ராஜீவ் படுகொலை : பதறவைக்கும் 10 மர்மங்கள்
பாடசாலை விடுதியில் தீ : 17 மாணவிகள் உடல்கருகிப் பலி
500 மதுபான சாலைகள் மூடப்பட்டன : தேர்தல் வாக்குறுதிகளை நிறைவேற்ற தொடங்கினார் ஜெ.
ஆஸ்திரிய ஜனாதிபதி தேர்தலில் சுயேச்சை வேட்பாளர் வெற்றி
விமானம் விழுந்த இடத்திலிருந்து துண்டுதுண்டுகளாக சிதறிய 80 மனித எச்சங்கள் மீட்பு.!
பாப்பரசர் - கெய்ரோ பள்ளிவாசல் இமாம் சந்திப்பு
மல்லையாவின் தண்டனை அறிவிப்பு ஒத்திவைப்பு.!
வரலாற்று சாதனை படைத்த பராக் ஒபாமா.!
ராஜீவ் படுகொலை : பதறவைக்கும் 10 மர்மங்கள்
ஆவணப்படம் பற்றிகொளத்தூர் மணி கருத்து தெரிவிக்கையில், "பல புதிய ஆதாரங்களையும் புதிய செய்திகளையும் உலகுக்குச் சொல்கிறது இந்த ஆவணப்படம். இதுவரையில் ராஜீவ்காந்தி படுகொலையின் மர்மம் குறித்து வெளியான செய்திகளைவிட, இது முற்றிலும் மாறுபட்டு நிற்கிறது. புலனாய்வு அதிகாரிகளின் விசாரணை குளறுபடிகள், ஏன் அவ்வாறு செய்தார்கள்? பொலிஸாரின் கடுமையான, மிக மோசமான தவறுகள் என அனைத்தையும், விசாரணையின் ஆவணங்களில் இருந்தே சுட்டிக் காட்டியிருக்கிறார்கள். ஒரு கொலை வழக்கில் புதிய ஆதாரங்கள் கிடைத்தால், குற்றவாளி என்று சொல்லப்பட்டு சிறையில் அடைக்கப்பட்டுள்ளவர்களை விடுதலை செய்ய முடியும். ஆவணப்படத்தில் காட்டப்படும் ஆதாரங்களைக் கொண்டே, இந்திய நீதித்துறையின் மரபை உடைக்கும் வகையில், புதிய விசாரணை மேற்கொள்ளப்பட வேண்டும். ஆட்சியாளர்கள் அதற்காகப் போதிய நடவடிக்கைகளை மேற்கொள்ள வேண்டும். 25 ஆண்டுகளாக சிறையில் இருக்கும் ஏழு பேரையும் சட்டப்பிரிவு 72 மற்றும் 161 ஆவது பிரிவுகளின்படி விடுதலை செய்ய வேண்டும். 'பைபாஸ்' ஆவணப்படம் ராஜீவ்காந்தி படுகொலை வழக்கின் மிக முக்கியமான ஆவணம்" என்றார்.
ஆவணப்படம் சொல்லும் ஆதாரங்களை மறுத்துப் பேசிய சி.பி.ஐ முன்னாள் அதிகாரி ரகோத்தமனும், தடயவியல் துறை பேராசிரியர் சந்திரசேகரும், " சம்பவ இடத்தில் இருந்து கைப்பற்றப்பட்டது ஹரிபாபுவின் உடல்தான். சிறுநீரகக் கோளாறு காரணமாக சிறுவயதிலேயே அவர் சுன்னத் செய்திருந்தார். அவரது பெற்றோர்தான் உடலை அடையாளம் காட்டினார்கள். சம்பவ இடத்தில் ஹரிபாபு சடலமாக இருக்கும் படம் விகடனிலும் வெளியாகி இருந்தது" என்கின்றனர். ஆனால், ஆவணப்படம் எழுப்பும் சந்தேகங்கள் அதிர வைக்கின்றன.
1. மே மாதம் 21-ஆம் திகதி இரவு 10.20 மணிக்கு, ராஜீவ் காந்தி படுகொலை சம்பவம் நடந்தது. இரவு 10.35 மணிக்கெல்லாம், 'ராஜீவ்காந்தி இறந்துவிட்டார்' என்பதை உறுதி செய்துவிட்டார்கள். 22-ஆம் திகதி மதியம் 3 மணிக்கு, காஞ்சிபுரம் அரசு மருத்துவமனையில், ஒரு சடலத்திற்கு பிரேதபரிசோதனை நடத்தப்பட்டது. அந்த நிமிடம் வரையில் அந்த சடலத்துக்கு யாருமே உரிமை கொண்டாட வரவில்லை. 23-ஆம் திகதிதான் அது ஹரிபாபுவின் உடல் என அவரது தந்தை சுந்தரமணி உரிமை கொண்டாடினார். ஒருநாள் முழுவதும் அவர்கள் வராமல் இருந்தது ஏன்?
