மனித புதை குழியில் இருந்து மேலும் மூன்று எலும்புக்கூடுகள் கண்டுபிடிப்பு
வெள்ளை வேனில் கடத்தப்பட்ட குடும்பஸ்தர் சடலமாக மீட்பு
சர்வதேச விசாரணை வேண்டும் : வட மாகாணசபையில் தீர்மானம்
வவுனியாவில் பழங்கால நாணயங்கள் கண்டுபிடிப்பு
========================================================================
மனித புதை குழியில் இருந்து மேலும் மூன்று எலும்புக்கூடுகள் கண்டுபிடிப்பு\
27/01/2014
மன்னார் திருக்கேதீஸ்வரம் மனித புதைகுழி மீண்டும் இன்று திங்கட்கிழமை மன்னார் நீதவான் ஆனந்தி கனகரட்ணத்தின் முன்னிலையில் தோண்டப்பட்ட போது மேலும் மூன்று மனித எலும்புக்கூடு உள்ளமை கண்டு பிடிக்கப்பட்டுள்ளது.
மன்னார் நீதவான் முன்னிலையில் 15 ஆவது தடவையாக குறித்த மனித புதை குழி இன்று திங்கட்கிழமை தோண்டப்பட்ட போதே குறித்த மனித எலும்புக்கூடுகள் உள்ளமை அடையாளம் காணப்பட்டுள்ளது. இது வரை மீட்கப்பட்ட மனித எலும்புக்கூடுகளின் எண்ணிக்கை 48 ஆக உயர்ந்துள்ளது.
இதே வேளை திருக்கேதீஸ்வரம் மனித புதை குழி உள்ள இடத்திற்கு வருகை தந்த குற்ற புலனாய்வுப் பிரிவினர் (சி.ஐ.டி) மூன்றாவது நாளாக இன்று திங்கட்கிழமை தமது விசாரனைகளை அங்கு முன்னெடுத்துள்ளனர்.
கடந்த டிசம்பர் மாதம் 20 ஆம் திகதி குறித்த மனித எலும்புக்கூடுகள் உள்ளமை கண்டு பிடிக்கப்பட்ட நிலையில் மன்னார் நீதவான் ஆனந்தி கனகரட்ணத்தின் உத்தரவிற்கமைவாக அன்று முதல் தற்போது வரை குறித்த புதை குழி தோண்டப்பட்டு வருகின்றது.
மன்னார் நீதவானின் உத்தரவிற்கமைவாக மன்னார் பொது வைத்தியசாலையில் பாதுகாப்பான இடம் ஒன்று தெரிவு செய்யப்பட்டு அங்கு பெட்டிகளில் பொதி செய்யப்படும் மனித எலும்புக்கூடுகளை பாதுகாப்பாக வைப்பதற்கான நடவடிக்கைகள் முன்னெடுக்கப்பட்டுள்ளது. இன்று திங்கட்கிழமை மதியம் 2 மணிவரை குறித்த பணிகள் இடம் பெற்றது.
மீண்டும் புதை குழி தோண்டும் பணி நாளை செவ்வாய்க்கிழமை இடம் பெறவுள்ளமை குறிப்பிடத்தக்கது.
நன்றி வீரகேசரி
வெள்ளை வேனில் கடத்தப்பட்ட குடும்பஸ்தர் சடலமாக மீட்பு
28/01/2014 பொலிஸார் எனக் கூறிக்கொண்டு வெள்ளை வேனில் வந்த ஆயுதம் தரித்த குழுவினரால்
நேற்று முன்தினம் இரவு கடத்தப்பட்டதாகக் கூறப்படும் தெஹிவளை, படோவிற்ற பகுதியைச் சேர்ந்த இளம் குடும்பஸ்தர் ஒருவரின் சடலம் நேற்று பிற்பகல் கல்கிஸை பொலிஸ் பிரிவுக்குட்பட்ட அத்திடிய கஹவிட்ட மாவத்தையிலுள்ள ஓடை ஒன்றிலிருந்து பொலிஸாரால் மீட்கப்பட்டுள்ளது.
