03/08/2019முஸ்லிம் சமூகம் எதிர்நோக்கிய நெருக்கடி நிலைக்கு தீர்வு காணும் வகையில் தங்களது அமைச்சுப் பதவிகளை கூட்டாக இராஜினாமா செய்து எதிர்ப்பை பகிரங்கமாக வெளிப்படுத்திய முஸ்லிம் அமைச்சர்கள் நால்வர் தங்களது முன்னைய அமைச் சுப்பதவிகளை மீண்டும் ஜனாதிபதி மைத்திரிபால சிறிசேன முன்னிலையில் கடந்த 29ஆம் திகதி பொறுப்பேற்றுக்கொண்டுள்ளனர்.
ஸ்ரீலங்கா முஸ்லிம் காங்கிரஸின் தலை வர் ரவூப் ஹக்கீம், அகில இலங்கை மக் கள் காங்கிரஸின் தலைவர் ரிஷாத் பதியு தீன் உட்பட பாராளுமன்ற உறுப்பினர்களான எம்.எஸ்.எஸ்.அமீர் அலி, அப்துல்லா மஹ்ரூப் ஆகிய இருவரும் ராஜாங்க அமைச்சராகவும் மற்றும் பிரதி அமைச்சராகவும் பதவி ஏற்றுக் கொண்டுள்ளனர்.
இதேவேளை இராஜினாமா செய்த ஒன்பது பேரில் ஐக்கிய தேசியக் கட்சியைச் சேர்ந்த கபீர் ஹாசிமும் எம்.எச்.ஏ.ஹலீமும் ஏற்கனவே அமைச்சுப்பதவிகளை பொறுப்பேற்றிருந்த நிலையில் மேற்படி நால்வரும் மீண்டும் பொறுப்பேற்றுள்ளனர். இதே வேளை முஸ்லிம் காங்கிரஸின் பாராளுமன்ற உறுப்பினரான எச்.எம்.எம்.ஹரீஸ் தனது அமைச்சுப் பதவியை பொறுப்பேற்க மறுத்த நிலையில் இன்னும் இருவரும் பதவிகளை பொறுப்பேற்க மறுத்துள்ளனர்.
முஸ்லிம் அமைச்சர்கள் கூட்டாக இராஜினாமா செய்ததற்கு ஒரு காரணம் மட்டுமே பின்னணி வகித்த போதும் அமைச்சுப் பத விகளை ஏற்றுக்கொண்டதற்கும் ஏற்காமல் இன்னும் இருப்பதற்கும் பல காரணங்கள் இருக்கலாமென ஊகிக்க முடிகிறது.
ஐக்கிய தேசியக்கட்சியின் சார்பாளர்களான, கபீர் ஹாசிமும் ஹலீமும் அவசர அவசரமாக பொறுப்பேற்றுக் கொண்ட மைக்குக் காரணம் அவர்கள் அங்கம் பெறும் கட்சி, மற்றையது அவர்கள் தெரி வாகி வந்துள்ள தேர்தல் தொகுதி என்பனவாகும்.
ஐக்கிய தேசியக்கட்சியின் பாராளுமன்ற உறுப்பினர்களாகவும், அதன் வழி அமைச்சர்களாகவும் பதவி வகித்துக் கொண்டிருக்கும் மேற்படி இருவரும் கட்சியின் பிரதான பொறுப்புக்களை ஏற்கனவே வகித்தவர்கள் மாத்திரமல்ல அக்கட்சியின் செயற்படு முறைக்கு முக்கிய பங்காற்றியும் வருபவர்கள். உயிர்த்த ஞாயிறு தாக்குதலின் பின்னணியில் இரு முன்னாள் ஆளுநர்கள் ஒரு முஸ்லிம் அமைச்சர் பதவிவிலக வேண்டு மென்று இனவாதிகளாலும், அரசியல் பேரின போக்காளர்களாலும் வலியுறுத்தப்பட்டதைத் தொடர்ந்து அமைச்சரவையில் அங்கம் வகித்த 9 முஸ்லிம் அமைச்சர்கள் கூட்டாக பதவி விலகினர். ஒரு மாத காலத்துக்குள் உயிர்த்த ஞாயிறு தாக்குதல் மற்றும் குற்றச்சாட்டுக்கள் தொடர்பில் விசாரணை செய்து முடிவு அறிவிக்கப்படுவதுடன் பகிரங்கப்படுத்த வேண்டுமென்ற நிபந்தனையுடன் முஸ்லிம் அமைச்சர்கள் பதவி விலகினர்.