2. ஹரிபாபு என்று இவர்கள் சொல்லும் உடலில், 'முகம் முழுவதும் எரிந்து போய்விட்டது. அடையாளம் காண முடியாத அளவுக்கு சிதைந்து போய்விட்டது' என்கிறார்கள். பிறகு எப்படி ஹரிபாபுதான் என உறுதியாக நம்பினார்கள்?
3. படுகொலை நிகழ்ந்த இடத்தில், ஹரிபாபு விழுந்து கிடக்கும் புகைப்படம் விகடனில் வெளியானது. அந்தப் புகைப்படத்தில் அவரது முகம் தெளிவாக இருக்கிறது. ஆனால், போஸ்ட்மார்ட்டம் அறிக்கையில், 'முகம் முற்றிலும் சிதைந்துபோய்விட்டது. அடையாளம் காணமுடியவில்லை' எனக் குறிப்பிடப்பட்டிருக்கிறது. இந்த அறிக்கையை புலனாய்வு அதிகாரிகள் படித்துப் பார்க்கவில்லையா? சம்பவ இடத்தில் ஹரிபாபு மயக்க நிலையில் இருந்தபோது, இந்தப் படம் எடுக்கப்பட்டிருக்கலாம் என ஆவணப்படக் குழு சொல்கிறது. பிறகு எப்படி அந்த சடலத்தின் முகம் சிதைந்து போனது? மயக்க நிலையில் இருந்த அவருக்கு, சிகிச்சை அளித்து தப்ப வைத்துவிட்டு, முற்றிலும் சிதைந்து போன ஒரு முகத்தைக் காட்டி, 'இது ஹரிபாபுவின் உடல்' என மற்றவர்களை நம்ப வைத்திருக்கிறது பொலிஸ் என்கிறது ஆவணப்படக் குழு.
4. ஹரிபாபு எனக்காட்டப்பட்ட உடலில் இருந்து தனியாக தலையை துண்டித்து எடுக்க என்ன காரணம்? சூப்பர் இம்போஷிசன் முறையில் அடையாளம் காண முடியும் என்பதால்தான் தலை துண்டிக்கப்பட்டது என அதிகாரிகள் சொல்கிறார்கள். இதை ஏற்றுக் கொண்டாலும், ஹரிபாபுவுக்கு அப்போது 22 வயதுதான். போஸ்ட்மார்ட்டம் அறிக்கையில் 30 வயது எனக் குறிப்பிடப்பட்டிருக்கிறது. அப்படியானால், இறந்து கிடந்தது யார்?
5. ஹரிபாபுவின் அப்பா சுந்தரமணியிடம், சடலத்தைக் காட்டியபோது தலையில்லாத முண்டமாகத்தான் உடல் இருந்துள்ளது. அந்த சடலத்தின் உடலில் நீலக்கலர் காற்சட்டை போடப்பட்டிருந்தது. இது ஒன்றுதான் ஹரிபாபு எனக் கண்டறியக் காரணம் என்கிறார்கள். ஆனால், வீட்டில் இருந்து கிளம்பிய போது, ஹரிபாபு கிரீம் கலர் சட்டை அணிந்திருந்தார். சடலத்தில் பச்சை நிறக் கலர் சட்டை இருந்தது. இந்தக் கேள்வியை ஹரிபாபுவின் அக்கா பதிவு செய்திருக்கிறார். இந்தக் குளறுபடி ஏன்?
6. அந்த சடலத்திற்கு ஏற்கனவே, சுன்னத் செய்யப்பட்டிருக்கிறது என்றால், உடலுக்கு உரிமை கோருபவர்களிடம், 'உங்கள் பையனுக்கு சுன்னத் செய்தீர்களா?' என்ற அடிப்படைக் கேள்வியை பொலிஸார் கேட்டிருக்க வேண்டும். அப்படி எங்குமே கேட்கவில்லை. ஆவணத்தின் எந்தப் பக்கத்திலும் சிறுவயதில் ஹரிபாபுவுக்கு சுன்னத் செய்யப்பட்டிருந்தது எனவும் பதிவாகவில்லை. சாதாரண ஒரு சடலத்தையே பல கேள்விகளுக்குப் பிறகுதான் உரியவர்களிடம் ஒப்படைப்பார்கள். ஹரிபாபு சடலம் என்பது மிகப் பெரிய படுகொலைக்குப் பின்னால் இருக்கும் முக்கியமான சாட்சி. இந்த விஷயத்தில் பொலிஸார் வேண்டுமென்றே தவறு செய்தார்களா?
