அரசியல் கைதிகளுக்கு பிணை வழங்க முடிவு : பிரதமர் தலைமையிலான கூட்டத்தில் தீர்மானம்
முஸ்லிம்கள் வெளியேற்றப்பட்மை தொடர்பாக ஐ.நா.வில் விசாரணை நடத்த வேண்டும்
உறுகாமம் குளத்தின் இரண்டு வான்கதவுகள் திறப்பு
அமைச்சர் மனோவுடன் இலங்கைக்கான கனடிய உயர் ஸ்தானிகர் சந்திப்பு
கே.பி. குறித்து 4 விசாரணை அறிக்கைகள்
அரசியல் கைதிகளுக்கு பிணை வழங்க முடிவு : பிரதமர் தலைமையிலான கூட்டத்தில் தீர்மானம்
27/10/2015 தடுத்துவைக்கப்பட்டுள்ள தமிழ் அரசியல் கைதிகளை பிணையில் விடுவிப்பது என்று பிரதமர் ரணில் விக்கிரமசிங்க தலைமையில் நேற்று நடைபெற்ற உயர்மட்டக் குழுக் கூட் டத்தில் தீர்மானம் எடுக்கப்பட்டுள்ளது. இதற்கான நடவடிக்கைகளை அடுத்த மாத முதல் வார முடிவுக்குள் எடுப்பதற்கும் முடிவு செய்யப்பட்டுள்ளது.
தமிழ் அரசியல் கைதிகளின் விடுதலை தொடர்பில் பிரதமர் ரணில் விக்கிரமசிங்க தலைமையில் நேற்று மாலை உயர்மட்டக் கூட்டம் இடம்பெற்றது. அலரி மாளிகையில் நடைபெற்ற இந்தக் கூட்டத்தில் சட்டம் ஒழுங்கு சிறைச்சாலைகள் மறுசீரமைப்பு அமைச்சர் திலக் மாரப்பன, தேசிய கலந்துரையாடல்கள் அமைச்சர் மனோ கணேசன், புனர்வாழ்வு மீள்குடியேற்ற அமைச்சர் டி.எம்.சுவாமிநாதன், பொலிஸ் மா அதிபர் என்.இலங்கக்கோன், பிரதி சட்ட மா அதிபர் உட்பட அதிகாரிகள் கலந்துகொண்டனர்.
இந்தக் கூட்டத்தில் சிறைச்சாலைகளில் தடுத்துவைக்கப்பட்டுள்ள தமிழ் அரசியல் கைதிகளின் விபரங்கள் குறித்தும் அவர்களது வழக்கு விசாரணை தொடர்பான நிலவரங்கள் தொடர்பாகவும் விரிவாக ஆராயப்பட்டது. தற்போதைய நிலையில் தமிழ் அரசியல் கைதிகளை பொதுமன்னிப்பின் அடிப்படையில் விடுவிக்க முடியாது. இதற்கான சாத்தியப்பாடுகள் இல்லை. இதனால் சிறைச்சாலைகளில் தடுத்து வைக்கப்பட்டுள்ள நிலையில் விசாரணையின்றி உள்ள கைதிகளையும் வழங்குகள் தாக்கல் செய்யப்பட்டுள்ள கைதிகளையும் பிணையில் விடுவிப்பது என்று தீர்மானம் எடுக்கப்பட்டுள்ளது. நவம்பர் முதல் வார முடிவுக்கு இதற்கான நடவடிக்கைகளை எடுப்பதற்கு முடிவாகியது.
இதுகுறித்து கூட்டத்தில் கலந்துகொண்ட தேசிய கலந்துரையாடல் அமைச்சர் மனோ கணேசன் கருத்துத் தெரிவிக்கையில், சிறைச்சாலைகளில் தடுத்துவைக்கப்பட்டுள்ள தமிழ் அரசியல் கைதிகளின் விடுதலை குறித்து பிரதமர் தலைமையிலான கூட்டத்தில் ஆராயப்பட்டது. கைதிகளுக்கு தற்போதைய நிலையில் பொது மன்னிப்பு வழங்க முடியாது என்பதனால் அவர்களை பிணையில் விடுவதற்கு தீர்மானிக்கப்பட்டுள்ளது. என்று தெரிவித்தார்.