நேற்று பிற்பகல் கல்கிஸை பொலிஸ் அவசர தொலைபேசி அழைப்புக்குக் கிடைத்த தகவல் ஒன்றின் அடிப்படையில் ஸ்தலத்துக்குச் சென்று பொலிஸார் சடலத்தை மீட்டதாக பொலிஸ் ஊடகப் பேச்சாளர் அலுவலகம் குறிப்பிட்டது.
சடலமாக மீட்கப்பட்டவர் 36 வயதான சிஹான் ஹஷித்த பெரேரா என அடையாளம் காணப்பட்டுள்ள நிலையில், கடத்திய குழுவினரால் இவர் சுட்டுக் கொலை செய்யப்பட்டிருக்கலாம் என பொலிஸார் சந்தேகிக்கின்றனர்.
இதனிடையே, கைவிலங்கிடப்பட்ட நிலையில் கடத்திச்செல்லப்பட்டுகொலை செய்யப்பட்டுள்ளதாக கூறப்படும் நபர் தொழில் ரீதியாக முச்சக்கர வண்டிச் சாரதியாக தொழில் புரிந்து வந்துள்ளதுடன் இரு பிள்ளைகளின் தந்தையாவார்.
இதனிடையே சடலமாக மீட்கப்பட்டுள்ள நபர் போதைப் பொருள் வர்த்தகத்துடன் தொடர்புடையவர் என தகவல்கள் தெரிவிக்கின்றன. பிரபல போதைப்பொருள் வர்த்தகரான வெலேசுதாவின் கையாளாக குறித்த நபர் செயற்பட்டுவந்துள்ளதாகவும் அந்த தகவல்கள் சுட்டிக்காட்டுகின்றன.
எவ்வாறாயினும், சம்பவம் தொடர்பில் கல்கிைஸ பொலிஸார் மேலதிக விசாரணைகளை மேற்கொண்டு வருகி ன்றனர்.
நன்றி வீரகேசரி
சர்வதேச விசாரணை வேண்டும் : வட மாகாணசபையில் தீர்மானம்
28/01/2014 இறுதி யுத்தத்தின் போது தமிழ் மக்கள் கொல்லப்பட்டமை தொடர்பிலும் மன்னார் மனிதப்
புதைகுழி விவகாரம் குறித்தும் பக்கச்சார்பற்ற சர்வதேச விசாரணை நடத்தப்படவேண்டும் என்று வட மாகாணசபை அமர்வில் தீர்மானங்கள் நிறைவேற்றப்பட்டுள்ளன.
இறுதி யுத்தம் நடைபெற்ற முள்ளிவாய்க்கால் பகுதியில் உயிரிழந்த மக்களை நினைவுகூருவதற்கு ஏதுவாக அவ்விடத்தில் ஓர் நினைவுச்சின்னம் அமைக்கப்படவேண்டும் என்றும் இங்கு மற்றொரு பிரேரணை உட்பட 12 தீர்மானங்கள் திருத்தங்களுடன் ஏகமனதாக நிறைவேற்றப்பட்டுள்ளன.
வடமாகாண சபையின் ஐந்தாவது அமர்வு நேற்றுக்காலை அவைத் தலைவர் சி.வீ.கே. சிவஞானம் தலைமையில் நடைபெற்றது. முன்னதாக தமிழர் திருநாளான தைப்பொங்கல் தினத்தை முன்னிட்டு அவை மண்டபத்தின் முன்பாக இசைக்கச்சேரி நடைபெற்றது.
நேற்றைய அமர்வில் நெடுந்தீவு தவிசாளர் கொலை வழக்கில் கைதாகி தடுப்புக்காவலில் வைக்கப்பட்டுள்ள வடமாகாண சபை எதிர்க்கட்சித் தலைவர் கந்தசாமி கமலேந்திரன் கலந்து கொண்டார். காலை 9.30 மணிக்கு கூடிய மாகாண சபையில் சபை உறுப்பினர்களால் பிரேரணைகள் முன்வைக்கப்பட்டன.
