளர்களால் பறிக்கப்பட்டு தேயிலை தூள் உற்பத்தி செய்து கொழும்புக்கு விற்பனைக்காக கொண்டு செல்லப்படும் தேயிலை தூள் பொதிகளை தொழிற்சாலையிலிருந்து கொண்டு செல்லப்பட வேண்டாம் என தொழிலாளர்கள் தோட்ட நிர்வாகத்தை வழியுறுத்தியுள்ளனர்.
இதனை மீறி போடைஸ் தோட்ட நிர்வாகம் சுமார் 8000 கிலோ அடங்கிய தேயிலை தூள் பொதிகளை அத்தோட்டத்தின் வாகனத்தின் ஊடாக கொழும்புக்கு ஏற்றிச்செல்ல முற்பட்டுள்ளனர்.
இவ்விடயம் அறிந்த தொழிலாளர்கள் அத்தோட்டத்தின் மயானபூமிக்கு அருகில் உள்ள பிரதான வீதியில் வாகனத்தை மடக்கி பிடித்து நிறுத்தியுள்ளனர்.
இவ்விடயம் தொடர்பில் இலங்கை தொழிலாளர் காங்கிரஸின் கவனத்திற்கு கொண்டு வந்த அதேவேளை தொழிலாளர்கள் இன்று பணிக்கு திரும்பாமல் வீதிக்கு இறங்கியுள்ளனர்.
இச்சம்பவத்தை அறிந்து ஸ்தலத்திற்கு விரைந்த இலங்கை தொழிலாளர் காங்கிரஸின் மத்திய மாகாண சபை உறுப்பினர் கணபதி கனகராஜ் மற்றும் மகளிர் பிரிவு இணைப்பாளர் அருள்நாயகி உள்ளிட்ட காங்கிரஸின் பிரதிநிதிகள் அடங்கிய குழுவினர் தோட்ட தொழிலாளர்களுடனும், நிர்வாகத்தினருடனும் பேச்சுவார்த்தை ஒன்றில் ஈடுப்பட்டனர்.
அதன்போது தேயிலை பொதிகளை ஏற்றிச்சென்ற வாகனத்தை தோட்ட தொழிற்சாலையில் பாதுகாப்பாக நிறுத்தும்படியும், தொழிலாளர்களின் கோரிக்கைகளுக்கு தீர்வு கிட்டியதன் பின் இத்தேயிலை பொதிகளை கொழும்புக்கு ஏற்றிச்செல்ல வேண்டும் எனவும் இவர்களால் வழியுறுத்தப்பட்டுள்ளது.
அதேவேளை இது தொடர்பில் தோட்ட நிர்வாகத்தின் அதிகாரியிடம் வினாவியபோது, தொழிலாளர்கள் தொடர்பில் முன்வைக்கப்பட்டுள்ள கோரிக்கைகள் தொடர்பில் இ.தொ.கா எடுக்கப்பட்ட தீர்மானம் தொடர்பில் தனக்கு ஏதும் உரிய நேரத்தில் அறிவிக்கப்படவில்லை. ஆகையால் வழமைபோல் தேயிலை பொதிகளை கொழும்புக்கு ஏற்றிச்செல்லும் நடவடிக்கையில் தாம் ஈடுப்பட்டதாக அவர் தெரிவித்தார். சரியான தீர்மானம் அல்லது எடுக்கபட்ட முடிவு இ.தொ.கா மூலம் எனக்கு தெரியப்படுத்திருந்தால் இந்நடவடிக்கையில் ஈடுப்பட்டிருக்க மாட்டேன் எனவும் அவர் தெரிவித்தார்.