இப்பதவி விலகலின்போது இனத்துவத்தை முன்னிறுத்தி கட்சி பேதங்களை மறந்து கருத்து முரண்பாடுகளை ஒதுக்கி விட்டு சமூகத்துக்கு ஏற்பட்டிருக்கும் நெருக்கடிகளிலிருந்து அவர்களை காப் பாற்ற வேண்டுமென்ற தோரணையிலேயே அவர்களின் முடிவு எடுக்கப்பட்டது. ஆனால் இன்று அமைச்சுப் பதவிகளை ஏற்றுக் கொண்டவர்களின் தீர்மானங் களுக்கும் ஏற்க மறுக்கும் எம்.பி.க்களி னுடைய கொள்கை அல்லது நிலைப்பாடு தொடர்பில் பாரிய கேள்விகள் எழுப்பப்படுகின்றன.
ஏலவே பதவிகளை ஏற்றுக்கொண்ட ஐக்கிய தேசியக் கட்சி அமைச்சர்கள் எந்த நிபந்தனைகளையும் முன்வைக்கா மல் பதவிகளை ஏற்றுக்கொண்டிருக்கும் நிலையில் கிழக்கு முஸ்லிம்களின் தீர்க்கப்படாதுள்ள பிரச்சினைகள் உட்பட முஸ்லிம் சமூகத்தின் பிரச்சினைகளுக்கு உடனடித் தீர்வுகள் வழங்கப்பட்டால் மட்டுமே தன்னால், தம்மால் அமைச்சுப் பதவிகளை பொறுப்பேற்க முடியுமென பாராளுமன்ற உறுப்பினர் எச்.எம்.எம்.ஹரீஸ் தெரிவித்துள்ளார். இவர் கூறிய காரணத்தின் பின்னணியிலேயே முஸ்லிம் காங்கிரஸைச் சேர்ந்த பைசல் காசீம், அலிஸாஹீர் மௌலானா ஆகியோர் தமக்குரிய அமைச்சுப் பதவிகளை பொறுப்பேற்கவில்லையென தெரிவிக்கப்படுகிறது. இதேநேரம் இவர்கள் மூவரும் விரைவில் கடமைகளை பொறுப்பேற்பார்கள் என்றும் ஆருடம் கூறப்படுகிறது. மேற்படி மூவரும் பின்வாங்குவதற்குரிய காரண காரியங்களை ஆராய்வதற்கு முன் ஐக்கிய தேசியக் கட்சியின் சார்பாளர்களான கபீர் ஹாசீம் மற்றும் ஹலீம் தொடர்பான விவகாரங்களை நோக்குவோம்.