7. ஆவணப்படத்தில் இருக்கும் இன்னொரு முக்கிய ஆதாரம். ஹரிபாபுவின் பக்கத்திலேயே ஜெயபாலன் என்பவர் புகைப்படம் எடுப்பதற்காக நின்றிருக்கிறார். இவர் இசையமைப்பாளர் சங்கர் கணேஷின் ட்ரூப்பில் புகைப்படக்காரராக இருந்தவர். ''ஹரிபாபுவின் தோள்பட்டையை துணையாக (சப்போர்ட்டாக) வைத்துக் கொண்டு படம் எடுத்தேன். சம்பவ இடத்தில் என்ன நடந்தது என்று தெரியவில்லை. விழித்தபோது வீட்டில் இருந்தேன். என் ட்ரூப்பில் இருந்தவர்கள் என்னை ஆஸ்பத்திரிக்குக் கூட்டிட்டுப் போய் சிகிச்சை அளித்திருக்கிறார்கள்''என அவர் வாக்குமூலம் கொடுத்திருக்கிறார். இவர் முகத்திலும் காயம் ஏற்பட்டிருந்தது. அவருடைய கேமராவும் பாதிக்கப்பட்டிருக்கிறது. இவரோடு ஹரிபாபுவும் சம்பவ இடத்தில் மயக்க நிலையில்தான் இருந்திருக்கிறார் என்கிறது ஆவணப்படக் குழு. இது உண்மையா?
8. சடலத்தை ஹரிபாபுவின் பெற்றோரிடம் கொடுத்த பொலிஸார், 'உடலை புதைக்கத்தான் வேண்டும். எரிக்கக் கூடாது' என உறுதியாகக் கூறியதாகவும், 'அதையும் மீறி அவர்கள் எரித்துவிட்டதாக' இவ்வழக்கு தொடர்பான பொலிஸின் ஆவணம் சொல்கிறது. பொலிஸார் அவ்வாறு உறுதிபடக் கூறிய பின்பும், சடலம் எரியூட்டப்பட்டது ஏன்? புதைத்திருந்தால், எலும்பு சோதனையில் உண்மை வெளியாகும் என பொலிஸார் விழிப்போடு செயல்பட்டார்கள் என்கிறார்கள். ராஜீவ்காந்தி நடந்து வரும்போது பூ போட்டவர்கள் இடதுபக்கம் நின்றிருந்தார்கள். அவர்கள் இருவரும் முஸ்லிம்கள். இதில் இறந்து போன ஒரு முஸ்லிம் இளைஞரை ஹரிபாபு என நம்ப வைத்துவிட்டார்கள் என்கிறார்கள். இது உண்மையா?
9. படுகொலை சம்பவத்தை புலனாய்வு செய்த அதிகாரிகள் கார்பெட்டின் கீழ், பூ மாலையில் வெடிகுண்டு, பூக்கூடையில் பாம், கடைசியாக மனித வெடிகுண்டு என நான்கு தியரிகளை முன்வைத்தார்கள். இதில், பூ போடுவதற்கான வேலையைச் செய்த சுலைமான் சேட்டிடம், 'நாங்கள் சொல்வதுபடி கேட்காவிட்டால் பூக்கூடையில் பாம் எனக் கதைகட்டிவிடுவோம்' என பொலிஸார் மிரட்டியிருக்கவும் வாய்ப்பு இருக்கிறது. அதனால்தான் இறந்துபோன இஸ்லாமியரின் உடலை 'கிளைம்' செய்வதற்கு யாரும் முன்வரவில்லை. அதையே ஹரிபாபுவின் உடலாக சித்திரித்து வெளியுலகை நம்ப வைத்துவிட்டார்கள். ஓரளவு சிதைந்திருந்த அந்த முகத்தை, பொலிஸாரே முற்றிலும் சிதைத்திருக்கலாம் என்கிறது ஆவணப்படக் குழு.
10. ஜெயின் கமிஷன் மற்றும் வர்மா கமிஷனில் இரண்டு வீடியோக்கள் ஆதாரமாகக் காட்டப்பட்டிருக்கின்றன. அந்த வீடியோக்களில், ராஜீவ்காந்திக்கு மாலை போடும் நேரத்தில் மட்டும் கோளாறு செய்திருக்கிறார்கள். அதாவது அந்தக் காட்சியை மட்டும் அழித்திருக்கிறார்கள். இதுபற்றி நீதிமன்றம் கேட்டபோது, 'நாங்கள் வைத்திருந்தோம். மழை வந்து பூஞ்சை படிந்ததால் அந்தப் பகுதி அழிந்துவிட்டது' என காரணம் சொல்லியிருக்கிறார்கள். இந்த வழக்கில் ஆதாரங்களை அழிப்பதில் கூடுதல் அக்கறை காட்டியிருக்கிறது புலனாய்வுத்துறை என்கிறார்கள் ஆவணப்படத்தை இயக்கிய மருத்துவர்கள்.