முல்லைத்தீவு மாவட்ட வடமாகாண சபை உறுப்பினர் து.ரவிகரனால் முன்வைக்கப்பட்ட பிரேரணையில்,
பல்லாயிரக்கணக்கான மக்கள் உயிர்த்தியாகம் செய்த முள்ளிவாய்க்கால் மண்ணில் தங்களுடைய உறவுகளை எண்ணி ஒரு சொட்டுக் கண்ணீருடன் அவர்களை நினைவு கூருவதற்கு ஏதுவாக ஒரு நினைவுச் சின்னம் அமைத்தல் வேண்டும். புதுக்குடியிருப்பு பிரதேச வைத்தியசாலையானது போர்க் காலப் பகுதியில் பல்லாயிரக்கணக்கான மக்களுக்குச் சேவை வழங்கியது. இது இறுதிக்கட்ட யுத்தத்தில் முற்றாக அழிக்கப்பட்டது. தற்போது அங்குள்ள மக்கள் தொகைஇ பயனடையும் நோயாளர் எண்ணிக்கை அனைத்தையும் கவனத்தில் கொண்டு அதனை ஒரு ஆதாரவைத்தியசாலையாகத் தரமுயர்த்த வேண்டும் என்று கோரப்பட்டிருந்தது. இந்த பிரேரணைகள் அவை உப தலைவர் அன்ரனி ஜெகநாதனின் வழி மொழிவுடன் ஏகமனதாக நிறைவேற்றப்பட்டன.
ம. அன்ரனி ஜெயநாதனால் முன்வைக்கப்பட்ட முல்லைத்தீவு மாவட்டத்தில் காணிகளுக்காக விண்ணப்பித்தவர்களுக்கு காணிக் கச்சேரி நடாத்தி காணியை வழங்க வேண்டும் என்ற பிரேரணை முன்வைக்கப்பட்டது. இதேபோல் முதலமைச்சர் விக்கினேஸ்வரனால், இந்த நாட்டில் சட்ட ஒழுங்கு சீர்குலைந்துள்ளது. வடக்கு மக்களின் வாழ்விடங்களில் படையினர் குடியிருப்பதால் அவர்களின் இயல்பு வாழ்க்கை பாதிக்கப்பட்டு வருகின்றது. பாரிய யுத்த அழிவுகளால் பாதிக்கப்பட்ட வடக்கு மக்கள் வடக்கில் நல்லாட்சி நிலவ வேண்டும் என்பதற்காக வடமாகாண சபையைத் தெரிவு செய்து எமக்கு ஆணை வழங்கியுள்ளனர். இந்த மக்களின் உடனடித் தேவைகளை வடக்கு மாகாண சபை நிறைவேற்றவேண்டும். இதற்கு மத்திய அரசின் பூரண ஒத்துழைப்பு வேண்டும்.
பிரித்தானியப் பிரதமர் யாழ்ப்பாணத்திற்கு வருகை தந்து மக்களை சந்தித்தமைக்கு வடமாகாண சபை நன்றி தெரிவிக்கின்றது என்ற பிரேரணை சமர்ப்பிக்கப்பட்டது. இந்தப் பிரேரணைகளும் ஏகமனதாக நிறைவேற்றப்பட்டன.
சர்வதேச விசாரணை வேண்டும்
மாகாணசபை உறுப்பினர் எம்.கே. சிவாஜிலிங்கத்தால் தமிழ்த் தேசத்தின் மீது நடத்தப்பட்டதும் நடந்து கொண்டிருப்பதும் இலங்கை அரசினால் தமிழ் மக்களுக்கு எதிராக மேற்கொள்ளப்படுகின்ற திட்டமிட்ட இன அழிப்பு என்பதனை அனைத்துலக சமூகத்திற்கு நாம் சுட்டிக்காட்டுகின்றோம்.
இலங்கை அரசில் எமக்கு எள்ளளவு நம்பிக்கையும் இல்லை என்பதுடன் எந்தவிதமான உள்நாட்டுப் பொறிமுறைகளும் எமக்கு நீதியையோ அல்லது அரசியல் தீர்வையோ ஒருபோதும் கொடுக்குமென நம்பவே இல்லை. ஆகையால் அனைத்து உள்நாட்டுப் பொறிமுறைகளையும் நாம் அடியோடு ஆணித்தரமாக நிராகரிக்கின்றோம்.