ஏலவே குறிப்பிட்டதுபோல் இவர்கள் இருவரும் ஐக்கிய தேசியக் கட்சியின் வாக்கு அளிப்பால் வந்தவர்கள் மாத்திரமல்ல, சிங்கள மற்றும் முஸ்லிம் வாக்கு ஆதரவின் மூலம் தெரிவு செய்யப்பட்டவர்கள். இன்னும் தெளிவாக கூறுவதானால் சிங்கள மக்களின் கணிசமான வாக்குப் பலத்தினால் தெரிவு செய்யப்பட்டவர்கள் என்று கூறினாலும் பொருந்தும். ஐக்கிய தேசியக் கட்சியின் பலமுள்ள கோட்டையிலிருந்து தெரிவாகி வந்தவர்கள். உயிர்த்த ஞாயிறு சம்பவத்துடன் ஏற்பட்டிருக்கும் முறுகல் நிலை, சிறுபான்மை மக்களாகிய முஸ்லிம் மக்கள் மீது பேரினவாத சமூகத்துக்கு வெறுப்பையும் விரிசலையும் ஏற்படுத்தியிருக்கும் நிலையில் தொடர்ந்து அதிருப்திகளை தவிர்த்துக் கொள்ள வேண்டிய கட்டாய சூழ்நிலைக்கு தள்ளப்பட்டிருக்கும் காரணத்தினாலேயே அவசரமான முடிவுக்கு அவர்கள் வந்திருக்க முடியும். அதுவுமின்றி விரைவில் வரவிருக்கும் ஜனாதிபதித் தேர்தல், பொதுத்தேர்தல் என்பனவற்றை இலக்கு வைத்து காய் நகர்த்திக் கொண்டிருக்கும் ஐக்கிய தேசியக் கட்சியின் தலைமைப் பீடத்துக்கு இவ்விருவரும் தமது சமூகம் சார்ந்த விடயத்தில் தொடர்ந்து எட்ட நிற்பது எதிர்கால அரசியலுக்கு ஆபத்தாக முடியுமென்ற காரணத்தின் அடிப்படையில் கொடுக்கப்பட்ட அழுத்தம் காரணமாக அந்த முடிவுக்கு வந்திருக்க முடியும்.
முஸ்லிம் சமூகத்தைப் பொறுத்தவரை வடகிழக்குக்கு அப்பால் அவர்களின் வாழ்வியல் ஒன்று கூடிய தன்மை கொண்டவை. இதன் அர்த்தம் யாதெனில் சிங்கள மக்களின் கிராமங்களுடன் கோர்க்கப்பட்டு இருப்பவை. இவ்வாறான யதார்த்த வாழ்வு முறையில் முரண்பாட்டு பிடிமானங்களையோ, வேறுபாடுகளையோ காட்டி வாழ்வதென்பது நிதர்சனத்துக்கு அப்பாற்பட்டவை. அது போலவே வட–கிழக்கு சாயல்களும். எனவே தான் தொடர் முரண்பாடுகளை அறுத்தெறிய வேண்டிய தேவையுள்ளது.
இரண்டாவது விடயமாக இவ்வார ஆரம்பத்தில் அமைச்சுப் பதவிகளை ஏற்றுக் கொண்ட, ஸ்ரீலங்கா முஸ்லிம் காங்கிரஸ் தலைவர் ரவூப் ஹக்கீம் மற்றும் அகில இலங்கை மக்கள் காங்கிரஸின் தலைவர் ரிஷாத் பதியுதீன் அவர் கட்சியைச் சேர்ந்த அப்துல்லா மஹ்ரூப் ஆகியோரின் பதவியேற்பானது முஸ்லிம் மக்களைப் பொறுத்தவரை நல்லதொரு சமிக்ஞையாகவே சுட்டிக்காட்டப்படுகிறது.
முஸ்லிம் அமைச்சரான ரிஷாத் பதியுதீ னும் ஆளுநர் இருவரும் பதவி விலகவேண்டுமென்ற கோஷத்தையும் கோரிக்கையையும் முன்வைத்து ரத்னதேரர், பொதுபலசேனா பொதுச்செயலாளர் தலைமையிலான பௌத்த குருமார் கண்டி தலதா மாளிகை முன் முன்னெடுத்த பௌத்தவாதப் போராட்டமானது பாரிய இன அழிவுகளை உண்டாக்கிவிடும் என்ற தீர்க்கதரிசனமான பார்வையுடன் பொருத்தமான வேளையில் தமது அமைச்சுப் பதவிகளை கூட்டாக இராஜினாமா செய்தமை வரலாற்றுக்கு அப்பால் பேசப்படுகிற சம்பவம் மாத்திரமல்ல, மிகச் சிறந்த அரசியல் சாணக்கியத்தை பிற தலைமைகளுக்கு எடுத்துக்காட்டும் சிறந்த உதாரணமாகும்.