இந்நிலையில் இணைய உலகில் 'பைபாஸ்' படத்தை பொதுமக்கள் பார்வையிடுவதற்காக பதிவேற்றியுள்ளார்கள் ஆவணப்படக் குழுவினர். ஈரோட்டில், கலர் பலூன்களோடு இவ் ஆவணப்படத்தின் சி.டியை மேகக் கூட்டங்களோடு கலக்க வைத்தனர். 1991ஆம் ஆண்டு இதேநாள் இரவில்தான் (மே 21) மனித வெடிகுண்டுக்கு பலியானார் ராஜீவ்காந்தி. நன்றி வீரகேசரி
23/05/2016 பாடசாலை விடுதியொன்றில் இடம்பெற்ற தீ விபத்தில் 17 மாணவிகள் உடல் கருகிப்பலியான சம்பவமொன்று தாய்லாந்தில் இடம்பெற்றுள்ளது.
தாய்லாந்தின் சியாங் ராய் மாகாணத்திலுள்ள வியாங் பா பாவ் மாவட்டத்திலுள்ள பிதாகியட்ர் வித்யா என்ற பாடசாலை விடுதியிலேயே இச் சம்பவம் இடம்பெற்றுள்ளது.
குறித்த பாடசாலையில் பழங்குடியினத்தை சேர்ந்த 6 முதல் 13 வயது வரையிலான மாணவிகள் கல்விபயின்று வருகின்றனர்.
அந்தப் பாடசாலை வளாகத்தில் மாணவிகளுக்கான தங்குமிட விடுதி அமைந்துள்ளது.
அந்த விடுதியில் 38 மாணவிகள் தங்கியிருந்தனர். இந்நிலையில் நேற்று இரவு திடீரென விடுதியில் தீ விபத்து ஏற்பட்டது.
அப்போது விழித்திருந்த மாணவிகள் அலறியடித்துக் கொண்டு வெளியே ஓடி வந்ததால் தப்பித்துக் கொண்டனர். நித்திரையில் இருந்த மாணவிகள் தீயில் சிக்கிக் கொண்டனர்.
இந்த விபத்தில் 17 மாணவிகள் உடல் கருகிப் பலியாகியுள்ளதுடன் 5 பேர் காயமடைந்துள்ளனர். மேலும் 2 மாணவிகளை காணவில்லை என அந்நாட்டு பொலிஸார் தெரிவித்துள்ளனர்.
சம்பவ இடத்திற்குச் சென்ற தீயணைப்பு படையினர் போராடி தீயை கட்டுப்பாட்டுக்குள் கொண்டு வந்தனர்.
மீட்பு பணிகள் நேற்று இரவு முதல் இன்று காலை வரை இடம்பெற்றமை குறிப்பிடத்தக்கது. நன்றி வீரகேசரி
500 மதுபான சாலைகள் மூடப்பட்டன : தேர்தல் வாக்குறுதிகளை நிறைவேற்ற தொடங்கினார் ஜெ.
23/05/2016 தமிழக முதல்வராக 6 ஆவது முறையாக பதியேற்றுள்ள முதல்வர் ஜெயலலிதா தனது தேர்தல் வாக்குறுதிகளை நிறைவேற்றும் வகையில் தனது பதவி பிரமாணத்தின் பின்னர் புதிய கோப்புகளில் கையெழுத்திட்டுள்ளார்.
விவசாய கடன் தள்ளுபடி, மதுபான சாலைகள் குறைப்பு உள்ளிட்ட உத்தரவுகள் அடங்கிய 5 கோப்புகளில் முதல்வர் ஜெயலலிதா கையெழுத்திட்டார்.
இது தொடர்பாக அரசு வெளியிட்ட செய்திக் குறிப்பில் தெரிவிக்கப்பட்டுள்ளதாவது,
தமிழக முதல்வராக ஆறாவது முறையாக இன்று (23.5.2016) ( நேற்று) பதவியேற்றுக்கொண்ட ஜெயலலிதா, சென்னை புனித ஜார்ஜ் கோட்டையில் அமைந்துள்ள தலைமைச்செயலகத்தில் உள்ள முதலமைச்சர் அறைக்கு வருகை தந்து தமது பணியைத் தொடங்கினார்.
முதல்வர் ஜெயலலிதா தனது முதல் பணியாக அனைத்திந்திய அண்ணா திராவிட முன்னேற்றக்கழகத்தின் தேர்தல் அறிக்கையில் அறிவிக்கப்பட்ட வாக்குறுதிகளை நிறைவேற்றும் வகையில் முக்கியத் திட்டங்களுக்கு ஒப்புதல் அளித்து அதற்குரிய கோப்புகளில் கையெழுத்திட்டார்.
