காசா அழிவுகள்
காசாவில் 48 நாட்கள் நீடித்த போர் நிறுத்தம்; வடக்கு காசா செல்ல இஸ்ரேல் முட்டுக்கட்டை
காசாவில் ஒரே குடும்பத்தின் 50 இற்கும் மேற்பட்டவர்கள் பலி
இஸ்ரேலுடனான உறவை துண்டிக்க தென்னாபிரிக்க எம்.பிக்கள் ஆதரவு
இஸ்ரேலுடன் தொடர்புடைய கப்பலை கடத்தியது ஹூத்தி
காசா அழிவுகள்
கடந்த ஒக்டோபர் 7 தொடக்கம் காசா மீது இஸ்ரேல் நடத்திய தாக்குதல்களில் ஏற்பட்ட அழிவு விபரம்,
• சுமார் 6,000 சிறுவர்கள் மற்றும் 4,000 பெண்கள் உட்பட 14,800க்கும் அதிகமான பலஸ்தீனர்கள் கொல்லப்பட்டனர்.
• 2.3 மில்லியன் மக்கள்தொகை கொண்ட காசாவில் 1.7 மில்லியனுக்கும் அதிகமானோர் வீடுகளை விட்டு இடம்பெயர்ந்தனர்.
• இவ்வாறு இடம்பெயர்ந்து பலஸ்தீனர் அகதிகளுக்கான ஐக்கிய நாடுகள் நிவாரண மற்றும் பணிகள் நிறுவனத்தின் வசதிகளில் அடைக்கலம் பெற்றிருந்த நிலையில் இஸ்ரேலிய தாக்குதல்களில் குறைந்தது 191 பேர் கொல்லப்பட்டனர். மேலும் 798 பேர் காயமடைந்தனர்.
• காசாவில் பாதிக்கும் அதிகமான வீடுகள் அழிக்கப்பட்டு அல்லது சேதமாக்கப்பட்டுள்ளன. இதில் பல டஜன் வழிபாட்டுத் தலங்களும் அடங்கும். போருக்கு முன் வடக்கு காசாவில் 24 மருத்துவமனைகள் இயங்கின. இதில் 22 மருத்துவமனைகள் செயலிழந்தோ அல்லது புதிய நோயாளிகளை அனுமதிக்க முடியாத நிலையிலோ உள்ளன.
• தெற்கு காசாவின் 11 மருத்துவ வசதிகளில் தற்போது எட்டு மாத்திரமே இயங்குகின்றன.
• எரிபொருள், நீர் மற்றும் கோதுமை மா இல்லாதது அல்லது இஸ்ரேலிய தாக்குதலில் சேதமடைந்ததால் காசாவில் எந்த ஒரு பேக்கரியும் இயங்கவில்லை நன்றி தினகரன்
காசாவில் 48 நாட்கள் நீடித்த போர் நிறுத்தம்; வடக்கு காசா செல்ல இஸ்ரேல் முட்டுக்கட்டை
- பணயக்கைதிகள் விடுவிப்பு; உதவி வாகனங்கள் நுழைவு
இஸ்ரேல் மற்றும் ஹமாஸ் இடையிலான தற்காலிக போர் நிறுத்தம் காசாவில் நேற்று அமுலுக்கு வந்த நிலையில், குண்டு வீச்சுகள், பீரங்கி தாக்குதல்கள் மற்றும் ரொக்கெட் தாக்குதல்கள் தொடர்பிலான பாரிய சம்பவங்கள் பதிவாகாதபோதும் போர் நிறுத்த மீறல்கள் தொடர்பில் இரு தரப்பும் பரஸ்பரம் குற்றச்சாட்டுகளை சுமத்தியுள்ளன.
இந்தப் போரின், போர் நிறுத்தம் உள்ளூர் நேரப்படி நேற்றுக் காலை 7 மணிக்கு ஆரம்பமானது. வடக்கு மற்றும் தெற்கில் விரிவான போர் நிறுத்தம் ஒன்று அமுல்படுத்தப்பட்டதோடு ஹமாஸ் அமைப்பின் பிடியில் இருக்கும் பணயக்கைதிகளில் 13 இஸ்ரேலிய பெண்கள் மற்றும் சிறுவர்கள் விடுவிக்கப்பட்டனர். பெரும் அழிவை சந்தித்துள்ள காசாவுக்கு உதவிகள் செல்ல ஆரம்பித்துள்ளன.