இவ்விவகாரத்தால் முஸ்லிம் சமூக தலை மைகளுக்கிடையே இரு சாத்திய விவகாரங் கள் நடந்தேறியுள்ளன. ஒன்று சிறுபான்மை இனத்தின் கூட்டு நோக்கு ஒற்றுமை. இரண்டாவது விடயம் அரசியலில் நிரந்தரமான எதிரியுமில்லை, நிரந்தரமான நண்பனுமில்லையென்ற தர்க்கமுறையான தத்துவம்.
அமைச்சுப் பதவிகளை மீள ஏற்பது தொடர்பில் முஸ்லிம் பாராளுமன்ற உறுப்பினர்கள் ஜனாதிபதியுடனும் பிரதமருட னும் பல கட்டப் பேச்சுவார்த்தைகளை நடத்தி ஒரு தீர்மானத்துக்கு வந்த பின்பே மீளப்பொறுப்பேற்றுள்ளனர். இப்பேச்சு வார்த்தைகளின் போது தமது சமூகம் சார்ந்த, பிரதேசம் சார்ந்த பல கோரிக்கைகளை முன்வைத்துள்ளனர். அக்கோரிக்கைகள் கொள்கையளவில் ஏற்றுக்கொள்ளப்பட்டதன் பின்பே மூவரும் மீள்பதவி ஏற்றுள்ளனர்.
கடந்த 28, 29ஆம் திகதிகளில் இடம்பெற்ற இறுதிப்பேச்சுவார்த்தையின் போது பிரதமருடனும் அமைச்சர் வஜிர அபயவர்த்தனவுடனும் பல விவகாரங்கள் தொடர்பில் பேசி முடிவு காணப்பட்டதாக கூறப்பட்டபோதும் கிழக்கு முஸ்லிம்களின் தீர்க்கப்ப டாத பிரச்சினைகள் உட்பட்ட முஸ்லிம் சமூகத்தின் பிரச்சினைகள் உடன் தீர்க்கப்பட்டால் மாத்திரமே தம்மால் அமைச்சுப் பதவியை பொறுப்பேற்க முடியுமென ஹரிஸ் நிபந்தனை விதித்துள்ளதாகவும் தக வல் தெரிவிக்கின்றன.
கல்முனை வடக்கு உபசெயலக விவகா ரம், தோப்பூர் பிரதேச செயலகம் மற் றும் வாழைச்சேனை பிரதேச செயலகம் போன்ற விவகாரங்கள் கலந்துரையாடப்பட்டிருப்பதுடன் வன்செயல்களுக்கான நட்டஈடுகள், அம்பாறை பள்ளிவாசலுக்கான நட்டஈடு, ஏனைய சேதங்கள், அவசியமற்ற சிறையடைப்புகள், குற்றச்சாட்டுக்கள் தொடர்பிலும் விவரமாக பேசி முடிவெடுக்கப்பட்டுள்ளதாக தெரிவிக்கப்படுகிறது.
இப்பேச்சுவார்த்தையில் இடம்பெற்ற மேற்போன்ற விவகாரங்களில் நட்டஈடு தொடர்பாகவோ, சிறையடைப்புகள் சம்பந்தமாகவோ பிரச்சினைகள் தோன்றுவதற்கு சந்தர்ப்பம் ஏற்பட்டிருக்க முடியாது. தொங்கிப் பார்க்கிற ஒரேயொரு விடயம் கல்முனை, தோப்பூர் மற்றும் வாழைச்சேனை பிரதேச செயலக விவகாரங்கள் காரசாரம் கொண்டவையாக இருந்திருக்கலாமென ஊகிக்க முடிகிறது.
கல்முனை வடக்கு உப பிரதேச செயல கத்தை தரம் உயர்த்த வேண்டுமென்ற கோரிக்கை நீண்டகாலமாகவே முன்வைக்கப்பட்டு வந்துள்ளது. இது தொடர்பில் பல உண்ணாவிரதப் போராட்டங்கள் கவ னயீர்ப்புப் போராட்டங்கள், ஆதரவுப் பேராட்டங்கள், தொடர்ந்து நடத்தப்பட்டு வருகிறது. இப்போராட்டம் ஒரு வெகுச னப் போராட்டமாகவும் விரிவுபடுத்தப்பட்ட நிலையில் காணப்படுகிறது.