தம்மை விடுவிக்கக் கோரி தமிழ் அரசியல் கைதிகள் சாகும் வரையிலான உண்ணாவிரதப் போராட்டத்தினை நடத்திய நிலையில் அடுத்த மாதம் ஏழாம் திகதிக்குள் தமிழ் அரசியல் கைதிகளின் விடுதலை குறித்து தீர்க்கமான நடவடிக்கை எடுக்கப்படும் என்று ஜனாதிபதி மைத்திரிபால சிறிசேன உறுதியளித்திருந்தார்.
இந்த உறுதி மொழியினை கூட்டமைப்பின் தலைவர் இரா.சம்பந்தன் சிறைச்சாலைக்குச் சென்று தமிழ் அரசியல் கைதிகளிடம் தெரிவித்ததையடுத்தே அவர்கள் தமது போராட்டத்தை கைவிட்டனர். இந்த நிலையில் கடந்த 19 ஆம் திகதி பிரதமர் ரணிலய் விக்கிரமசிங்க தலைமையில் கைதிகளின் விவகாரம் குறித்து முதலாவது உயர்மட்டக் கூட்டம் இடம்பெற்றது.
இதனையடுத்தே நேற்றைய தினம் இரண்டாவது விசேட கூட்டம் நடத்தப்பட்டு கைதிகளை பிணையில் விடுப்பதற்கான தீர்மானம் எடுக்கப்பட்டுள்ளமை குறிப்பிடத்தக்கதாகும். நன்றி வீரகேசரி
முஸ்லிம்கள் வெளியேற்றப்பட்மை தொடர்பாக ஐ.நா.வில் விசாரணை நடத்த வேண்டும்
27/10/2015 வடக்கிலிருந்து முஸ்லிம்கள் வெளியேற்றப்பட்டமை தொடர்பாக ஐ.நா விசாரிக்க வேண்டும் என தேசிய சமாதானப் பேரவை வலியுறுத்தியுள்ளது.
வடமாகாண முஸ்லிம்களின் 25வது வருட வெளியேற்றத்தையிட்டு தேசிய சமாதானப் பேரவை வெளியிட்டுள்ள விசேட அறிக்கையிலேயே மேற்படி கோரிக்கை விடுக்கப்பட்டுள்ளது.
தேசிய சமாதானப் பேரவையின் அறிக்கையில் மேலும் விவரிக்கப்பட்டுள்ளதாவது,
ஐக்கிய நாடுகள் மனித உரிமைகள் பேரவையின் விசாரணை அறிக்கை 2002 ஆண்டு முதல் 2009 வரையான காலத்தை மட்டுப்படுத்தியிருக்கின்றது.
ஆனாலும், இந்தக் காலப்பகுதியோடு மாத்திரம் அதன் விசாரணைகள் நின்று விடாது 1990 ஆம் ஆண்டு வடக்கு மாகாணத்தில் வாழ்ந்த சுமார் 90 ஆயிரம் முஸ்லிம்களின் வெளியேற்றம் பற்றியும் யுத்தத்தின் காரணமாக இடம்பெற்ற இன்னும் பல தீவிர மனித உரிமை மீறல்கள் பற்றியும் பின்னோக்கி விசாரிக்கப்பட வேண்டும் என தேசிய சமாதானப் பேரவை கருதுகின்றது.
இந்த ஒக்ரோபர் மாதத்துடன் வடக்கில் வாழ்ந்த முஸ்லிம் குடி மக்கள் தமிழீழ விடுதலைப் புலிகளால் ஒட்டுமொத்தமாக வெளியேற்றப்பட்ட 25 ஆவது ஆண்டு நிறைவடைகிறது.
வெளியேற்றப்பட்டவர்களில் 80 சதவீதமானோர் தங்களது பூர்வீக வாழ்விடங்களுக்கு வெளியே தொடர்ந்தும்வாழ்ந்து கொண்டிருக்கின்றார்கள்.