இதன்போது கைதிகள் பரிமாற்ற உடன்படிக்கையின்படி இஸ்ரேலிய சிறையில் இருக்கும் பலஸ்தீன கைதிகளும் விடுவிக்கப்படுகின்றனர்.
இந்நிலையில் வடக்கு காசாவில் இஸ்ரேலிய போர் விமானங்களின் செயற்பாடுகளை காணவில்லை என்றும் பலஸ்தீன ரொக்கெட் தாக்குதல்களின் சத்தங்கள் கேட்கவில்லை என்றும் அங்கிருக்கும் ரோய்ட்டர்ஸ் செய்தியாளர் ஒருவர் குறிப்பிட்டுள்ளார்.
போர் நிறுத்தம் ஆரம்பிக்கப்பட்டது தொடக்கம் காசாவில் எந்த குண்டு சத்தமும் கேட்கவில்லை என்று அங்கிருந்து வரும் செய்திகள் தெரிவிக்கின்றன. எனினும் வடக்கு காசாவில் குடியிருப்பாளர்கள் தமது வீடுகளுக்கு திரும்புவதை இஸ்ரேலிய படை தடுத்து வருதாக கூறப்படுகிறது.
ஒரு சம்பவத்தில் வீடுகளுக்கு திரும்பும் பலஸ்தீனர்கள் மீது இஸ்ரேலிய துருப்புகள் துப்பாக்கிச் சூடு நடத்தியதாக அல் ஜசீரா தொலைக்காட்சி செய்தி வெளியிட்டுள்ளது.
இந்த நான்கு நாள் போர் நிறுத்தத்தின்போது வடக்கு காசாவில் உள்ள மக்கள் தமது வீடுகளுக்கு திரும்பக் கூடாது என எச்சரித்து இஸ்ரேலிய இராணுவம் துண்டுப்பிரசுரங்களையும் வானில் இருந்து வீசியுள்ளது.
இஸ்ரேலின் டஜன் கணக்கான டாங்கிகள் உட்பட இராணுவ வாகனங்கள் காசாவில் இருந்து வெளியேறுவதை கண்டதாக ரோட்டர்ஸ் செய்தியாளர் விபரித்துள்ளார். பலஸ்தின பகுதியில் இருந்து வாபஸ் பெறுவதாக இஸ்ரேலிய வாகனத் தொடரணியின் இராணுவ வீரர்கள் தெரிவித்துள்ளனர்.
தெற்கு காசா பகுதிக்கு அருகில் இருக்கும் இரு இஸ்ரேலிய கிராமங்களில் பலஸ்தீன ரொக்கெட் குண்டுகள் தொடர்பில் எச்சரிக்கும் வகையில் சைரன் ஒலி எழுப்பப்பட்டது. போர் நிறுத்தத்தை மீறி ஹமாஸ் ரொக்கெட் தாக்குதல் ஒன்றை நடத்தியதாக இஸ்ரேல் குற்றம்சாட்டியுள்ளது.
தெற்கு காசா நகரான கான் யூனிஸில் வீதிகளில் மக்கள் நிரம்பி இருந்தனர். காலித் அபூ அன்சா என்ற பலஸ்தீனர் ரோய்ட்டர்ஸுக்கு கூறியதாவது, “நாம் முழு நம்பிக்கை மற்றும் எதிர்பார்ப்போடு இருப்பதோடு எமது போராட்டம் குறித்து பெருமை கொள்கிறோம். வலியை ஏற்படுத்தியபோதும் இந்த அடைவுக்காக நாம் பெருமை கொள்கிறோம்” என்றார்.
போர் நிறுத்தம் ஆரம்பிக்கும் கடைசி நிமிடம் வரையும் காசா மீதான இஸ்ரேலின் தாக்குதல்கள் உக்கிரம் அடைந்திருந்தன. இதில் காசா நகரில் உள்ள மருத்துவமனை ஒன்றும் இலக்கு வைக்கப்பட்டது. போர் நிறுத்தம் என்பது தற்காலிகமானது என்றும் போர் மீண்டும் ஆரம்பிக்கப்படும் என்றும் இரு தரப்பும் குறிப்பிட்டுள்ளன.