இதனையடுத்து பேச்சுவார்த்தை ஒன்றில் ஈடுப்பட்டுள்ளனர் என்பது குறிப்பிடதக்கது. கூட்டு உடன்படிக்கையின் அடிப்படையில் செயற்படாத அனைத்து தோட்டங்களிலும், இவ்வாறான முறுகல் நிலை ஏற்பட வாய்ப்பு இருப்பதாக தெரியவந்துள்ளது. நன்றி வீரகேசரி
கருணாவுக்கு விளக்கமறியல்
29/11/2016 கருணா அம்மான் என அழைக்கப்படும் முன்னாள் பிரதி அமைச்சர் விநாயகமூர்த்தி முரளிதரனை டிசம்பர் மாதம் 7 ஆம் திகதிவரை விளக்கமறியலில் வைக்குமாறு நீதிமன்றம் உத்தரவிட்டுள்ளது.
கடந்த ஆட்சியின் போது 800 மில்லியன் பெறுமதியான துப்பாக்கி துளைக்காத வாகனொமொன்றை முறைகேடாக பயன்படுத்தியமை தொடர்பில் வாக்குமூலமளிப்பதற்காக நிதிமோசடி விசாரணைப்பிரிவில் இன்று ஆஜராகிய போது இவர் கைதுசெய்யப்பட்டமை குறிப்பிடத்தக்கது. நன்றி வீரகேசரி
கருணா குழுவினருடன் இணைந்து கிழக்கில் பல கொலைகளை செய்தேன்.!
29/11/2016 கருணா குழுவினருடன் இணைந்து கிழக்கு மாகாணத்தில் பல கொலைகளை தான் செய்ததாக பாராளுமன்ற உறுப்பினர் நடராஜா ரவிராஜ் கொலை வழக்கின் அரச சாட்சியான முன்னாள் பொலிஸ் கான்ஸ்டபிள் பிரித்திவிராஜ் மனம்பேரி நேற்று கொழும்பு மேல் நீதிமன்றில் தெரிவித்தார்.
ரவிராஜ் கொலை வழக்கின் இரண்டாவது பிரதிவாதியின் சட்டத்தரணியான சிரேஷ்ட சட்டத்தரணி அசித் சிறிவர்தனவின் குறுக்கு கேள்விகளுக்கு பதிலளிக்கும் போதே குறித்த சாட்சியளர் மேற்படி சாட்சியத்தைப் பதிவு செய்தார். இந்த விடயத்தை சாட்சியாளர் வெளிபப்டுத்திய போது மன்றில் பிரசன்னமாகியிருந்த சிரேஷ்ட பிரதி சொலிசிட்டர் ஜெனரல் ரொஹந்த அபேசூரிய கடும் எதிர்ப்பினை முன்வைத்ததால் மன்றில் சிறிது நேரம் வாதப் பிரதிவாதங்கள் நீடித்தன.
தமிழ்த் தேசிய கூட்டமைப்பின் யாழ்.மாவட்ட முன்னாள் பாராளுமன்ற உறுப்பினர் நடராஜா ரவிராஜ் மற்றும் அவரது மெய்பாதுகாவலராக இருந்த பொலிஸ் உத்தியோகத்தர் லக்ஷ்மன் ஆகியோரை படுகொலை செய்த விவகாரம் தொடர்பிலான சாட்சி விசாரணைகள் நேற்று கொழும்பு மேல் நீதிமன்ற நீதிபதி மணி லால் வைத்திய திலகவின் நேரடி கண்காணிப்பில் சிறப்பு ஜூரிகள் முன்னிலையில் ஆரம்பமானது. முதலாவது சாட்சியாளரான அரச சாட்சியாக மாற்றப்பட்ட பொலிஸ் கான்ஸ்டபிள் பிரித்திவிராஜ் மனம்பேரி முதலாவது சாட்சியாக நேற்றும் சாட்சியமளிக்க ஆரம்பித்தார்.
பிரதிவாதி சட்டத்தரணிகளான அசித் சிறிவர்தன மற்றும் அனோஜ பிரேமரத்னவின் குறுக்குக் கேள்விகளுக்கு பதிலளித்தவாறு அவர் அளித்த சாட்சியம் வருமாறு :
அசித்: 2005 ஆம் ஆண்டு காலப்பகுதியின் கிழகில் பிரதிப் பொலிஸ் மா அதிபரின் கீழ் சேவையாற்றிய காலப்பகுதியில் கருணா குழுவுடன் இணைந்து நடவடிக்கைகளில் ஈடுபட்டீரா?
