சவூதியில் 431 பேர் கைது
துருக்கிய எல்லையில் குண்டுத் தாக்குதல் 28 பேர் உயிரிழப்பு; 100 பேர் காயம்
ஈரான் தொடர்பான அணுசக்தி உடன்படிக்கைக்கு ஐக்கிய நாடுகள் பாதுகாப்புச் சபை அங்கீகாரம்
சயனைட் ,தொலை தொடர்பு சாதனங்களுடன் இலங்கையர் உட்பட மூவர் இந்தியாவில் கைது
பாகிஸ்தானில் வெள்ள அனர்த்தம்
சவூதியில் 431 பேர் கைது
20/07/2015 ஐ.எஸ். தீவிரவாதிகளுடன் தொடர்புடைய அமைப்பொன்றை முறியடித்து அந்த அமைப்பைச் சேர்ந்த 431 உறுப்பினர்களைக் கைதுசெய்துள்ளதாக சவூதி அதிகாரிகள் சனிக்கிழமை அறிவித்துள்ளனர்.
மேற்படி குழுவினர் சவூதி அரேபியாவின் கிழக்கு மாகாணத்திலுள்ள பள்ளிவாசல்களை இலக்குவைத்து நடத்தப்பட்ட மிக மோசமான தற்கொலைக் குண்டுத் தாக்குதல்கள் உள்ளடங்கலான பல தாக்குதல்களுடன் தொடர்புபட்டிருந்ததாக குற்றஞ்சாட்டப்படுகிறது.
அவர்கள் சவூதியில் பிரிவினைவாத வன்முறைகளை தூண்டி பதற்ற நிலையை ஏற்படு த்த சதித் திட்டம் தீட்டியிருந்ததாக கூறப்படுகிறது. நன்றி வீரகேசரி
துருக்கிய எல்லையில் குண்டுத் தாக்குதல் 28 பேர் உயிரிழப்பு; 100 பேர் காயம்
21/07/2015 துருக்கிய நகரான சுரக்கில் நேற்று திங்கட்கிழமை மாலை இடம்பெற்ற குண்டுத் தாக்குதல் ஒன்றில் குறைந்தது 28 பேர் பலியானதுடன் 100 பேருக்கும் அதிகமானோர் காயமடைந்துள்ளதாக அந்நாட்டு உள்துறை அமைச்சு தெரிவித்தது.
சிரிய எல்லையிலுள்ள மேற்படி நகரில் இடம்பெற்ற இந்தத் தாக்குதலை தீவிரவாதத் தாக்குதல் ஒன்றென அந்த அமைச்சு குறிப்பிட்டுள்ளது.
சுரக் நகர கலாசார நிலையமொன்றிலுள்ள தோட்டத்திலேயே இந்த வெடிப்பு இடம்பெற்றுள்ளதாக துருக்கிய அதிகாரிகள் தெரிவிக்கின்றனர்.
அதேசமயம் இந்தத் தாக்குதல் தற்கொலைக் குண்டுதாரியொருவராலேயே நடத்தப்பட்டதாக பெயரை வெளியிட விரும்பாத அதிகாரியொருவர் குறிப்பிட்டுள்ளார்.
அந்நாட்டின் பிரதமர் அஹ்மெட் டவுதோக்லு பிரதிப் பிரதமர் நுமான் குர்துல்மஸ், உள்துறை அமைச்சர் செபஹட்டின் ஒஸ்துர்க், தொழில் அமைச்சர் பாருக் செலிக் ஆகிய 3 அமைச்சர்களை சம்பவம் இடம்பெற்ற இடத்திற்கு நேரில் சென்ற நிலைமைகளைப் பார்வையிட அனுப்பி வைத்துள்ளார்.
மேற்படி தாக்குதல் யாரால் நடத்தப்பட்டது என்பது குறித்து விபரம் எதுவும் இதுவரை வெளியிடப்படவில்லை. நன்றி வீரகேசரி
ஈரான் தொடர்பான அணுசக்தி உடன்படிக்கைக்கு ஐக்கிய நாடுகள் பாதுகாப்புச் சபை அங்கீகாரம்
22/07/2015 ஈரானுக்கும் உலகின் 6 அதிகார சக்திகளுக்குமிடையே கடந்த வாரம் இணக்கம் காணப்பட்ட அணுசக்தி உடன்படிக்கைக்கு ஐக்கிய நாடுகள் பாதுகாப்புச் சபை ஏகமனதாக ஒப்புதலளித்துள்ளது.
ஈரானின் சர்ச்சைக்குரிய அணுசக்தி நிகழ்ச்சித் திட்டத்தை முடக்குவதற்கு பதிலாக அந்நாட்டுக்கு எதிரான தடைகளை நீக்குவதற்கு அங்கீகாரமளிக்கும் தீர்மானத்திற்கு ஐக்கிய நாடுகள் பாதுகாப்புச் சபையின் அனைத்து 15 உறுப்பினர்களும் ஆதரவளித்துள்ளனர்.
எனினும் ஈரான் தனது கடப்பாடுகளை நிறைவேற்றத் தவறும் பட்சத்தில் மேற்படி தடைகள் மீள அறிமுகப்படுத்தப்படும் என்பது குறிப்பிடத்தக்கது.
இந்நிலையில் இது தொடர்பில் அங்கீகாரம் வழங்குவதா அல்லது இல்லையா என தீர்மானிக்க அமெரிக்க பாராளுமன்றத்திற்கு கால அவகாசம் வழங்கப்பட்டுள்ள நிலையில், எதிர்வரும் 90 நாட்களுக்குள் மேலதிக நடவடிக்கை எதுவும் எடுக்கப்படமாட்டாது என தெரிவிக்கப்படுகிறது.