இன்னும் கவனமாகப் பார்க்கப்போனால் இப்போராட்டமும், எதிர்வாதிகளின் விடாத்தன்மையும், இருதுருவங்களாக ஆகிவிட்ட நிலையே தோன்றியுள்ளது. கிழக்கைப் பொறுத்தவரை அரசியல் அதிகாரங்களையும் செல்வாக்குகளையும் வைத்துக்கொண்டு தமிழ் மக்கள் நிந்திக்கப்படுகிறார்கள் என்ற பேத எண்ணம் இவ்விவகாரத்தில் தலைதூக்கி நிற்பதையே காணக்கூடியதாகவுள்ளது. ஊர் இரண்டுபட்ட நிலையில் கூத்தாடிக்கு கொண்டாட்டம் என்ற பழமொழிக்கு அமைய இரு சமூகத்துக்குமிடையில் தீர்வு காணும் தரகர்களாக பிக்குமார் நுழையும் சந்தர்ப்பமொன்று உருவாகிவிட்டது.
அம்பாறை மாவட்டத்தின் ஒரு பிரதேசமாக கல்முனை காணப்படுகிறது. அம்பாறை மாவட்ட செயலகத்தின் கீழ் இயங்கும் கல்முனை தெற்கு பிரதேச செயலகம் முஸ்லிம் செயலகமாகவும், கல்முனை வடக்கு தமிழ் உபசெயலகமாகவும், சாய்ந்த மருது பிரதேச செயலகம் மற்றொன்றாகவும் மூன்று செயலகப் பிரிவு கல்முனையில் இயங்கி வருகின்றன. இதில் கல்முனை வடக்கு உப பிரதேச செயலகம் முற்று முழுதாக தமிழ் மக்கள் வாழும் கிராமங்களைக் கொண்டது.
மேற்படி கல்முனை வடக்கு உப பிரதேச செயலகம் தொடர்ந்து புறக்கணிக்கப்பட்டு வருவதாகவும் இதனால் தமிழ் மக்கள் நேரடியாகவே பாதிக்கப்பட்டு வரும் நிலையிலேயே தமிழ்ப் பிரதேசங்களை உள்ளடக்கிய ஒரு பிரதேச செயலகமொன்று கல்முனையில் உருவாக்கப்பட வேண்டுமென்ற கோரிக்கையை முன் வைத்து தொடர் போராட்டங்கள் இடம்பெற்று வருகின்றன. இப்போராட்டங்கள் தொடர்பில் அரசாங்கங்கள் எந்தளவு கவனம் செலுத்தியுள்ளன என்பது தொடர்பில் தெளிவான தகவலை யாராலும் பெற முடியவில்லை.
சில அரசியல் தலைமைகளின் விடாப்பிடித்தன்மை. முரண்பாடுகளையும் விரிசல் களையும் வளர்த்து செல்கிறதே தவிர கூர்மையான ஒற்றுமைக்கு வழி சமைக்க முடியவில்லை. கல்முனை விவகாரம் தொடர் பில் எந்தவொரு விட்டுக் கொடுப்புக்கும் இடமில்லை என்று மூர்க்கத்தனமாக பேசு வது இனவுறவுக்கு குந்தகம் விளைவிக்கும். இவ்விவகாரத்தில் அரசாங்கம் இரட்டை வேடம் போட்டு அரசியல் இலாபத்தை தேடப்பார்க்கிறதென்பது தெளிவாக உணரப்படுகிற விடயம்.
வஜிர அபயவர்த்தன முஸ்லிம் தரப்பினருக்கு சில வாக்குறுதிகளை நல்கியிருப்பதுடன் சுமுகமான தீர்வுகளுக்கு உறுதி வழங்கப்பட்டதாக தெரிவிக்கப்படுகிறது. இதேவேளை அமைச்சர் ரவூப் ஹக்கீம் முஸ்லிம் புத்தி ஜீவிகளுடனான சந்திப்பின்போது கல்முனை வடக்கு தமிழ் உப பிரதேச செயலகம் தரம் உயர்த்தப்படுகிற அதேவேளை சாய்ந்த மருதுக்கான தனி உள்ளூராட்சி சபையொன்றை உருவாக்கி தருவேன். இவ்விடயத்தில் நான் உறுதியாக இருக்கிறேன். அதற்கான முயற்சிகளை மேற்கொண்டு வருகிறேன் எனவும் வாக்குறுதியளித்துள்ளார்.