முதல்வர் ஜெ. ஜெயலலிதா ஆணை பிறப்பித்து முதல் கையொப்பமிட்ட கோப்புகள்:
பயிர்க்கடன் தள்ளுபடி
1) வேளாண் பெருமக்களின் நலன் காக்கும் வகையில், கூட்டுறவு வங்கிகளுக்கு சிறு, குறு விவசாயிகள் செலுத்தவேண்டிய பயிர்க்கடன், நடுத்தர காலக்கடன் மற்றும் நீண்ட காலக்கடன் ஆகிய அனைத்தும் தள்ளுபடி செய்யப்படும் என்னும் வாக்குறுதியை நிறைவேற்றும் வகையில், கூட்டுறவு வங்கிகளிடமிருந்து 31.3.2016 வரை சிறு, குறு விவசாயிகளால் பெறப்பட்ட பயிர்க்கடன், நடுத்தரகாலக் கடன் மற்றும் நீண்டகாலக் கடன் ஆகிய அனைத்தையும் தள்ளுபடி செய்து உத்தரவிடும் கோப்பில் முதல்வர் ஜெயலலிதா கையொப்பமிட்டார். இதன் காரணமாக அரசுக்கு 5780 கோடி ரூபாய் செலவு ஏற்படும்.
மின் கட்டணச் சலுகை
2) மின்சாரம் அனைவருக்கும் மிகவும் அத்தியாவசியமான ஒன்று என்பதால் தற்போதைய கணக்கீட்டு முறைப்படி 100 யூனிட் மின்சாரம் கட்டணம் ஏதுமில்லாமல் வீடுகளுக்கு வழங்கப்படும் என்ற வாக்குறுதியை நிறைவேற்றும் வகையில், அதற்கான கோப்பில் முதல்வர் ஜெயலலிதா கையெழுத்திட்டார். இதன் காரணமாக அரசு ஆண்டு ஒன்றுக்கு கூடுதலாக 1607 கோடி ரூபாய் மின் வாரியத்திற்கு மானியமாக வழங்கும். இந்தச் சலுகை 23.5.2016 முதல் நடைமுறைப்படுத்தப்படும்.
திருமண உதவித் திட்டம்
3) 2011-ஆம் ஆண்டு தேர்தல் அறிக்கையில் கொடுத்த வாக்குறுதியின்படி, இளநிலைப்பட்டம் அல்லது டிப்ளமோ பட்டயம் பெற்ற பெண்களுக்கு திருமண உதவித்தொகையாக 50000 ரூபாயும் திருமாங்கல்யம் செய்ய 4 கிராம் தங்கமும் தற்போது வழங்கப்பட்டு வருகிறது. படித்த ஏழைப்பெண்களுக்கு திருமண நிதி உதவியாக 25000 ரூபாய் நிதி உதவியுடன் திருமாங்கல்யம் செய்ய 4 கிராம் தங்கம் வழங்கப்படுகிறது.
தற்போதைய தேர்தல் அறிக்கையில் கொடுக்கப்பட்ட வாக்குறுதியின்படி அனைத்து திருமண நிதி உதவி திட்டங்களின் கீழ் வழங்கப்படும்நிதி உதவியுடன் திருமாங்கல்யத்திற்கென வழங்கப்படும் தங்கம் 4 கிராம் என்பதிலிருந்து ஒரு பவுண் அதாவது 8 கிராம் என உயர்த்தி வழங்கும் கோப்பில் முதல்வர் ஜெயலலிதா கையொப்பமிட்டார்.
நெசவாளர்களுக்கு மின் கட்டண சலுகை
4) தேர்தல் அறிக்கையில் கொடுத்த வாக்குறுதியின்படி கைத்தறி நெசவாளர்களுக்கு தற்போது கட்டணமில்லாமல் வழங்கப்படும் மின்சாரத்தை 200 யூனிட்கள் எனவும், விசைத்தறிக்கு வழங்கப்படும் கட்டணமில்லா மின்சாரத்தை 750 யூனிட்டுகளாக உயர்த்தியும் வழங்கும் கோப்பில் முதல்வர் ஜெயலலிதா கையொப்பமிட்டார்.
மதுபான சாலைகளின் பாவணை நேரம் குறைப்பு
5) மதுவிலக்கு படிப்படியாக அமுல் படுத்தப்பட்டு பூரண மதுவிலக்கு என்ற நிலை எய்தப்படும் என்றும், அதனை நிறைவேற்றும் வகையில் முதலில் சில்லறை மதுபானக் கடைகள் திறந்திருக்கும் நேரம் குறைக்கப்படும் என்றும், கடைகளின் எண்ணிக்கை குறைக்கப்படும் என்றும், பின்னர் சில்லறை மதுபானக் கடைகளுடன் இணைந்த பார்கள் மூடப்படும் என்றும் குடிப்பழக்கத்திற்கு உள்ளாகி உள்ளோரை மீட்பதற்கான மீட்பு நிலையங்கள் ஏற்படுத்தப்படும் என்றும், இவை அனைத்தும் செயற்படுத்தப்பட்டு படிப்படியாக பூரண மதுவிலக்கு என்னும் இலட்சியம் அடையப்படும் என்றும் தேர்தல் அறிக்கையில் முதல்வர் ஜெயலலிதா தெரிவித்திருந்தார்.