பதில்: ஆம்
அசித்: அந் நடவடிக்கைகள் எவ்வாறானது என விளக்கமுடியுமா?
பதில்: அரசாங்கத்தின் நிர்வாகத்துக்கு உட்பட்ட, உட்படாத பகுதிகளில் புலிகள் அமைப்புக்கு எதிராக கருணா குழுவினருடன் இணைந்து தாக்குதல்களை நடத்துவது. அவர்களை கொலை செய்வது.
அசித்: நீர் கூறுவது அனைத்தும் உண்மை என்பது தானே உம்முடைய நிலைப்பாடு?
பதில்: ஆம்
அசித்: இவ்வழக்கின் குற்றம் மற்றும் சதி தொடர்பில் நீர் கூறிவதும் அப்படியானால் உண்மை தானா?
பதில்: ஆம்
அசித்: உம்மை பொறுத்தவரை இரு நிலைப்பாடுகள் உள்ளன. ஒன்று, ரவிராஜ் கொலையை வெளியே கூறாமைக்கு உயிர் அச்சுறுத்தல் காரணம். மற்றையது, கொல்லப்பட்டது ரவிராஜ் தான் என்பதை நீர் வானொலி ஊடாகவே அறிந்துள்ளீர். அப்படித்தானே?
பதில்: ஆம்
அசித்: நீர் பொய் சாட்சி கூறுகின்றீர் என நான் பரிந்துரைக்கின்ரேன்.
பதில்: அதனை நான் நிராகரிக்கின்றேன்.
அசித: ரவிராஜை கொல்லப் போகும் திட்டம் உமக்கு ஏற்கனவே தெரியும் தானே?
பதில்: இல்லை.
அசித்: கடந்த 2015.2.26 அன்று நீர் குற்றப் புலனாய்வுப் பிரிவுக்கு வழக்கிய வாக்கு மூலம், அதாவது நீர் உண்மைகளை மட்டுமே கூறியதாக கூறும் வாக்கு மூலத்துக்கு அமைய ரவிராஜை சாமி கொலை செய்ய தீட்டிய திட்டம் உமக்கு தெரிந்துள்ளது. அது தொடர்பில் நீர் வாக்கு மூலம் அளித்துள்ளீர். ?
(இதன் போது எழுந்த சிரேஷ்ட சொலிசிட்டர் ஜெனரல் ரொஹந்த அபேசூரிய அக்கேள்விக்கு எதிர்ப்பு தெரிவித்தார். வாக்கு மூலத்தை மன்றில் வாசித்து காட்டுவதற்கும் இடம்கொடுக்கக் கூடாது என்றார்)
அசித் : ரவி ராஜ் கொலை இடம்பெற்ற காலப்பகுதியில் நீர் பொலிஸ் சேவையில் இருந்தீரா?
பதில்: ஆம்
அசித்: அப்படியானால் சட்டம் ஒழுங்கை நிலை நாட்டும் உத்தியோகத்தர் ஒருவரின் பொறுப்புக்கள் உமக்கும் இருந்தது?
பதில்: ஆம்
அசித்: அப்படியானால் நீர் சாட்சியம் அளிக்கும் போது கூறினீர், ரவி ராஜ் கொலையின் முக்கிய பிரதிவாதிகளான சாமி சரண் ஆகியோர் கொழும்பில் அதி உயர் பாதுகாப்பு வலயத்தில் தங்கியிருந்ததாக. அப்படியானால் அது தொடர்பில் நீர் உமது உயர் அதிகாரிகளுக்கு அறிவித்தீரா?
பதில்: இல்லை.
அசித்: ரவிராஜ் கொலைக்கு அவர்கள் தயாரானமை நீர் அறிந்திருந்தீர். அப்படி இருந்தும் ஒரு பாராளுமன்ற உறுப்பினரை கொலை செய்யப் போவதை ஏன் நீர் அறிவிக்கவில்லை.?