எமது மக்களுக்கு எதிராக இழைக்கப்பட்ட போர்க் குற்றங்கள் மானிடத்திற்கு எதிரான குற்றங்கள் இனப்படுகொலைகள் ஆகியவற்றை விசாரணை செய்வதற்காக பக்கச் சார்பற்ற பன்னாட்டு விசாரணையை ஐக்கிய நாடுகள் சபையின் துணையுடன் உருவாக்குவதற்கு அனைத்துலக சமூகத்தினை நாம் வேண்டுகின்றோம் என்ற பிரேரணை முன்னைக்கப்பட்டது.
உண்மையான கணக்கெடுப்பு வேண்டும்
அனந்தி சசிதரனால், மூன்றாவது முறையாக ஜெனிவா மனித உரிமைகள் மாநாடு நடைபெறவுள்ளதால் முள்ளிவாய்க்காலில் நடைபெற்றது இன அழிப்பு என்பதனை நிரூபிக்கும் வகையிலும் அரச அதிபர்களின் புள்ளி விபரப்படி காணாமற் போனவர்களில் ஒரு இலட்சத்து 46 ஆயிரத்து 679 நபர்களினது நிலையையும் ஆராயும் வகையிலும் அரசின் நீதியற்ற கணக்கெடுப்புக்கு மாறாக எமது மாகாண சபையால் நியாயமான கணக்கெடுப்பு மேற்கொள்ளப்பட்டு ஜெனிவா மாநாட்டிற்கு உண்மை நிலையைத் தெளிவுபடுத்துவதுடன் இன அழிப்புக்குச் சாட்சியாக ஆதாரங்களோடு நாமும் அங்கு செல்வதற்கு வழி வகுக்கவேண்டும் என்பதுடன் மன்னார் மாந்தை ஏ 32 வீதி, திருக்கேதீஸ்வரம் மனிதப் புதை குழிக்கு நம்பகரமான சர்வதேச விசாரணை நடத்தப்படவேண்டும் என்ற பிரேரணை முன்வைக்கப்பட்டது.
மாகாணசபை உறுப்பினர் கலாநிதி சர்வேஸ்வரனால், தமிழ் மொழி இலங்கையின் தேசிய மொழிகளில் ஒன்று என்பதுடன் வடக்கு கிழக்கு மாகாணங்களில் உத்தியோகபூர்வ மொழியாகவும் திகழ்கின்றது. எனினும் இம் மாகாணத்தின் ஊர்கள், தெருக்கள் தனியார் மற்றும் அரச நிறுவனங்களின் பெயர்ப் பலகைகளில் சிங்கள மொழியே முதலிடம் பெற்றுள்ளது.
வடக்கு மாகாணத்தில் அனைத்துப் பெயர்ப் பலகைகளும் முதலில் தமிழிலும் அடுத்து சிங்களத்திலும் மூன்றாவதாக ஆங்கிலத்திலும் குறிப்பிட்ட காலவரையறைக்குள் மாற்றியமைக்கப்படவேண்டும்.