கல்முனை வடக்கு உப செயலக விவகா ரம் தொடர்பில் கல்முனை வாழ் தமிழ் மக் கள் மாத்திரமன்றி வட – கிழக்கிலுள்ள ஒட்டுமொத்த தமிழ்த்தரப்பினரும் தமிழ் தலைமைகள் மீது அதிருப்தி கொண்டவர்களாகவே காணப்படுகிறார்கள்.
தமிழ் மக்கள் குறிப்பாக கிழக்கு வாழ் தமிழ் மக்கள் நீண்டகாலப்பயணத்தில் ஒன்றுபட்டு பயணிக்கும் நேர்த்தனமான எண்ணங் கொண்டவர்களாகவே இருந்து வந்துள்ளார்கள் என்பதை பல சந்தர்ப்பங்களில் நிரூபித்துள்ளார்கள் என்பதை மறுதலித்து கூறமுடியாது.
2012ஆம் ஆண்டு இடம்பெற்ற மாகாண சபைத் தேர்தலின் போது கூட்டமைப்பு 11 ஆசனங்களைப் பெற்றிருந்த நிலையிலும் கிழக்கில் நாம் இருவரும் ஒன்றிணைந்து ஆட்சி அமைத்துக்கொள்வோம். எந்தவொரு விட்டுக் கொடுப்புக்கும் நாம் தயாராகவுள்ளோமென கூட்டமைப்பின் தலைவர் இரா.சம்பந்தன் தேர்தலின் முன்னும் பின்னும் மானசீகமாக அழைப்பு விட்டிருந்தபோதும் ஒரு சில சுயலாபங்கள் அடிப்படையில் அவரின் கோரிக்கை உதாசீனம் செய்யப்பட்டது. அதன் விளைவு முஸ்லிம் சகோதரத்துவம் நேரடியாகவே பாதிப்புக்குள்ளாக்கப்பட்டது. இதை அண்மையில் ரவூப் ஹக்கீம் அழகாகக் கூறியிருந்தார்.
தீர்வு விடயத்தில் தமிழர்களைப் போன்று நாங்களும் விரக்தி நிலையில் உள்ளோம். புதிய அரசியல் அமைப்புக்கு இந்த அரசாங்கத்துக்கு மக்கள் ஆணை வழங்கப்பட்டது. ஆனால் அரசாங்கத்தால் அதனை நிறைவேற்ற முடியாமல் போயுள்ளது. அதனால் தமிழ் மக்கள் போலவே நாங்களும் தீர்வை எட்டுவதில் விரக்தியுற்றிருக்கிறோமென கூறியிருந்தார்.
2015 ஆம் ஆண்டின் ஆட்சி மாற்றத்தைத் தொடர்ந்து கிழக்கு மாகாண சபையிலும் ஆட்சி மாற்றம் இடம்பெற்றது. 11 உறுப்பினர்களைக் கொண்ட கூட்டமைப்பு எதிர்க்கட்சி ஆசனத்திலிருந்து ஆளும் வாய்ப்பு உருவாகிய நிலையில் ஐக்கிய தேசியக் கட்சியின் உறுப்பினர் தயா கமகே கூட்டமைப்பினருடன் ஒரு பேச்சுவார்த்தை நடத்தினார்.