பதில்: என்னிடம் புலி இயக்க முக்கியஸ்தர் ஒருவரை கொல்லப் போவதாகவே கூறினர்.
அசித்:இல்லை. நீர் ரவிராஜை கொல்லப் போகும் திட்டத்தை முன் கூட்டியே அறிந்திருந்தீர். ஆகவே தான் பொலிசாருக்கு வழங்கிய வாக்கு மூலத்தில் சாமி தன்னிடம் கூறியதாக அந்த விடயத்தை கூறியுள்ளீர்?
பதில்: ஞாபகம் இல்லை.
அசித்: சரி, ரவிராஜ் கொலைக்கு முன்னர் உளவு பார்த்ததாக ஏதும் தகவல்களை சாமி கூரினாரா?
பதில்: ஆம், ரவிராஜின் வீட்டுப் பகுதியில் சோதனை நடவடிக்கை ஒன்றினை சாமி, சரண், டூசேன், பிரசாத், வஜிர,செனவிரத்ன ஆகியோர் இணைந்து முன்னெடுத்ததாக கூறினார்.
( இதன் போதும் பிரதி சொலிசிட்டர் ஜெனரல் தமது எதிர்ப்பை முன்வைத்ததையடுத்து, நீதிபதி மணி லால் வைத்திய திலக, அந்த சோதனை நடவடிக்கையில் சாட்சியாளர் நேரடியாக பங்கேற்ராரா என கேள்வியை தொடுத்தார். அதற்கு சாட்சியாளர் இல்லை என பதிலளித்தையடுத்து அது தொடர்பில் கேள்வி கேட்க அனுமதியளிக்க மறுத்தார்.)
அசித்: உமக்கு பிறகு சாட்சியளிக்கவுள்ள 2 ஆவது சாட்சியாளரை தெரியுமா?
பதில்: ஆம்
அசித்: மூன்றாவது சாட்சியாளரை தெரியுமா?
பதில்: ஆம்
அசித்: 2006.11.09 ஆம் திகதி நீரும், ஏனைய இரு சாட்சியாளர்களும் சேர்ந்து தொழில் நுட்ப கல்லூரி சந்தியில் ரவிராஜை கொலை செய்ய முயன்ற போது அவ்விடத்தில் மோட்டர் சைக்கிளில் இருந்தீர் தானே?
பதில்: இல்லை. அதனை மறுக்கின்ரேன்.
அசித்: ரவிராஜ் கொலைக்கு முன்னரேயே, கொலை செய்யப்பட்ட தினம் நீர் செலுத்திய மோட்டர் சைக்கிள் உமக்கு தரப்பட்டது.
பதில்: இல்லை
கேள்வி: தலை கவசம் கூட ஒரு வாரத்துக்கு முன்பே உம்மிடம் கொடுக்கப்பட்டது என நான் யோசனை செய்கின்றேன்.
பதில்: அதனை நிராகரிக்கின்றேன்.
அசித்: நீர் கருணா குழுவுடன் இணைந்து செய்த குற்றத்தை மறைக்க பிரதிவாதிகளுக்கு எதிராக பொய் சாட்சி கூறுகின்றீர் என் நான் பிரேரிக்கின்றேன்.
பதில்: நிராகரிக்கின்றேன்.
அசித்: ரவிராஜின் கொலை இடம்பெற்ற தினம் சாமி உம்மை எங்கு வரச் சொன்னார்?
பதில்: பொரளை கனத்தை அருகே
அசித்: கனத்தை என்பது மிக விசாலமான பகுதி. அதன் முன்பாக ஒரு சுற்று வட்டம் உள்ளது. அந்த சுற்றுவட்டம் ஊடாக 5 பாதைகள் பிரிந்து செல்கின்ரன?
பதில்: ஆம்
அசித்: அப்படியாயின், கனத்தை அருகே வருமாறு சாமி கூறியதும் நீர் எப்படி சரியாக, மாதா வீதிக்கு மிக அருகில் போய் நின்றீர்? ஏற்கனவே உமக்கு பாதை அறிவிக்கப்படாமல், சதி தெரியாமல் இருப்பின் எப்படி அது சாத்தியமாகும்?