எனினும், இலங்கை மக்களில் ஒரு பிரிவினராகிய இவர்கள் எதிர்நோக்கும் இந்தப் பிரச்சினைக்கு பொது கவனம் அல்லது முன்னுரிமை கொடுக்கப்பட்டு ஒரு நீதியான தீர்வு இதுவரைக் கிட்டவில்லை.
இலங்கையில் நல்லிணக்க, பொறுப்புக் கூறல் மற்றும் மனித உரிமைகளை மேம்படுத்துவதற்காக ஐ.நா. மனித உரிமைகள் சபையின் தீர்மானம் இலங்கை ஏற்கொண்ட இணை ஆதரவாளரைக் கொண்ட அரசாங்கத்தின் முடிவு நாட்டின் இந்தப் பிரச்சனைக்கு தீர்வு காண்பதற்கான ஒரு வாய்ப்பை வழங்குகின்றது.
இன்று கூட, ஆறு ஆண்டுகள் போர் முடிவுக்கு வந்த பிறகும் 1990 ஆம் ஆண்டு ஒரு பெரும் தொகையினராக வெளியேற்றப்பட்ட முஸ்லீம் மக்கள் தற்காலிக வதிவிடங்களில் வாழ்ந்து கொண்டிருப்பது நாட்டில் நீதி மற்றும் நல்லிணக்க செயல்முறையிலுள்ள ஒரு குறைபாடாகவும் குற்றச்சாட்டாகவும் உள்ளது.
இடம்பெயர்ந்த முஸ்லிம்களின் சமீபத்திய மீள்குடியேற்றம் வில்பத்து தேசிய புங்கா அத்து மீறல் என்று சர்ச்சைக்குரிய அத்துமீறலாகக்காட்டப்பட்டுள்ளது.
மனித உரிமைகள் சபையின் விசாரணை அறிக்கை 2002-09 வரை மட்டுப்படுத்தப்பட்ட காலமாக இருப்பதால் அதற்கு முன்னுள்ள காலப்பகுதியும் விசாரணைக்காக சேர்க்கப்பட வேண்டும் என்று தெரிவிக்கப்பட்டுள்ளது. நன்றி வீரகேசரி
உறுகாமம் குளத்தின் இரண்டு வான்கதவுகள் திறப்பு
அமைச்சர் மனோவுடன் இலங்கைக்கான கனடிய உயர் ஸ்தானிகர் சந்திப்பு
கே.பி. குறித்து 4 விசாரணை அறிக்கைகள்
கே.பி.யை. கைது செய்து அவருக்கு எதிராக சட்ட நடவடிக்கை எடுக்குமாறு வலியுறுத்தி மக்கள் விடுதலை முன்னணியின் விஜித்த ஹேரத் தாக்கல் செய்த மனு நேற்று மேன் முறையீட்டு நீதிமன்றின் தலைமை நீதிபதி விஜித் மலல்கொட முன்னிலையில் விசாரணைக்கு எடுத்துக்கொள்ளப்பட்டது இதன்போதே சட்ட மா அதிபர் சார்பில் மன்றில் ஆஜரான மேலதிக சொலிசிற்றர் ஜெனரல் ஜயந்த ஜயசூரிய இந்த விடயத்தை மன்றுக்கு தெரியப்படுத்தினார்.
28/10/2015 மட்டக்களப்பு உறுகாமம் குளத்தின் இரண்டு வான்கதவுகள் திறக்கப்பட்டுள்ளதாக நீர்ப்பாசனத் திணைக்களத்தின் மட்டக்களப்பு மாவட்ட பணிப்பாளர் எஸ்.மோகனராஜா தெரிவித்தார்.
கிழக்கு மாகாணத்தில் கடந்த 5 தினங்களாக மழை பெய்து வருகின்ற நிலையில் மட்டக்களப்பு மாவட்டத்தில் உறுகாமம் குளத்தின் 2 வான்கதவுகள் திறக்கப்பட்டுள்ளது. இதிலிருந்து 3 அங்குலம் நீர்பாய்வதாக நீர்ப்பாசனத் திணைக்களத்தின் மட்டக்களப்பு மாவட்ட பணிப்பாளர் குறிப்பிட்டார்.