எங்களுடன் சேர்ந்து ஆட்சி அமைக்க வாருங்கள், என்னை முதலமைச்சர் ஆக்குங்கள், தேவையான அமைச்சுக்களை எடுத்துக்கொள்ளுங்கள், இன்னும் சில மாதங்களில் பொதுத்தேர்தல் வந்துவிடும். நான் அங்கு சென்றுவிடுவேன். நீங்கள் முதலமைச்சராக கூட வரலாமென ஆசை காட்டியபோதும் வளைந்து கொடுக்காமல் அற்ப சொற்ப சலுகைகளுக்காக எமது சகோதர இனத்தை பகைக்க மாட்டோமென்று கூறியே, விட்டுக்கொடுப்பின் அடிப்படையில் 11 உறுப்பினர் கொண்ட கூட்டமைப்பு 7 உறுப்பினர் கொண்ட முஸ்லிம் காங்கிரஸை கிழக்கின் முதலமைச்சர் ஆக்கியது. அத்தகைய பண்பு நிலை மாறிப்போய் சாதாரண பிரதேச செயலகத்தை தரமுயர்த்த விடாமல் கங்கணம் கட்டுவது என்பது வருந்தக்கூடிய விடயமாகும்.
இதேபோன்றதொரு நிலை தான் சற்றும் மாறுபட்ட கோணத்தில் காணப்படுவது தோப்பூர் விவகாரமாகும். தமிழ் மக்களும் முஸ்லிம் சகோதரர்களும் கூடிக்குலாவி வாழும் மூதூர் பிரதேச செயலகத்தை உடைத்து தோப்பூர் என்னும் இன்னுமொரு பிரதேச சபையை உருவாக்குவதில் எடுத்துவரும் முயற்சியானது நேரடியாகவே தமிழ் மக்களை பாதிக்கும் நடவடிக்கையென்பது மூதூர் வாழ் மக்களுடைய கவலை.
தோப்பூருக்கு தனியான ஒரு பிரதேச செயலகத்தை உருவாக்கப்பட வேண்டுமென்பது அப்பகுதி மக்களின் கோரிக்கைகளாகும். இக்கோரிக்கைகளை நிறைவேற்றும்படி அவர்கள் அரசியல் தலைமைகளுக்கு அழுத்தம் கொடுத்து வருவதும் தெரியப்பட்டவிடயம். இது முன்னெடுக்கப்படுமாயின் தமிழ் மக்களை இன்னும் இன்னும் ஒதுக்கும் செயற்பாடு மாத்திரமன்றி இன உறவுகளுக்கு வேலிபோடும் நடவடிக்கைகளாக மாறிவிடுமென்பது தமிழ் மக்களின் கவலையாக தெரிவிக்கப்படுகிறது.
தோப்பூருக்கு ஒரு புதிதான பிரதேச சபை உருவாக்கும் திட்டத்தில் முஸ்லிம் மக்கள் செறிந்து வாழும் கிராமங்களான இக்பால் நகர், அல்லை நகர் மேற்கு, அல்லை நகர் கிழக்கு, தோப்பூர் ஆசாத் நகர், ஜின்னா நகர், பாலத்தோப்பூர் ஆகிய ஏழு கிராமங்களுடன் தமிழ் மக்களை முழுமையாகக் கொண்ட கிராமங்களான கிளிவெட்டி, மேன்காமம், கங்குவேலி, பள்ளிக்குடியிருப்பு, பாலத்தடிச்சேனை ஆகிய ஐந்து கிராம சேவகர் பிரிவுகளையும் ஒன்றிணைத்து 12 கிராம சேவகர்கள் பிரிவுகளைக் கொண்ட தோப்பூர் பிரதேசசபையொன்றை உருவாக்க வேண்டுமென்பதே விடுக்கப்பட்டிருக்கும் கோரிக்கையாகும். தற்போது இதில் சின்ன சின்ன மாற்றங்கள் முன்மொழியப்பட்டிருப்பதாக தெரியப்படுத்தப்படுகிறது.
ஏலவே குறித்த தமிழ் கிராமங்கள் மூதூர் பிரதேச செயலாளர் பிரிவுக்குள் உள்ளடங்கியிருப்பவை. இவற்றை தோப்பூருக்கென உருவாக்கப்படவுள்ள பிரதேச சபைக்குள்ளும் இணைக்கப்படுமாக இருந்தால் தாம் சிறுபான்மை ஆக்கப்படவுள்ளோம் என்பது குறித்த தமிழ் கிராமங்களைச் சேர்ந்த மக்களின் கவலையாக தெரிவிக்கப்படுகிறது.