பதில்: இல்லை. சாமி வரச் சொன்னதாலேயே அங்கு சென்றேன்.
அசித்: அங்கு சாமி, சரண் வந்தனரா?
பதில்: ஆம். கறுப்பு முச்சக்கர வண்டியில் சாமி சரண், டூசேன் ஆகியோர் வந்தனர்.
அசித்: வேறு யார் வந்தனர்?
பதில்: பச்சை மற்றும் கிறீம் நிர முச்சக்கர வண்டிகளில்பிரதிவாதிகள் வந்தனர். கிறீம் நிற முச்சக்கர வண்டியில் கடற்படையைக் குறிக்கும் எழுத்துடன் கூடிய இலக்கத்தகடு காணப்பட்டது.
அசித்: அந்த முச்சக்கர வண்டிகளில் வந்தோர் யார்?
பதில்: ஞாபகம் இல்லை
அசித்: ஞாபகம் இல்லை என்பது பொய். கறுப்பு முச்சக்கர வண்டி மட்டுமே வந்தது. அதில் கருணா குழுவினர் வந்துள்ளனர்.?
பதில்: இல்லை மறுக்கின்றேன்.
அசித்: சாமி, சரண், டூசேன் ஆகியோர் இந்த வழக்கில் தற்போது இல்லாததால் நீர் தப்பித்துக்கொள்வதற்காக இவ்வாறு பொய்யான சாட்சியம் அளிக்கின்ரீர்?
பதில்: இல்லை. அதனை மறுக்கின்ரேன்.
அசித்: மட்டக்களப்பில் கருணா குழுவினர் பல கொலைகளை செய்துள்ளனர்?
பதில்: ஆம்
அசித்: கருணா குழுவினருடன் இணைந்து நீரும் பல கொலைகளை செய்துள்ளீர்?
பதில்: ஆம்
(இதன் போது அந்த கேள்விக்கு பிரதி சொலிசிட்டர் ஜெனரல் கடும் எதிர்ப்பை வெளியிட்டார். புலிகள் இயக்கத்தினரையே கொலை செய்ததாகவும் பிரதிவாதியின் சட்டத்தரணியின் கேள்வி தவறானது என வாதிட்டார். இதன் போது ஏனைய பிரதிவாதிகளின் சட்டத்தரணிகளான ரசிக பாலசூரிய மற்றும் அனோஜ பிரேமரத்ன ஆகியோரும் எழுந்து அசித் சிறிவர்தனவுடன் சேர்ந்து தொடர் வாதங்களை முன்வைத்தனர். பிரதி சொலிசிர்ரர் ஜெனரல் தேவையில்லாமல் குருக்கீடு செய்வதாகவும் கேள்வி சரியானதே எனவும் பதிலும் கிடைத்துவிட்டதாக அவர்கள் கூறினர். வாதப் பிரதிவாதம் முற்றிய நிலையில் பொதுவாக கொலைகளை செய்தீரா என எப்படி வினவ முடியும் என பிரதி சொலிசிட்டர் ஜெனரல் பிரதிவாதிகளின் சட்டத்தரணிகளிடம் கேட்டார். இதன் போது சிரேஷ்ட சட்டத்தரணி அனோஜ பிரேமரத்ன, கடத்தப்பட்ட சீனி முதலாளி, மேலும் பல தன்மிழ் அப்பாவிகள் யார் என கேள்வி எழுப்பினார். அதற்குள் தலையிட்ட நீதிபதி மணி லால் வைத்திய திலக வாதத்தை நிறைவுக்கு கொண்டுவந்து சமாதானப்படுத்தினார்.
இதனையடுத்து மூன்றாவது பிரதிவாதியின் சட்டத்தரணியான அனோஜ பிரேமரத்ன சாட்சியாளரான பிரித்தி விராஜ் மனம்பேரியை குறுக்கு விசாரணைகளுக்கு உட்படுத்தினார்.