இந்த குளத்தின் 2 வான்கதவுகள் திறக்கப்பட்டுள்ளதால் இந்த குளத்தினை அண்டியுள்ள முந்தனையாறு நிரம்பிக் காணப்படுவதாகவும் இதே நேரம் மட்டக்களப்பு மாவட்டத்திலுள்ள எந்தவொரு குளத்திற்கும் இதுவரை பிரச்சினை இல்லை எனவும் தொடாச்சியாக எமது திணைக்கள அதிகாரிகளினால் குளங்கள் அவதானிக்கப்பட்டு வருவதாகவும் அவர் மேலும் குறிப்பிட்டார். நன்றி வீரகேசரி
அமைச்சர் மனோவுடன் இலங்கைக்கான கனடிய உயர் ஸ்தானிகர் சந்திப்பு
28/10/2015 தேசிய கலந்துரையாடல் அமைச்சர் மனோ கணேசனை, இலங்கைக்கான கனடிய உயர் ஸ்தானிகர் ஷெலி வைடிங் சந்தித்து உரையாடியுள்ளார்.
இராஜகிரியவில் அமைந்துள்ள தேசிய கலந்துரையாடல் அமைச்சு அலுவலகத்தில் நடைபெற்ற இந்த சந்திப்பில், கனடிய உயர் ஸ்தானிக அரசியல்துறை பொறுப்பாளர் ஜெனிபர் ஹார்ட், தேசிய கலந்துரையாடல் அமைச்சின் செயலாளர் பேர்ல் வீரசிங்க ஆகியோரும் கலந்துக்கொண்டனர்.
இந்த சந்திப்பு தொடர்பில் அமைச்சர் மனோ கணேசன் தெரிவிக்கையில்,
இனங்களுக்கு இடையிலான சகவாழ்வை மேம்படுத்தும் எனது தேசிய கலந்துரையாடல் அமைச்சின் பொதுவான நடவடிக்கைகளுக்கும் குறிப்பாக தேசிய ஆட்சி மொழி கொள்கையை நடைமுறைபடுத்தும் செயற்பாடுகளுக்கும் கனடிய அரசாங்கத்தால் வழங்கப்படக்கூடிய உத்தேச ஒத்துழைப்புகள், உதவிகள், ஆலோசனைகள் பற்றி இந்த சந்திப்பின் போது உயர் ஸ்தானிகர் ஷெலி வைடிங் எடுத்து கூறினார்.
இதற்கு பதில் அளிக்கும் முகமாக, இந்த அமைச்சுக்கு கனேடிய அரசினால் கடந்த காலத்தில் வழங்கப்பட்ட ஒத்துழைப்புகள் மற்றும் உதவிகள் ஆகியவற்றுக்கு நான் நன்றி தெரிவித்தேன்.
முந்தைய ஆட்சிகளின் போதும் தமிழ் மொழியை சிங்கள மொழியுடன் இணைந்த சக ஆட்சி மொழியாக நடைமுறைபடுத்துவதற்கு அரச கரும மொழிக்கொள்கை, அரச கரும மொழி திணைக்களம், அரச கரும மொழி ஆணைக்குழு மற்றும் அமைச்சுடன் கூடிய அமைச்சரும் இருந்தும் தேவைப்பட்ட அரசியல் உறுதிப்பாடு இல்லாமல் இருந்தது.
இன்று அந்நிலைமை மாறியுள்ளது. என்னிடமும், எமது அரசாங்கத்திடமும் இது தொடர்பில் தேவையான அரசியல் உறுதிப்பாடு இன்று இருக்கின்றது. தற்போது ஒரு மாதமாகவே அமைச்சராக என் கடமைகள் ஆரம்பமாகியுள்ளன. இவைகளின் பலாபலன் விரைவில் நடைமுறையில் தெரிய வரும். கனடாவில் ஆங்கிலம், பிரெஞ்சு மொழிகளுக்கு நடைமுறையில் வழங்கப்பட்டுள்ள சம அந்தஸ்த்துடன் கூடிய சமகால வரலாறு எங்களுக்கு பெரிதும் வழிகாட்டுகிறது.