அந்த வாக்குறுதியை நிறைவேற்றும் வகையில் மதுபான சில்லறை விற்பனை மதுபானக்கடைகள் மற்றும் அவற்றுடன் இணைந்த பார்கள் இதுவரை காலை 10 மணி முதல் இரவு 10 மணி வரை இயங்கிவரும் நிலையில் 24.5.2016 முதல் சில்லறை விற்பனை மதுபானக்கடைகள் மற்றும் பார்கள் நண்பகல் 12 மணியிலிருந்து இரவு 10 மணி வரை இயங்கும் என்ற உத்தரவு, மற்றும் 500 சில்லறை மதுபானக்கடைகள் மூடப்படும் என்ற உத்தரவு, ஆகியவற்றுக்கான கோப்பில் முதல்வர் ஜெயலலிதா கையொப்பமிட்டார். நன்றி வீரகேசரி
ஆஸ்திரிய ஜனாதிபதி தேர்தலில் சுயேச்சை வேட்பாளர் வெற்றி
25/05/2016 ஆஸ்திரிய ஜனாதிபதி தேர்தலில் சுயேச்சை வேட்பாளரான அலெக்ஸாண்டர் வான் டெர் பெலென் குறைந்த வாக்குகள் வித்தியாசத்தில் வென்றுள்ளார்.
இந்தத் தேர்தலில் அவர் 50.3 சதவீத வாக்குகளைப் பெற்று, 49.7 சதவீத வாக்குகளைப் பெற்ற வலது சாரி விடுதலைக் கட்சியின் வேட்பாளர் நோர்பேர்ட் ஹொபெரை தோற்கடித்துள்ளார். அளிக்கப்பட்ட 4.64 மில்லியன் வாக்குகளில் 31,000 வாக்குகள் வித்தியாசத்தில் நோர்பேர்ட் ஹொபெரை விடவும் அவர் முன்னிலையில் உள்ளார்.
நோர்பேர்ட் ஹொபெர் மேற்படி தேர்தலிலான தோல்வியை ஒப்புக் கொண்டுள்ளார். அவர் வெற்றி பெற்றிருப்பின் ஆஸ்திரியாவின் முதலாவது வலது சாரி தலைவராக இருப்பார் என்பது குறிப்பிடத்தக்கது.
அலெக்ஸாண்டரின் வெற்றியானது ஐரோப்பிய அரசியல்வாதிகளுக்கு ஆறுதல் அளிப்பதாக உள்ளதாக ஜேர்மன் வெளிநாட்டு அமைச்சர் மானுவேல் வல்லெஸ் தெரிவித்தார்.
குடியேற்றவாசிகளுக்கு எதிரான கொள்கையைக் கொண்ட ஹொபெர் வெற்றி பெற்றிருந்தால், அது பல ஐரோப்பிய நாடுகளில் தேசியவாத மற்றும் குடியேற்றத்துக்கு எதிரான கட்சிகளின் எழுச்சிக்கு வித்திடுவதாக அமையும் என அஞ்சப்பட்டது.
தேர்தல் வெற்றியையடுத்து ஆதரவாளர்கள் மத்தியில் உரையாற்றிய ஐரோப்பிய ஒன்றிய ஆதரவு வேட்பாளரான அலெக்ஸாண்டர் (72 வயது), மக்களின் பயம் மற்றும் சினத்தை செவிமடுக்கப் போவதாக சூளுரைத்துள்ளார்.
அதற்கு வேறுபட்ட பேச்சுவார்த்தைக் கலாசாரமும் அரசியல் முறைமையும் தேவையாகவுள்ளதாக குறிப்பிட்ட அவர், நோர்பேர்ட் ஹொபெரின் வாக்காளர்களது நம்பிக்கையையும் வென்று அனைத்து ஆஸ்திரிய மக்களுக்குமான கட்சி சார்பற்ற ஜனாதிபதியாக சேவையாற்ற விரும்புவதாக கூறினார்.
குடியேற்றவாசிகளான ரஷ்ய தந்தைக்கும் எஸ்தோனிய தாயாருக்கும் வியன்னாவில் பிறந்தவரான அலெக்ஸாண்டர் வான் டெர் பெலென், தன்னை ஒரு சிறுவர் அகதியாக குறிப்பிட்டுள்ளார். நன்றி வீரகேசரி
விமானம் விழுந்த இடத்திலிருந்து துண்டுதுண்டுகளாக சிதறிய 80 மனித எச்சங்கள் மீட்பு.!
25/05/2016 எகிப்துஎயார் எம்.எஸ்.804 விமானம் மத்தியதரைக் கடலில் விழுந்த இடத்திலிருந்து பெறப்பட்ட மனித எச்சங்கள் அந்த விமானத்தில் பாரிய வெடிப்பு இடம்பெற்றுள்ளமையை எடுத்துக்காட்டுவதாகவுள்ளதாக எகிப்திய தடயவியல் அலுவலகத்தைச் சேர்ந்த அதிகாரியொருவரை மேற்கோள் காட்டி ஏ.பி. ஊடகம் செவ்வாய்க்கிழமை செய்தி வெளியிட்டுள்ளது.