யாழ். மாவட்டத்தில் வலி. வடக்குப் பிரதேசத்தில் விவசாயிகளால் 18 ஆண்டுகளுக்கு முன்னர் கைவிடப்பட்ட கால் நடைகள் இன்று பல்கிப் பெருகி சுமார் 4 ஆயிரம் வரை இருப்பதாக அறிய முடிகிறது. இக்கால்நடைகளை வைத்து மிகப் பெரும் பண்ணைகளை நடத்தி வரும் பாதுகாப்புத்தரப்பினர் தமக்குத் தேவையான பாலை எடுத்துக் கொண்டு எஞ்சியதை விற்பனை செய்வதாகவும் அறியமுடிகின்றது. இதுபோன்று முல்லைத்தீவு மாவட்டத்தில் முத்தையன்கட்டுக் குளத்திற்கு மேற்காக படையினரின் பயிற்சித் தளத்திற்கு அருகில் தமிழ் மக்களின் 2 ஆயிரத்திற்கும் மேற்பட்ட மாடுகளைக் கொண்ட பண்ணையை இராணுவத்தினர் நடத்தி வருவதுடன் அதில் பெறப்படும் பால் அவர்களின் தேவைக்குப் போக ஒரு நாளைக்கு சுமார் 45 ஆயிரம் ரூபாவிற்கு நெஸ்ரில் கம்பனிக்கு விற்பனை செய்யப்படுகின்றது. இவ்விடயம் கடந்த வரவு செலவுத் திட்ட உரையில் பாராளுமன்ற உறுப்பினர் க. சுரேஷ்பிரேமச்சந்திரனால் சுட்டிக்காட்டப்பட்டபோது அதற்கு மத்திய அரசிலிருந்து எதுவித மறுப்பும் தெரிவிக்கப்படவில்லை. எனவே இவ்விரு கால்நடைப் பண்ணைகளையும் மாகாண அரசு பொறுப்பேற்பதற்கு சம்பந்தப்பட்ட அமைச்சர் உரிய நடவடிக்கைகளை விரைந்து மேற்கொள்ள வேண்டும்.
கட்டாக்காலி மாடுகள் தொடர்பாக இரண்டு முக்கிய பிரச்சினைகள் காணப்படுகின்றன. கட்டாக்காலி மாடுகள் என்ற வகைக்குள் மக்கள் வளர்க்கின்ற மாடுகள் கட்டுக்கோப்பின்றி அலையவிடுவதுடன் உரிமை கோரப்படாத மாடுகள் என்பன உள்ளடங்குகின்றன. கட்டாக்காலி மாடுகள் ஒருபுறம் பல்வேறு மாவட்டங்களிலும் விவசாயிகளுக்கும் போக்குவரத்திற்கும் இடையூறாக இருப்பதுடன் தினமும் கள்ளத்தனமாகப் பிடிக்கப்பட்டு இறைச்சியாக்கப்பட்டு வெளிமாவட்டங்களுக்குக் கடத்தப்படுவதுடன் அந்த மாவட்டங்களிலும் இரகசியமாக விற்கப்படுகின்றன. எனவே வடமாகாணத்தில் கட்டாக்காலி மாடுகள் அனைத்தையும் பிடித்து உரிமை கோருபவர்கள் இருந்தால் அவர்களிடமே கையளித்து உரிமை கோரப்படாதவற்றை மாகாண அரசு தனது பொறுப்பில் எடுத்து பண்ணைகள் நடத்தவேண்டும் என்ற பிரேரணை முன்வைக்கப்பட்டது.
மாகாணசபை உறுப்பினர் சுகிர்தனால் , வவுனியா பூந்தோட்டத்தில் கூட்டுறவுப்பயிற்சிக் கல்லூரி மன்னார் கூட்டுறவுச் சபை அலுவலகம் ஆகியவற்றிலிருந்து படைத்தரப்பினர் வெ ளியேறி அவற்றினை சம்பந்தப்பட்டவர்களிடம் கையளிக்கவேண்டும். அத்துடன் அச்சுவேலியில் உள்ள பல நோக்கு கூட்டுறவுச் சங்க காரியாலயம், பலநோக்கு கூட்டுறவுச் சங்கத்தின் எரிபொருள் நிரப்பு நிலையம் ஆகியனவும் சம்பந்தப்பட்டவர்களிடம் கையளிக்கவேண்டும் என்ற பிரேரணையும் சமர்ப்பிக்கப்பட்டது. இந்தப் பிரேரணைகள் திருத்தங்களுடன் சபையில் நிறைவேற்றப்பட்டன.
நன்றி வீரகேசரி
வவுனியாவில் பழங்கால நாணயங்கள் கண்டுபிடிப்பு
28/01/2014 வவுனியா மருக்காரம்பலை பகுதியில் பழங்கால நாணயங்கள் அடங்கிய பானையொன்று நேற்று கண்டுபிடிக்கப்பட்டுள்ளதாக வவுனியா அரசாங்க அதிபர் பந்துல ஹரிச்சந்திர தெரிவித்துள்ளார்.