அனோஜ: சாமியின் அறிவுறுத்தல் படி போகும் போது யாரையோ ஒரு மனிதரை கொல்லப் போவதை நீர் அறிந்திருந்தீரா?
பதில்: புலிகள் இயக்க உறுப்பினர்.. என இழுக்கும் போதே
அனோஜ: புலிகள் இயக்கமோ, ஐ.எஸ். அமைப்போ, போகோ ஹராமோ ஏதோ ஒரு அமைப்பை சேர்ந்த ஒரு மனிதனை கொல்லப் போவதை அறிந்திருந்தீரா?
பதில்: ஆம்.
அனோஜ: நீர் இவ்வழக்கில் மன்னிப்பு பெற விதிக்கப்பட்ட நிபந்தனையைத் தானே தற்போது இப்படி சாட்சி சொல்வது. இதனைப் பெற சட்ட மா அதிபருக்கு நீர் நன்றி தெரிவித்தீர்தானே?
( இக்கேள்வியின் போது பிரதி சொலிசிர்ரர் ஜெனரல் மீள தமது எதிர்ப்பைத் தெரிவித்தார்.)
அனோஜ: அரசுக்கு பக்கச் சார்பாக சாட்சியளிப்பதாக கூரினீர் தானே? அது தானே நிபந்தனை?
பதில்: ஆம்
( கனம் நீதிபதியவர்களே, அரசின் சார்பாக சாட்சியம் அளிப்பதாக அவர் கூறவில்லை. அரசாங்கத்துக்கு பக்கச் சார்பாக வாக்கு மூலம் அளிப்பதாகவே அவர் நிபந்தனைகளுக்கு உட்படுத்தப்பட்டுள்ளார்.)
அனோஜ: உமக்கு நிபந்தனை பிணை கடந்த 2015.10.05 அன்று கிடைத்தது?
பதில்: ஆம்
அனோஜ: கஞ்சா தூள் 160 கிலோ விற்பனை செய்த வழக்கில் குற்றத்தை ஒப்புக் கொண்டது அதன் பின்னர் தானே?
பதில்: ஆம்
அனோஜ: குறித்த வழக்கில் இரு சாட்சிகள் விசாரிக்கப்பட்ட பின்னரேயே நீர் குற்றத்தை ஒப்புக் கொண்டீர். அதன் பின்னரேயே உமக்கு தண்டமும் 10 வருட ஒத்தி வைக்கப்பட்ட தண்டனையும் வழங்கப்பட்டது. இதன் போது சட்ட மா அதிபர் சார்பிலும் உமக்கு குரைந்த பட்ச தண்டனையே கோரப்பட்டது. இவையனைத்தும் இவ்வழக்கில் அரச சாட்சியாக சாட்சியமளிப்பதற்கான நிபந்தனையல்லவா?
பதில்: இல்லை.
( இதன் போது பிரதி சொலிசிட்டர் ஜெனரல் ரொஹந்த கடும் ஆட்சேபனை வெளிட்டார்.)
அனோஜ: நீர் கிழக்கில் பிரதிப் பொலிஸ் மா அதிபர் ரொஹனின் கீழ் எப்போது கடமையாற்றினீர்?
பதில்: எனக்கு ஞாபகத்தில் உள்ளதன் படி 2005 ஜனவரி முதல் டிசம்பருக்கு உட்பட்ட காலப்பகுதியில்
அனோஜ: 2006 ஆம் ஆண்டு ஜூன் மாதம் பிரபல சீனி வர்த்தகர் நடராஜா ஸ்ரீ ஸ்கந்தராஜவை கடத்தியமை தொடர்பில் நீர் 2008 ஆம் ஆண்டு கைது செய்யப்பட்டாரா?
பதில்: ஆம்
அனோஜ: சட்ட மா அதிபர் அது தொடர்பில் குற்றம் சாட்டியுள்ளார் தானே?