அரசாங்கத்தின் மொழியுரிமை கொள்கையை நடைமுறை படுத்துவது தொடர்பில் கனேடிய அரசின் கடந்த கால ஒத்துழைப்புகள் மற்றும் உதவிகள் மேலும் அதிகரித்த அளவில் எமது அமைச்சுக்கு வழங்கப்பட வேண்டும் என நான் கேட்டுக்கொண்டேன் என அவர் தெரிவித்தார். நன்றி வீரகேசரி
கே.பி. குறித்து 4 விசாரணை அறிக்கைகள்
29/10/2015 விடுதலைப் புலிகளின் சர்வதேச ஆயுத விநியோகஸ்தரான குமரன் பத்மநாதன் என்ற கே.பி. தொடர்பில் நான்கு விசாரணை அறிக்கைகளை நீதிமன்றுக்கு சமர்ப்பித்துள்ளதாக
சட்ட மா அதிபர் நேற்று மேன்முறையீட்டு நீதிமன்றுக்கு அறிவித்தார்.
கே.பி.யை. கைது செய்து அவருக்கு எதிராக சட்ட நடவடிக்கை எடுக்குமாறு வலியுறுத்தி மக்கள் விடுதலை முன்னணியின் விஜித்த ஹேரத் தாக்கல் செய்த மனு நேற்று மேன் முறையீட்டு நீதிமன்றின் தலைமை நீதிபதி விஜித் மலல்கொட முன்னிலையில் விசாரணைக்கு எடுத்துக்கொள்ளப்பட்டது இதன்போதே சட்ட மா அதிபர் சார்பில் மன்றில் ஆஜரான மேலதிக சொலிசிற்றர் ஜெனரல் ஜயந்த ஜயசூரிய இந்த விடயத்தை மன்றுக்கு தெரியப்படுத்தினார்.
பொலிஸாரினால் மேற்கொள்ளப்பட்ட விசாரணைகளுக்கு அமைவாக இந்த நான்கு விசாரணை அறிக்கைகளும் தயார் செய்யப்பட்டதாகவும் அவை கடந்த ஜூன் 4, ஜூன் 19, ஜூலை 21 மற்றும் ஒக்டோபர் 15 ஆகிய திகதிகளில் மேன் முறையீட்டு மன்றுக்கு சமர்பிக்கப்பட்டுள்ளதாகவும் மேலதிக சொலிசிற்றர் ஜெனரல் ஜயந்த ஜயசூரிய சுட்டிக்காட்டினார்.
விஜித்த ஹேரத் தாக்கல் செய்த ரீட் மனு மீதான விசாரணையில், கே.பி. தொடர்பில் செய்யப்பட்டுள்ள விசாரணை நடவடிக்கை குறித்து அறிக்கை சமர்ப்பிக்க ஏற்கனவே கால அவகாசத்தை மேன் முறையீட்டு மன்று வழங்கியிருந்த நிலையிலேயே நேற்று இந்த வழக்கு விசாரணைக்கு வந்தது. இந் நிலையிலேயே விசாரணை அறிக்கையை மன்றுக்கு தாக்கல் செய்துவிட்டதாக சட்ட மா அதிபர் சார்பில் ஆஜரான மேலதிக சொலிசிற்றர் ஜெனரல் தெரிவித்தார்.
இதனையடுத்து குறித்த விசாரணை அறிக்கைகள் நான்கும் வழக்குக் கோவைக்குள் இல்லாமல் இருப்பது கண்டுபிடிக்கப்பட்டது. இதனையடுத்து உடனடியாக அந்த அறிக்கைகள் நான்கையும் வழக்குக் கோவையில் இணைக்க நீதிவான் உத்தரவிட்டார்.
இந் நிலையில் இது தொடர்பிலான அடுத்த கட்ட விசாரணைகள் நவம்பர் மாதம் 13 ஆம் திகதி இடம்பெறவுள்ளது.அது வரை கே.பி.இற்கு விதிக்கப்பட்டுள்ள பயணத் தடையும் தொடரும் என நீதிமன்றம் அறிவித்தது. நன்றி வீரகேசரி
No comments:
Post a Comment