இந்த மருத்துமனையை இஸ்ரேலிய இராணுவம் நேற்றுக் காலை சுற்றிவளைத்து மேற்கொண்ட சோதனையின்போது ஒரு பெண் கொல்லப்பட்டு மேலும் பலர் காயமடைந்திருப்பதாக பலஸ்தீன செய்தி நிறுவனமான வபா தெரிவித்துள்ளது. காசாவுக்கு மேலதிக உதவிகள் செல்ல ஆரம்பித்திருக்கும் நிலையில் பணயக்கைதிகளின் முதல் குழுவினர் உள்ளுர் நேரப்படி நேற்று பிற்பகல் 4 மணிக்கு விடுவிக்கப்பட்டனர். இந்த நான்கு நாள் போர் நிறுத்த காலத்தில் மொத்தம் 50 பணயக்கைதிகள் விடுவிக்கப்படவிருப்பதாக கட்டார் வெளியுறவு அமைச்சின் பேச்சாளர் மாஜித் அல் அன்ஸாரி தெரிவித்துள்ளார்.
போர் நிறுத்தம் ஆரம்பித்து ஒன்றரை மணி நேரத்தின் பின் எகிப்தில் இருந்து காசாவுக்குள் உதவி வாகனங்கள் நுழைய ஆரம்பித்தன. எகிப்திய அமைப்புகளை பிரதிநிதித்துவம் செய்யும் முதல் இரு வாகனங்களில் “மனிதாபிமானத்திற்காக ஒன்றிணைவோம்” மற்றும் “காசாவில் எமது சகோதரர்களுக்காக” என்று எழுதப்பட்ட பதாகைகள் இருந்தன.
போர் நிறுத்த காலத்தில் காசாவுக்கு தினசரி 130,000 லீற்றர் டீசல் மற்றும் நான்கு டிரக் எரிவாயு விநியோகிக்கப்படவுள்ளதோடு தினசரி அங்கு 200 டிரக் உதவிகள் வழங்கப்படவுள்ளதாக எகிப்து தெரிவித்துள்ளது.
இதன்போது இஸ்ரேலிய சிறையில் இருக்கும் குறைந்தது 150 பலஸ்தீனர்கள் இந்த போர் நிறுத்த காலத்தில் விடுவிக்கப்படவுள்ளனர். “இந்த போர் நிறுத்தம் பரந்த அளவில் செயற்படும் நிரந்தர போர் நிறுத்தம் ஒன்றை அடைவதற்கு வாய்ப்பை ஏற்படுத்தும்” என்று போர் நிறுத்தத்திற்கு மத்தியஸ்தம் வகிக்கும் கட்டார் நம்பிக்கை தெரிவித்துள்ளது.
தமது படைகளின் எதிர்ப்பு நடவடிக்கைகளும் நிறுத்தப்பட்டதாக ஹமாஸ் அமைப்பு டெலிகிராம் ஊடாக உறுதி செய்துள்ளது.
எனினும் ஹமாஸ் ஆயுதப் பிரிவின் செய்தித் தொடர்பாளர் அபு உபைதா, பின்னர் வெளியிட்ட ஒரு வீடியோ செய்தியில் “இது ஒரு தற்காலிக போர் நிறுத்தம்” என்று குறிப்பிட்டார். இஸ்ரேல் ஆக்கிரமிப்பு மேற்குக் கரை உட்பட “அனைத்து எதிர்ப்பு முனைகளிலும் (இஸ்ரேலுடன்) மோதலை அதிகரிக்க” அழைப்பு விடுத்தார். காசாவில் போர் ஆரம்பித்தது தொடக்கம் மேற்குக் கரையிலும் வன்முறை அதிகரித்துள்ளமை குறிப்பிடத்தக்கது.
மோதல் விரைவில் ஆரம்பிக்கப்படும் என்று இஸ்ரேலிய இராணுவமும் தெரிவித்துள்ளது.
“இது குறுகிய நிறுத்தமாக இருக்கும். கடைசியில் மோதல் பெரும்பாலும் பாரிய அளவில் தொடரும் என்பதோடு மேலும் பணயக்கைதிகளை விடுவிக்க அழுத்தம் கொடுக்கப்படும். குறைந்தது இரண்டு மாத போர் எதிர்பார்க்கப்படுகிறது” என்று இஸ்ரேலிய பாதுகாப்பு அமைச்சர் யோவ் களன்ட் கடற்படை கமாண்டோக்களிடம் உரையாற்றும்போது தெரிவித்துள்ளார்.