மூதூர் பிரதேச செயலகம் 42 கிராம சேவகர்கள் பிரிவுகளைக் கொண்டது. இவற்றில் 22 பிரிவுகள் தமிழ்ப் பிரிவுகளாகவும் 20 முஸ்லிம் பிரிவுகளாகவும் காணப்படும் நிலையில் தமிழ் கிராமங்களை உள்ளடக்கிய நிலப்பரப்பு 68 வீதமாகவும், முஸ்லிம் கிராமங்களைக் கொண்ட நிலப்பரப்பு 32 வீதமாகவும் இருக்கும். கணக்கின்படி தமிழ் மக்கள் பாதிக்கப்படுகிறார்கள் என்பது அவர்களின் வாதம்.
இதறகு இன்னொரு மாற்றீடாகவே மூதூர் பிரதேசத்தில் தமிழ்ப்பகுதியை உள்ளடக்கிய கொட்டியாரப்பற்று என்னும் புதிய பிரதேச செயலகமும் பிரதேச சபையும் உருவாக்கப்பட வேண்டுமென்ற கோரிக்கைகளை முன்வைத்து வருவதாக தமிழ் மக்கள் தங்கள் நியாயங்களை முன்வைத்து வருகிறார்கள்.
இவ்வாறு பார்க்கும்போது அண்மைக்காலமாக, குறிப்பாக யுத்த கெடுபிடிகளிலிருந்து நாடு விடுபட்டு சீர்குலைவை நோக்கி நகர்ந்து கொண்டு போகும் நிலையில் இனமுறுகல்களையும் விரிசல்களையும் உண்டாக்கும் பலவித சவால்கள் வெளிவரும் நிலையில் அவற்றை எதிர்கொள்ள முடியாமல் தேசிய அரசு தளம்பிக் கொள்ளும் நிலை உருவாகி வருகிறது. சுதந்திரம் பெற்று 70 வருடங்களை கடந்த நிலையிலும் அரசியல் இலாபங்கள், வீம்பு நிலைகள் காரணமாக நாடு இனச்சமநிலையை அடைய முடியாத கொடுமை நிலைக்குள் கொதித்துக் கொண்டிருப்பதையே அண்மைக்கால சம்பவங்கள் தெரிவிக்கின்றன.
முஸ்லிம் சமூகத்தையும் தமிழ் சமூகத்தையும் உரசவிட்டு அதில் குளிர் காய நினைக்கும் கூத்தாடிகளின் அரசியல் சதுரங்கத்துக்குள் அமிழ்ந்து போகாமல்நிதானமாகவும் நிதர்சனமாகவும் செயற்பட வேண்டிய பொறுப்பு சமூகத்தை சார்ந்தது மாத்திரமல்ல, அரசியல் தலைமைகளுக்குரிய தார்மீகக் கடமை. 70 வருட போராட்டம், 30 வருட யுத்தம் தமிழ் மக்களை தொலைந்து போன நிலைக்கு தள்ளியது போலவே அண்மைக்கால சம்பவங்கள் முஸ்லிம் சமூகத்துக்கு பாரிய நெருக்கடிகளை உருவாக்கியிருந்தது. குண்டு தாக்குதல்களை அடுத்து முஸ்லிம்களுக்கு எதிராக கட்டவிழ்த்து விடப்பட்ட அடக்குமுறைகளை தமிழ் மக்களோ தலைமைகளோ கைகட்டி பார்க்கவில்லையென்பதை திருமலை மாவட்ட பாராளுமன்ற உறுப்பினர் அப்துல்லா மஹ்ரூப் அழகாக கூறியுள்ளார். எனவே இனத்துவமான சமூகப் பார்வை நோக்கங்களை அனைவரும் கைவிடுவதே எதிர்காலத்தை பலமுள்ளதாக ஆக்கும்.
திருமலை நவம் - நன்றி வீரகேசரி
No comments:
Post a Comment