அந்த விமானம் கடந்த 19 ஆம் திகதி 66 பேருடன் மத்தியதரைக் கடலில் விழுந்ததையடுத்து மேற்கொள்ளப்பட்ட தேடுதல் நடவடிக்கையின் போது இதுவரை ஒரு கரம் அல்லது ஒரு கால் என்ற ரீதியில் சுமார் 80 உடல் பாகங்கள் துண்டு துண்டுகளாக சிதறிய நிலையில் மீட்கப்பட்டுள்ளன.
இதன்போது முழுமையாக எந்த உடலும் மீட்கப்படாத நிலையில் அவ்வாறு உடல்கள் சிதறியமைக்கு விமானத்தில் இடம்பெற்ற பாரிய வெடிப்பே காரணமாக இருக்கலாம் என நம்பப்படுவதாக அந்த அதிகாரி தெரிவித்துள்ளார்.
எனினும் மேற்படி தகவலுக்கு அந்நாட்டு நீதி அமைச்சின் தடயவியல் திணைக்களத் தலைவர் மறுப்புத் தெரிவித்துள்ளார்.
மேற்படி தகவல் வெளியாவதற்கு முதல் நாள் எகிப்திய அரசாங்கத்தால் செயற்படுத்தப்படும் வானில் பறக்கும் விமானங்களின் இடத்தைக் கண்டறியும் வேவையை வழங்கும் ஸ்தாபனத்தின் தலைவர், அந்த விமானம் ஏற்கனவே கிரேக்க பாதுகாப்பு அமைச்சரால் தெரிவிக்கப்பட்டது போன்று திரும்பலடையவோ அல்லது சடுதியாக செங்குத்தாக விழவோ இல்லை என தெரிவித்திருந்தமை குறிப்பிடத்தக்கது.
இந்நிலையில் அந்த விமானத்தில் பயணித்தவர்களின் உடல் பாகங்களை அடையாளம் காண மரபணு பரிசோதனைகளை மேற்கொள்ள நடவடிக்கை எடுக்கப்பட்டுள்ளதாக க கூறப்படுகிறது. நன்றி வீரகேசரி
பாப்பரசர் - கெய்ரோ பள்ளிவாசல் இமாம் சந்திப்பு
25/05/2016 பாப்பரசர் பிரான்சிஸ், எகிப்திய கெய்ரோ நகரிலுள்ள அல்–அஸார் பெரிய பள்ளிவாசலின் இமாமான ஷெய்க் அஹ்மெட் அல்–தாயிப்பை ஞாயிற்றுக்கிழமை வத்திக்கானில் சந்தித்து உரையாடியுள்ளார்.
ரோமன் கத்தோலிக்க திருச்சபைக்கும் பள்ளிவாசலுக்குமிடையிலான பேச்சுவார்த்தைகள் தொடர்பான 5 வருட கால தாமதத்தையடுத்து இந்த முக்கியத்துவம் மிக்க சந்திப்பு இடம்பெற்றுள்ளது.
இதன்போது இரு மதத் தலைவர்களும் மத்தியகிழக்கில் நிலவும் முஸ்லிம்களுக்கும் கிறிஸ்தவர்களுக்குமிடையிலான பதற்றநிலை குறித்து கலந்துரையா டியுள்ளனர். இமாம் ஷெய்க் அஹ்மெட் அல்–தாயிப் பிரான்ஸின் பாரிஸ் நகரில் இடம்பெறும் முஸ்லிம்களும் கத்தோலிக்கர்களும் கலந்து கொள்ளும் கூட்டமொன்றுக்கு செல்லும் வழியிலேயே பாப்பரசருடனான சந்திப்பை மேற்கொண்டுள்ளார்.
இதற்கு முன் பாப்பரசராக இருந்த 16 ஆம் ஆசீர்வாதப்பரால் தெரிவிக்கப்பட்ட முஸ்லிம்கள் தொடர்பில் எதிர்மறையான கருத்தைக் கொண்டதென கூறப்படும் விமர்சனமொன்றையடுத்து 2011 ஆம் ஆண்டில் இரு தரப்பு சந்திப்புகளும் ஸ்தம்பிதமடைந்தமை குறிப்பிடத்தக்கது. நன்றி வீரகேசரி
மல்லையாவின் தண்டனை அறிவிப்பு ஒத்திவைப்பு.!
26/05/2016 காசோலை மோசடி வழக்கில் தொழிலதிபர் விஜய் மல்லையாவுக்கு அளிக்கப்படவுள்ள தண்டனை விவரங்கள் மீதான விசாரணையை ஜூன் 6ஆம் திகதிக்கு ஹைதரபாத் நகர நீதிமன்றம் ஒத்திவைத்துள்ளது.
