‘மே 18’ அவுஸ்திரேலியாவில் இடம்பெற்ற ‘தேசிய நினைவேந்தல் நாள்’நிகழ்வுகள்

.

ஈழத்தமிழர்கள் வாழ்வில் பேரழிவை ஏற்படுத்திய மே மாதத்தின் துயரநாட்களையும் அப்பேரிடர் மத்தியிலும் மண்ணோடு இணைந்துநின்று மரணித்த எம் உறவுகளையும் விடுதலைக்காக விலையான எம் தேசத்தின் புதல்வர்களையும் நினைவுகொள்ளும் நினைவேந்தல் நாள் நிகழ்வுகள் அவுஸ்திரேலியாவில் சிட்னி, மெல்பேண் நகரங்களில் நடைபெற்றுள்ளன.

சிங்கள அரச பயங்கரவாதத்தினால் படுகொலை செய்யப்பட்ட 40 ஆயிரத்துக்கும் மேற்பட்ட தமிழ்மக்களை நினைவுகூரும் தமினப்படுகொலை நாள் தேசிய நினைவேந்தல் நாள்’நிகழ்வு அவுஸ்திரேலியா மெல்பேர்ணில் மே மாதம் 18ம் திகதி வெள்ளிக்கிழமை மாலை 4.00 தொடக்கம் மாலை 6.30 வரை மெல்பேர்ண் நகரின் மத்தியில் அமைந்துள்ள State Library முன்றலில் நடைபெற்ற நினைவேந்தல் நாள் நிகழ்வில் 500 இற்கு மேற்பட்ட இந்த நிகழ்வில் மெல்பேர்ன் வாழ் தமிழ் மக்களும், தமிழீழத்துக்கு ஆதரவான வேற்றின மக்களும் கலந்துகொண்டனர்.

விக்ரோறியாவின் தமிழர் அமைப்புக்களின் ஆதரவுடன் தமிழர் ஓருங்கிணைப்புக் குழுவினால் ஒருங்கிணைக்கப்பட்ட இந்நிகழ்வில் அவுஸ்திரேலிய நாடாளுமன்ற உறுப்பினர்கள், மனித உரிமை அமைப்பு பிரதிநிதிகள், பல சமூக செயற்பாட்டாளர்கள், சமூகத் தலைவர்கள் உட்டப பலரும் இந்நிகழ்வில் கலந்து கொண்டு தமது உணர்வுகளை பகிர்ந்து கொண்டிருந்தனர்.

அகவணக்கத்தைத் தொடர்ந்து, மிகவும் உணர்வுபூர்வமாக ஆரம்பித்த இந்நிகழ்வின் முதலில் இசைக்கலைஞர் சின்மயனின் தமிழ் பாரம்பரிய தாள இசை இடம்பெற்றிருந்தது. இந்நிகழ்வில் 2010ஆம் ஆண்டின் Australian of The Year விருதுபெற்ற பேராசிரியர் Patrick McGorry மற்றும் அவுஸ்திரேலியச் செனற் சபையின் உறுப்பினரான John Madigan ஆகியோர் சிறப்புப் பேச்சாளர்களாகக் கலந்துகொண்டு உரையாற்றினர். அவுஸ்திரேலியாவுக்கு புதிதாக வந்து புகலிடம் கோருவோருடனான தனது உறவைப்பற்றிக் குறிப்பிட்ட பேராசிரியர் Patrick McGorry அவர்கள் தமிழ் மக்கள் எவ்வளவு துயரங்களை அனுபவித்துள்ளார்கள் என்பதை புரிந்துகொள்ள முடிவதாகக் குறிப்பிட்டார்

இந்நிகழ்வில் உரையாற்றிய செனற்றர் John Madigan சிறிலங்காவில் ஐநாவின் மேற்பார்வையுடனான ஒரு சர்வதேச விசாரணையை வலியுறுத்தினார். இந்த சிறப்புப் பேச்சாளர்களுடன் Ms Kath Morton (president of Ballart circle of Friends), Mr. Mick Armstrong (Socialist Alternative), ஏனைய அவுஸ்திரேலிய சமூக செயற்பாட்டாளர்கள் சூ போல்ற்றன், டனியல் ஒலே, லிஸ் வோல்ஷ் ஆகியோரும் உரையாற்றினர். ‘முள்ளிவாய்க்கால் மண்ணே வணக்கம்’ என்ற பாட்டிற்கு இளைஞர் ஸ்ரீராம் சிறப்பாக பரதநாட்டியம் ஆடினார். இந்நிகழ்வின் உரைகளில் இறுதியாக நாடுகடந்த தமிழீழ அரசாங்கத்தின் பிரதிநிதிகளில் ஒருவரான டொமினிக் சந்தியாப்பிள்ளை அவர்கள் உரையாற்றினார்

 

நினைவேந்தல் வணக்கப்பாடல்களின் பிண்ணனி இசையுடன் மக்கள் கைகளில் மெழுகுவர்தியை தாங்கியபடி தீப அஞ்சலி இடம்பெற்றதைத் தொடர்ந்து இறுதியில் நினைவு வணக்கத் தூபிக்கு முன் தீப அஞ்சலியும் இடம்பெற்றிருந்தது. இந்நிகழ்வின் நெகிழவைக்கும் காட்சிகளை, மெல்பேண் ஊடகவியலாளர்களும், அந்த வழிகளில் பயணித்த பலரும் பதிவாக்கிக்கொண்டனர். இத்துடன் இந்த மனிதப் படுகொலைகளைப் பற்றியும், போர்க்குற்ற விசாரணைகளை மேற்கொள்ள வற்புறுத்தும் பதாதைகளும், படங்களும் அங்கு பல்லின மக்களின் கவனத்தினை ஈர்க்கக்கூடிய வகையில் இருந்ததோடு, பல்லாயிரக்கணக்கான துண்டுப்பிரசுரங்களும் அந்த வழியால் சென்ற பல்லின மக்களுக்கு தொண்டர்களினால் வழங்கப்பட்டது.