ஒரு பக்கத்தில் திரிசூலம் சின்னத்தைக் கொண்ட 120 நாணயங்கள் பானையொன்றில் இருந்தது கண்டுபிடிக்கப்பட்டுள்ளன.
வவுனியா தாண்டிக்குளத்தில் இருந்து சாஸ்திரிகூழாங்குளம் - கல்மடு செல்லும் வீதியில் மருக்காரம்பலை பாடசாலைக்கு எதிரில் வீதியோரத்தில் வாய்க்கால் வெட்டும் பணியில் ஈடுபட்டிருந்தவர்களே இந்த நாணயங்களைக் கொண்ட பானையைக் கண்டுள்ளனர்.
இந்தத் தகவல் வவுனியா பிரதேச செயலாளருக்கும் அரசாங்க அதிபருக்கும் அறிவிக்கப்பட்டதையடுத்து சம்பவ இடத்திற்குச் சென்ற வவுனியா அரசாங்க அதிபர் அந்த நாணயங்களைப் பரிசீலனை செய்ததன் பின்னர் செய்தியாளர்களுக்கு இதுபற்றிய தகவல்களைத் தெரிவித்துள்ளார்.
முற்காலத்தைச் சேர்ந்தவையாகக் கருதப்படுகின்ற இந்த நாணயங்கள் இந்திய நாணயங்களாக இருக்கலாம் என்று அவர் சந்தேகம் வெளியிட்டுள்ளார். இந்த நாணயங்கள் வவுனியாவில் உள்ள தொல்பொருள் திணைக்கள அதிகாரிகளிடம் கையளிப்பதற்கு நடவடிக்கை எடுக்கப்பட்டுள்ளதாகவும் வவுனியா அரசாங்க அதிபர் தெரிவித்துள்ளார்.நன்றி வீரகேசரி
மன்னார் மனித புதை குழியில் மேலும் 2 எலும்புக்கூடுகள் கண்டுபிடிப்பு
மன்னார் திருக்கேதீஸ்வரம் மனித புதைகுழி மீண்டும் 17 ஆவது தடவையாக இன்று புதன் கிழமை மன்னார் நீதவான் ஆனந்தி கனகரட்ணம் முன்னிலையில் தோண்டப்பட்டது. இன்று காலை 8.30 மணிமுதல் மதியம் 1 மணிவரை குறித்த புதை குழி தோண்டப்பட்ட போது மேலும் இரண்டு எலும்புக்கூடுகள் உள்ளமை அடையாளம் காணப்பட்டுள்ளது.
இந்த நிலையில் இது வரை மீட்கப்பட்ட மனித எலும்புக்கூடுகளின் எண்ணிக்கை 55 ஆக அதிகரித்துள்ளது. இன்று புதன் கிழமை குறித்த மனித புதை குழி தோண்டப்பட்ட போது அனுராதபுர சட்ட வைத்திய நிபுணர் டி.எல்.வைத்திய ரெட்ண தலைமையிலான குழுவினர் குறித்த இடத்திற்கு சமூகமளிக்கவில்லை. இதனால் அடையாளம் காணப்பட்ட மனித எலும்புக்கூடுகள் மீட்கப்படவில்லை.
இதே வேளை திருக்கேதீஸ்வரம் மனித புதை குழி உள்ள இடத்திற்கு வருகை தந்த குற்ற புலனாய்வுப் பிரிவினர் (சி.ஐ.டி) 5 ஆவது நாளாகவும் இன்று புதன் கிழமை தமது விசாரனைகளை முன்னனொடுத்துள்ளனர். மீண்டும் நாளை வியாழக்கிழமை கிழமை நீதவான் முன்னிலையில் குறித்த பணிகள் 18 ஆவது தடவையாக இடம் பெறவுள்ளமை குறிப்பிடத்தக்கது.
நன்றி வீரகேசரி
No comments:
Post a Comment