பதில்: ஆம்
( இதன் போது அது குறித்து வேறு ஒரு வழக்கு இடம்பெறுவதால் அவ்வழக்குக்கு சாட்சியாளரின் சாட்சியாளரின் பதில் பாதிப்பை ஏற்படுத்தும் எனவும் அதில் அவர் ஒரு பிரதிவாதி என்பதல் அவருக்கு பாதக நிலைமை ஏர்படலாம் எனவும் சுட்டிக்கடடப்பட்டது. அதனால் அக்கேள்விகள் தவிர்க்கப்படல் வேண்டும் என பிரதி சொலிசிட்டர் ஜெனரலினால் கோரப்பட்டது. எனினும் சிரேஷ்ட சட்டத்தரணி அனோஜ பிரேமரத்ன, சாட்சிகள் கட்டளைச் சட்டத்தின் பிரகாரம் தமக்கு அக்கேள்விகளை தொடுக்க முடியும் என்பதையும், அதனால் எவ்வித பாதிப்பும் இல்லை என்பதையும் எடுத்துக்காட்டி குறுக்கு விசாரணைகளை தொடர்ந்தார்)
இந் நிலையில் நேற்றைய தினம் மாலை 4 மணியளவில் வழக்கை இன்றைய தினத்துக்கு ஒத்திவைத்த நீதிபதி மணி லால் வைத்திய திலக இன்று காலை10.30 க்கு வழக்கை விசாரணைக்கு எடுத்துக்கொள்வதாக அறிவித்தார். அதுவரை பிரதிவாதிகளை கொழும்பு விளக்கமறியல் சிறையிலும் முதலாவது சாட்சியாளரை மெகசீன் சிறையிலும் விஷேட பாதுகப்புக்கு மத்தியில் தடுத்து வைக்க நீதிபதி உத்தர்விட்டார். நன்றி வீரகேசரி
பாராளுமன்றத்தை நோக்கி படையெடுக்கும் 3000 இற்கும் அதிகமான மாணவர்கள்?
29/11/2016 களனியிலிருந்து கொழும்பு நோக்கி அனைத்து பல்கலைக்கழக மாணவர்கள் மற்றும் வைத்தியபீட மாணவர்கள் செயற்பாட்டுக் குழுவும் இணைந்து முன்னெடுத்துள்ள ஆர்ப்பாட்டம் பாராளுமன்றத்தை நோக்கி முன்னெடுக்கப்பட்டுள்ளதாக தெரிவிக்கப்பட்டுள்ளது.
தற்போதைய நிலையில் 3000 இற்கும் அதிகமான மாணவர்கள் பொரளையிலிருந்து கோட்டே வீதியினூடாக ஆர்ப்பாட்டத்தை முன்னெடுத்துள்ளதாக பொலிஸார் தெரிவித்தனர்.
இதனால் வாகன சாரதிகள் மாற்று வீதிகளை பயன்படுத்துமாறு பொலிஸார் தெரிவித்துள்ளனர். நன்றி வீரகேசரி
பிள்ளையான் உட்பட நால்வரின் விளக்கமறியல் நீடிப்பு.!
30/11/2016 தமிழ்த் தேசியக் கூட்டமைப்பின் பாராளுமன்ற உறுப்பினர் ஜோசப் பராஜசிங்கத்தின் படுகொலைச் சம்பவம் தொடர்பில் கைது செய்யப்பட்ட 4 பேரினதும் விளக்கமறியல் எதிர்வரும் டிசம்பர் மாதம் 14 ஆம் திகதிவரை நீடிக்கப்பட்டுள்ளது.
நீதவானும் மேலதிக மாவட்ட நீதிபதியுமான மாணிக்கவாசகர் கணேசராஜா முன்னிலையில் இன்று இவர்களை ஆஜர்படுத்தியபோதே நீதவான் இந்த உத்தரவைப் பிறப்பித்துள்ளார்.