ஹைதராபாதில் உள்ள ராஜீவ்காந்தி சர்வதேச விமான நிலையத்தை ஜி.எம்.ஆர். விமான நிறுவனம் குத்தகைக்கு எடுத்துள்ளது. இந்த விமான நிலையத்தில் தங்கள் விமானங்களை நிறுத்துவதற்காக ஒரு குறிப்பிட்ட தொகையை கிங்ஃபிஷர் நிறுவனம் ஜி.எம்.ஆர். விமான நிறுவனத்துக்கு கொடுத்து வந்தது.
இந்நிலையில், கடந்த சில மாதங்களுக்கு முன்பு கிங்ஃபிஷர் நிறுவனம் சார்பில் வழங்கப்பட்ட தலா 50 இலட்சம் ரூபா மதிப்பிலான இரு காசோலைகள், வங்கியில் பணம் இல்லாமல் திரும்பின.
இதுகுறித்து ஹைதராபாத் நகர நீதிமன்றத்தில் ஜி.எம்.ஆர். நிறுவனம் வழக்கு தொடுத்தது. இந்த வழக்கை கடந்த ஏப்ரல் மாதம் 20 ஆம் திகதி விசாரித்த நீதிமன்றம், கிங்ஃபிஷர் நிறுவனத்தின் தலைவர் விஜய் மல்லையாவை குற்றவாளியாக அறிவித்தது.
மேலும், அவருக்கு எதிராக பிணையில் வெளிவர முடியாத பிடியாணையையும் பிறப்பிக்கப்பட்டது. அப்போது, விஜய் மல்லையாவுக்கான தண்டனை விவரங்களை மே 5 ஆம் திகதி அறிவிப்பதாக நீதிபதி தெரிவித்திருந்தார். ஆனால், அன்றைய தினம் விஜய் மல்லையா ஆஜராகாததால் மே 9 ஆம் திகதிக்கு உத்தரவு ஒத்திவைக்கப்பட்டது. குற்றவியல் நடைமுறைச் சட்டத்தின் 353 ஆவது பிரிவின்படி (குற்றவாளி நீதிமன்றத்தில் ஆஜராகாதபோதும் தண்டனை அறிவித்தல்) அன்றைய தினம் தண்டனை வழங்கப்படும் என்றும் நீதிபதி தெரிவித்திருந்தார்.
ஆனால், அந்த வழக்கு ஹைதராபாத் நீதிமன்றத்தில் கடந்த 9 ஆம் திகதி விசாரணைக்கு வந்தபோது,"தீர்ப்பை அறிவிப்பதற்கு முன்பாக குற்றவாளி தரப்பு வாதத்தையும் கேட்டறிய வேண்டியது அவசியமாகிறது' எனக் கூறிய நீதிபதி தீர்ப்பு விவரத்தை நேற்று அறிவிப்பதாகத் தெரிவித்தார். இதைத்தொடர்ந்து, தண்டனை விவரம் நேற்று வெளியாகலாம் என எதிர்பார்க்கப்பட்ட நிலையில், அதன் மீதான உத்தரவை ஜூன் 6 ஆம் திகதிக்கு நீதிபதி மீண்டும் ஒத்திவைத்துள்ளார். நன்றி வீரகேசரி
வரலாற்று சாதனை படைத்த பராக் ஒபாமா.!
27/05/2016 அமெரிக்காவின் ஜனாதிபதியாக பதவி வகிக்கும்போதே போரின் நினைவுச் சின்னமான ஹிரோஷிமாவிற்கு விஜயம் செய்த முதல் அமெரிக்க ஜனாதிபதியாக பராக் ஒபாமா வரலாற்றில் பதியப்பட்டுள்ளார்.
இரண்டாம் உலகப்போரின்போது, ஹிரோஷிமாவில் 1945 ஆம் ஆண்டு ஆகஸ்ட் மாதம் 6 ஆம் திகதி வீசப்பட்ட அணுகுண்டினால் ஒரு இலட்சத்து 40 ஆயிரம் பேர் குறித்த அதே வருடத்தில் உயிரிழந்தனர்.
இதேவேளை, ஜி 7 மாநாட்டில் கலந்து கொள்வதற்காகச் சென்ற பராக் ஒபாமா முதலாவது அணுகுண்டு வீசப்பட்ட பகுதியான ஹிரோஷிமாவிற்கு இன்று விஜயம் செய்துள்ளார்.
அங்கு, அவருடன் அமெரிக்க வெளியுறவுத்துறை செயலாளர் ஜான் கெர்ரி, இங்கிலாந்து உள்ளிட்ட ஜி-7 நாடுகளை சேர்ந்த வெளியுறவுத்துறை மந்திரிகள் மற்றும் ஜப்பான் வெளியுறவுத்துறை புமியோ கிஷிடா ஆகியோரும் மலர்வளையம் வைத்து அஞ்சலி செலுத்தினார்கள். நன்றி வீரகேசரி