“வடக்கு காசாவை கட்டுப்படுத்துவது நீண்ட போர் ஒன்றின் முதல் கட்டமாக இருப்பதோடு, அடுத்த கட்டத்திற்கும் நாம் தயாராகி வருகிறோம்” என்று இஸ்ரேலிய இராணுவ பேச்சாளர் டனியேல் ஹகரி தெரிவித்துள்ளார்.
கடந்த ஒக்டோபர் 7 ஆம் திகதி இஸ்ரேலுக்குள் ஊடுருவிய பலஸ்தீன போராளிகள் நடத்திய தாக்குதலில் 1,200 பேர் கொல்லப்பட்டு சுமார் 240 பேர் பணயக்கைதிகளாக பிடிக்கப்பட்ட நிலையிலேயே காசா மீது இஸ்ரேல் வான், தரை மற்றும் கடல் மார்க்கமாக பயங்கர தாக்குதல்களை ஆரம்பித்தது.
அந்த குறுகிய நிலப்பகுதி மீது இஸ்ரேல் இடைவிடாது நடத்திய குண்டு மழையில் 14000க்கும் அதிகமான பலஸ்தீனர்கள் கொல்லப்பட்டனர்.
இதில் சுமார் 40 வீதமானவர்கள் சிறுவர்களாவர். இந்த வன்முறையில் இருந்து உயிர் தப்புவதற்கு 2.3 மில்லியன் மக்கள் தொகை கொண்ட காசாவில் ஆயிரக்கணக்கானோர் வெளியேறியதோடு இஸ்ரேல் முழு முற்றுகையை மேற்கொண்டதால் உணவு, நீர் மற்றும் எரிபொருள் அனைத்துக்கும் தட்டுப்பாடு ஏற்பட்டு பாரிய மனிதாபிமான நெருக்கடி ஒன்று ஏற்பட்டது.
“மக்கள் சோர்வடைந்து, மனித நேயத்தின் மீது நம்பிக்கை இழந்து வருகின்றனர்” என்று ஐ.நாவின் பலஸ்தீன அகதி நிறுவனத்தின் ஆணையாளர் நாயகம் பிலிப்பே லஸரினி வியாழக்கிழமை குறிப்பிட்டிருந்தார். காசாவுக்கான பயணத்தில் சொல்ல முடியாத துயரங்களை கண்டதாகவும் அவர் விபரித்தார். நன்றி தினகரன்
காசாவில் ஒரே குடும்பத்தின் 50 இற்கும் மேற்பட்டவர்கள் பலி
வடக்கு காசாவின் ஜபலியா அகதி முகாம் மீது இஸ்ரேல் நடத்திய தாக்குதலில் ஒரே குடும்பத்தைச் சேர்ந்த 50க்கும் மேற்பட்டவர்கள் கொல்லப்பட்டதாக பலஸ்தீன வெளியுறவு அமைச்சர் ரியாத் அல் மலிக்கி தெரிவித்துள்ளார்.
“ஜபலியாவில் கதூரா குடும்பத்தைச் சேர்ந்த 52 பேர் முழுமையாக கொல்லப்பட்டு அழிக்கப்பட்டுள்ளனர்” என்று கடந்த புதனன்று (22) லண்டனில் அரபு மற்றும் முஸ்லிம் அமைச்சர்கள் சந்திப்பு ஒன்றின்போது மலிக்கி தெரிவித்துள்ளார்.
“52 பேர்களின் பட்டியல் என்னிடம் உள்ளது. அவர்களில் பாட்டன் தொடக்கம் பேரக் குழந்தைகள் வரை முற்றாக அழிக்கப்பட்டுள்ளனர்” என்றும் அவர் கூறினார்.