கிழக்கு மாகாணத்தின் முன்னாள் முதலமைச்சர் சிவநேசதுரை சந்திரகாந்தன், தமிழ் மக்கள் விடுதலைப் புலிகள் கட்சியின் முன்னாள் தேசிய அமைப்பாளரும் மாகாண சபை முன்னாள் உறுப்பினருமான பிரதீப் மாஸ்டர் என அழைக்கப்படும் எட்வின் சில்வா கிருஸ்ணானந்தராஜா, கஜன் மாமா எனப்படும் கனகநாயகம் மற்றும் இராணுவப் புலனாய்வு உத்தியோகஸ்தர் எம்.கலீல் ஆகியோருக்கே விளக்கமறியல் நீடிக்கப்பட்டுள்ளது.
தமிழ்த் தேசியக் கூட்டமைப்பின் பாராளுமன்ற உறுப்பினர் ஜோசப் பரராஜசிங்கம் கடந்த 2005ஆம் ஆண்டு மட்டக்களப்பு புனித மரியாள் இணைப் பேராலயத்தில் நடைபெற்ற நத்தார் நள்ளிரவு ஆராதனையில் கலந்து கொண்டிருந்தபோது சுட்டுக்கொல்லப்பட்டிருந்தார்.
இந்தக் கொலைச் சம்பவம் தொடர்பில் கடந்த 11.10.2015 அன்று சந்தேக நபரான சிவநேசதுரை சந்திரகாந்தன் உட்பட 04 பேர் கைது செய்யப்பட்டு விளக்கமறியலில் வைக்கப்பட்டு வருகின்றனர்.
இந்த நிலையில் எதிர்வரும் டிசம்பர் 14ஆம் திகதிவரை 4 பேரினதும் விளக்கமறியல் நீடிக்கப்பட்டுள்ளது. நன்றி வீரகேசரி
முல்லைத்தீவு ஒதியமலை படுகொலை : 32ஆம் ஆண்டு நினைவுதினம் அனுஷ்டிப்பு!
02/11/2016 முல்லைத்தீவு, ஒதியமலை கிராமத்தில் 1984.12.02 அன்று இராணுவத்தினரால் படுகொலை செய்யப்பட்ட 32 அப்பாவி தமிழ் மக்களின் 32ஆம் ஆண்டு நினைவு தினம் இன்று படுகொலை நடைபெற்ற இடத்தில் இராணுவத்தால் இடித்து அழிக்கப்பட்ட நினைவுத்தூபி ,அமைத்திருந்த இடத்தில் அனுஷ்டிக்கப்பட்டது.
படுகொலை செய்யப்பட்டவர்களின் உறவுகள் தீபம் ஏற்றியும் ஒதியமலை பிள்ளையார் ஆலயத்தில் விசேட ஆராதனையில் ஈடுபட்டும் தமது உறவுகளை நினைவு கூர்ந்தனர்.
இந்நிகழ்வில் தமிழ் தேசியக் கூட்டமைப்பின் வன்னி மாவட்ட பாராளுமன்ற உறுப்பினர் சாந்தி ஸ்ரீஸ்கந்தராசா மற்றும் வட மாகாண சபையின் பிரதி அவைத்தலைவர்
கமலேஸ்வரன் உறுப்பினர்களான ஜி.ரி. லிங்கநாதன், து. ரவிகரன் ஆகியோர் கலந்து கொண்டு அஞ்சலி செலுத்தினர்.
1984.12.02 ஆண்டு அதிகாலையில் இராணுவ சீருடையில் கிராமத்திற்குள் புகுந்த இராணுவத்தினர் ஒதியமலை கிராமத்திலுள்ள வீடுகளில் இருந்த ஆண்களை ஒரு இடத்திற்கு கூட்டிச் சென்று சுட்டு படுகொலை செய்திருந்தனர்.
இந்த படுகொலை செய்யப்பட்ட மக்களின் நினைவாக அமைக்கப்பட்ட நினைவுத்தூபியை இராணுவத்தினர் இடித்து அழித்துள்ளமையும் குறிப்பிடத்தக்கது.
நன்றி வீரகேசரி
No comments:
Post a Comment