இந்நிகழ்வின் இறுதியில் நாடு கடந்த தமிழீழ அரசின் பிரதிநிதி ஜனனி பாலா முதலில் உறுதியுரையை வாசிக்க, நிகழ்வில் கலந்துகொண்ட தமிழ் மக்களும் வேற்றின மக்களும் ஆங்கிலத்தில் உறுதிமொழி எடுத்தனர்.

----------------------------------------------------------

இதேவேளை சிட்னியில் மாலை ஏழு மணிக்கு சிட்னியில் சில்வர் வோட்டர், Derby Street இல் அமைந்துள்ள பகாய் சென்ரரில் ஆரம்பமான முள்ளிவாய்க்கால் 3ம் ஆண்டின் நினைவு வணக்க நாள் நிகழ்வில் 600 இற்கும் மேற்பட்ட மக்கள் கலந்துகொண்டு முள்ளிவாய்க்காலில் விதையான உறவுகளுக்கு தமது அஞ்சலியை செலுத்தினர்.

இந் நினைவு வணக்க நாள் நிகழ்வு பொதுச்சுடர் ஏற்றல், அவுஸ்திரேலியாகொடி, தேசியக்கொடி ஏற்றலுடன் வருகை தந்த அணைத்து மக்களும் மலர்அஞ்சலி செலுத்தி இந்நிகழ்வு ஆரம்பமாகியது.

கிறின்ஸ் கட்சியை சேர்ந்த அவுஸ்திரேலியா பாராளமன்ற உறுப்பினரான Lee Rhiannon தமிழ் மக்களின் இன அழிப்பையும், சிறிலங்கா அரசின் போர்குற்றங்களைப் பற்றியும் உரையாற்றினார். 3 வருடங்களுக்கு முன் நடைபெற்ற இன அழிப்பையும், அதற்கு முன்பு எமது தமிழ்மக்கள் சுதந்திரமாக எப்படி வாழ்ந்தார்கள் என்பதையும், இப்போது அங்கு நடைபெறுகின்ற துன்பங்களையும், காணொளியை திரையில் காண்பிக்கப்பட்டது. பின்பு (korum theatre) அடக்கப்பட்டவர்களின் அரங்கம் அல்லது விவாத அரங்கம் நடைபெற்றது.

அனைத்து தமிழ்மக்களின் உறுதிஎடுத்தலுடன், மரணித்துப்போன எம்முறவுகளை நெஞ்சில் நிறுத்தி குரலடங்கிப்போயுள்ள தாயக மக்களின் குரலாக, பல நூற்றுக்கணக்கான தமிழ் உறவுகள் பெருமளவில் திரண்டு வந்து, முள்ளிவாய்க்காலில் வித்தாகிப்போன எம்மக்களையும் எமது போராளிகளின் கனவை நனவாக்க அனைவரும் தொடர்ந்தும் செயற்படவேண்டும் என கேட்டுக்கொண்டதோடு “தமிழரின் தாகம் தமிழீழத் தாயகம்”என்ற உறுதியுரையுடன் நிகழ்வுகள் நிறைவடைந்தன.

இதேவேளை காலை 11.30 மணி முதல் பிற்பகல் மூன்று மணி வரை தமிழ் இளையோர் அமைப்பினர் (மே-18 G for Genocide) சிறிலங்கா அரசு முன்று வருடங்களுக்கு முன் முள்ளிவாய்காளில் நாடாத்திய இன அழிப்பு, போர்க்குற்றங்கள் தொடர்பான துண்டுப்பிரசுரங்களை, விநியோகித்தும், மற்றும் முள்ளிவாய்க்கால் இனப்படுகொலைக் கொடுமைகளைச் சித்தரிக்கும் காட்சிகள், மற்றும் தகவல்களையும் அங்கு ஏனைய சமூகத்தைச் சேர்ந்த வேற்றின மக்களுடன் பகிர்ந்து கொண்டதோடு, 2000 இற்கும் மேற்பட்ட முள்ளிவாய்க்கால் நினைவு கூறல் துண்டுப்பிரசுரங்கள் விநியோகிக்கப்பட்டமையும் குறிப்பிடத்தக்கது. இதற்கு வேற்றின மக்கள் ஆதரவை வழங்கியதுடன் சில கருத்துக்களை வழங்கினார்கள், “தமிழினமக்களுக்கு சிறிலங்கா இராணுவத்தால் உயிரிழப்புக்கள் ஏற்படும் போது ஏன் மற்றைய நாடுகள் தமிழ் மக்களை பாதுகாக்கவில்லை என்றும் இதை தொடர்ந்து போராடினால் தமிழ் மக்களுக்கு விடுதலை கிடைக்கும் என்ற கூறினார்கள்”.