ஐக்கிய நாடுகள் சபையின் இந்தத் தீர்மானமானது தமது உடன்படிக்கை தொடர்பில் குற்றஞ்சாட்டுபவர்களுக்கு தெளிவான செய்தியொன்றை அனுப்புவதாக உள்ளதென அமெரிக்க ஜனாதிபதி பராக் ஒபாமா கூறினார்.
ஐக்கிய நாடுகள் பாதுகாப்புச் சபை 2006 ஆம் ஆண்டுக்கும் 2015 ஆம் ஆண்டுக்கும் இடைப்பட்ட காலப் பகுதியில் ஈரானிய அணுசக்தி நிகழ்ச்சித் திட்டம் தொடர்பில் 7 தீர்மானங்களை எடுத்துள்ளது.
அவற்றில் நான்கு தீர்மானங்கள் ஈரான் தனது அணுசக்தியைப் பயன்படுத்தி அணு ஆயுதத்தை உற்பத்தி செய்வதை தடுப்பதை இலக்காகக் கொண்டு அந்நாட்டிற்கு எதிராகத் தடைகளை விதிப்பனவாக உள்ளன.
இந்நிலையில் ஐக்கிய நாடுகள் சபையில் அந்தத் தடைகளை நீக்குவதற்கு ஆதரவாக எடுக்கப்பட்ட புதிய தீர்மானம், ஈரான் உடன்படிக்கை நிபந்தனைகளை எதிர்வரும் 10 வருடத்துக்குள் மீறும் பட்சத்தில் அந்நாட்டிற்கு எதிராக தடைகளை மீள விதிப்பதற்கு அனுமதிப்பதாக உள்ளது. நன்றி வீரகேசரி
சயனைட் ,தொலை தொடர்பு சாதனங்களுடன் இலங்கையர் உட்பட மூவர் இந்தியாவில் கைது
22/07/2015 இலங்கைக்கு கடத்தவிருந்த சயனைட் , தொலைத் தொடர்பு சாதனங்களுடன் மற்றும் பொருட்களுடன் இலங்கையர் உட்பட மூவரை ராமநாதபுரம் கடலோரப்பகுதி பாதுகாப்பு பிரிவினர் கைதுசெய்துள்ளனர்.
இலங்கைக்கு வெடிபொருட்கள் ராமேஸ்வரம் வழியாக கடத்த இருப்பதாக பொலிஸாருக்கு ரகசிய தகவல் கடைத்தது. இதனையடுத்து ராமநாதபுரம் கடலோரப்பகுதிகளில் பாதுகாப்பு பிரிவினர் தீவிர ரோந்துப்பணியில் ஈடுபட்டு வந்தனர் .
இந் நிலையில் நேற்று இரவு உச்சிப்புளி அருகே வாகன சோதனையில் ஈடுபட்டடு வந்த மாவட்ட காவல்துறையினர் சந்திகத்தின் பேரில் காரொன்றை நிறுத்தி சோதனை செய்தனர் .
குறித்த காரில் சோதனை நடத்திய போது மறைத்து வைத்திருந்த 300 கிராம் சயனைட் ,75 சயனைட் குப்பிகள், 4 திசைகாட்டும் கருவிகள், 8 செல்போன்கள் இந்தியப்பணம் ரூபா 50 ஆயிரம் மற்றும் இலங்கை பணம் ரூபா 19 ஆயிரம் ஆகியவற்றை கைப்பற்றிய பொலிஸார் காரையும் பறிமுதல் செய்தனர்.
இதேவைளை காரில் பயணித்த யாழ்ப்பாணத்தை சேர்ந்த கிரிஷ்ணகுமார் (39), உச்சிப்புளி அருகே உள்ள சுந்தரமடையான் கிராமத்தை சேர்ந்த ராஜேந்திரன், மற்றும் நகாச்சி கிராமத்தை சேர்ந்த ஜெய்குமார் (27) ஆகியோரை பொலிஸார் கைது செய்தனர்.
கைதுசெய்யப்பட்டவர்களை தடுத்து வைத்து பொலிஸார் மேலதிக விசாரணைகளை மேற்கொண்டு வருகின்றனர்.
இதேவேளை, கைது செய்யப்பட்ட நபர்களுக்கும் புலிகள் இயக்கத்திற்கும் தொடர்பிருப்பதாக விசாரணைகளில் இருந்து தெரியவந்துள்ளதாக பொலிஸார் தெரிவிக்கின்றனர். நன்றி வீரகேசரி
பாகிஸ்தானில் வெள்ள அனர்த்தம்
23/07/2015 வட பாகிஸ்தானில் அடை மழை காரணமாக ஏற்பட்ட வெள்ள அனர்த்தத்தில் சிக்கி குறைந்தது மூவர் பலியாகியுள்ளதாக அங்கிருந்து வரும் செய்திகள் தெரிவிக்கின்றன.
கைபர் பகதுன்கவா மற்றும் பலுசிஸ்தான் பிராந்தியங்களிலுள்ள கிராமங்கள் இந்த வெள்ள அனர்த்தத்தால் பாதிக்கப்பட்டுள்ளன.
கைபர் பகதுன்கவா மாகாணத்திலுள்ள சிட்ரல் நகர் வெள்ளத்தால் மிக மோசமாக பாதிக்கப்பட்டுள்ளதாகவும் அங்கு வீடுகள் பல இடிந்து விழுந்துள்ளதாகவும் அங்கிருந்து வரும் செய்திகள் தெரிவிக்கின்றன.
நன்றி வீரகேசரி
No comments:
Post a Comment