இஸ்ரேல் மற்றும் ஹமாஸ் அமைப்புகளுக்கு இடையே போர் நிறுத்த உடன்படிக்கை ஒன்று எட்டப்பட்ட நிலையில் நேற்று வரை அது அமுலுக்கு வரவில்லை. இந்நிலையில் கடந்த புதன்கிழமை காசா மீது இஸ்ரேல் நடத்திய தாக்குதல்களில் 100க்கும் அதிகமான பலஸ்தீனர்கள் கொல்லப்பட்டுள்ளனர். நன்றி தினகரன்
இஸ்ரேலுடனான உறவை துண்டிக்க தென்னாபிரிக்க எம்.பிக்கள் ஆதரவு
தென்னாபிரிக்காவில் உள்ள இஸ்ரேலிய தூதரகத்தை மூடுவது மற்றும் அதனுடனான இராஜதந்திர உறவை இடைநிறுத்துவது தொடர்பில் தென்னாபிரிக்க பாராளுமன்றத்தில் கொண்டுவரப்பட்ட பிரேரணைக்கு பெரும்பான்மை ஆதரவு கிடைத்துள்ளது. காசா மீதான இஸ்ரேலின் தாக்குதல் தொடர்பிலேயே இந்த பிரேரணை கொண்டுவரப்பட்டது.
எனினும் ஜனாதிபதி சிரில் ரமபோசா அரசே இதனை செயற்படுத்துவது தொடர்பில் முடிவெடுக்கும் அதிகாரம் பெற்றிருப்பதால் இந்த வாக்கெடுப்பு ஓர் அடையாளமாகவே பார்க்கப்படுகிறது.
கடந்த செவ்வாய்க்கிழமை கொண்டுவரப்பட்ட பிரேரணைக்கு ஆதரவாக 248 வாக்குகள் கிடைத்ததோடு 91 வாக்குகள் எதிராக பதிவாகின. தென்னாபிரிக்காவுக்கான இஸ்ரேலிய தூதுவரை இஸ்ரேல் ஆலோசனைக்காக திரும்ப அழைத்துக் கொண்ட நிலையிலேயே இந்த வாக்கெடுப்பு இடம்பெற்றது.
முற்றுகையில் உள்ள காசாவில் இஸ்ரேல் போர் குற்றம் மற்றும் இனப்படுகொலையில் ஈடுபடுகிறது என தமது நாடு நம்புவதாக ரமபோசா குறிப்பிட்டார்.
தென்னாபிரிக்கா 2018 தொடக்கம் இஸ்ரேலுக்கு தூதுவரை நியமிக்கவில்லை என்பதோடு, பலஸ்தீன ஆதரவு நிலைப்பாட்டை தொடர்ந்து எடுத்து வருகிறது. நன்றி தினகரன்
இஸ்ரேலுடன் தொடர்புடைய கப்பலை கடத்தியது ஹூத்தி
இஸ்ரேலுடன் தொடர்புபட்ட கப்பல் ஒன்றை கடத்தி இருக்கும் யெமனின் ஹூத்தி கிளர்ச்சியாளர்கள் அதில் இருந்த பணியாளர்களை பணயக்கைதிகளாக பிடித்துள்ளனர்.
காசா மீதான இஸ்ரேலின் இராணுவ நடவடிக்கை முடிவுக்கு வரும் வரை சர்வதேச கடலில் உள்ள இஸ்ரேலுக்கு தொடர்புடைய அல்லது இஸ்ரேலுக்கு சொந்தமாக கப்பல்கள் இலக்கு வைக்கப்படும் என்று ஈரான் ஆதரவுடைய அந்தக் கிளர்ச்சிக் குழு எச்சரித்துள்ளது.
இஸ்ரேலிய செல்வந்தர் ஒருவருடன் தொடர்புடைய பஹாமாஸ் கொடியுடனான கப்பல் ஒன்றே கடத்தப்பட்டுள்ளது. அந்த கப்பலில் பல்வேறு நாடுகளைச் சேர்ந்த 25 ஊழியர்கள் இருந்துள்ளனர். இவர்கள் இஸ்லாமிய பெறுமானங்களுக்கு அமைய நடத்தப்படுவதாக ஹூத்திக்கள் கூறியபோதும் அது என்ன என்பதை விளக்கவில்லை.
துருக்கியிலிருந்து இந்தியா சென்றுகொண்டிருந்தபோது செங்கடலில் வைத்து இந்தக் கப்பல் கடத்தப்பட்டுள்ளது. கப்பல் கடத்தப்பட்டது “ஈரானின் பயங்கரவாதச் செயல்” என்று இஸ்ரேல் கண்டனம் தெரிவித்தது.
ஏற்கனவே ஹூத்திக்கள் இஸ்ரேலை இலக்கு வைத்து பல முறை ஏவுகணை மற்றும் ஆளில்லா விமானத் தாக்குதல்களை நடத்தியமை குறிப்பிடத்தக்கது. நன்றி தினகரன்
No comments:
Post a Comment