மீளப் பயன்படுத்தக்கூடிய பால்கன் 9 ஏவுகணை வெற்றிகரமாக சமுத்திர தளத்தில் மீள தரையிறக்கம்
வடகொரியாவால் கண்டம் விட்டு கண்டம் தாக்கக்கூடிய ஏவுகணை இயந்திரம் வெற்றிகரமாக பரிசோதனை
பள்ளிவாசலுக்கு அருகில் மோதல் ; லண்டனில் பரபரப்பு
பாரிய பணமோசடிக்கு வழிவகுத்து கொடுத்த நிறுவனம் முற்றுகை
400 பேர் அமெரிக்காவில் கைது
வாட்ஸ்ஆப் தடை செய்யப்படுமா ?
ஜப்பானை உலுக்கிய இரு பூமியதிர்ச்சிகள் : 29 பேர் பலி, பலர் காயம், வீடுகளுக்கு சேதம்
சக்திவாய்ந்த நிலநடுக்கம், 30 பேர் பலி : சுனாமி எச்சரிக்கை.!
மீளப் பயன்படுத்தக்கூடிய பால்கன் 9 ஏவுகணை வெற்றிகரமாக சமுத்திர தளத்தில் மீள தரையிறக்கம்
11/04/2016 அமெரிக்க ஸ்பேஸ் எக்ஸ் கம்பனியால் ஏவப்பட்ட மீளப் பயன்படுத்தக்கூடிய ஏவுகணையானது வெற்றிகரமாக சமுத்திர தளமொன்றில் தரையிறங்கியுள்ளது.
அந்த கம்பனியால் இதற்கு முன் மேற்கொள்ளப்பட்ட 4 முயற்சிகள் தோல்வியைத் தழுவியிருந்தன. பால்கன் 9 ஏவுகணையானது அமெரிக்க புளோரிடா மாநிலத்திலுள்ள கனாவெரல் விண்கல ஏவுதளத்திலிருந்து டிரகன் விண்கலத்தின் சகிதம் அந்நாட்டு நேரப்படி வெள்ளிக்கிழமை இரவு ஏவப்பட்டது.
இந்நிலையில் விண்கலத்தை விண்வெளிக்கு எடுத்துச் சென்ற குறிப்பிட்ட ஏவுகணை, பின்னர் அதிலிருந்து பிரிந்து நாசா விண்வெளி நிலையத்தின் சமுத்திரத்தில் மிதக்கும் தளமொன்றில் தரையிறங்கியுள்ளது.
டிரகன் விண்கலம் ஞாயிற்றுக்கிழமை சர்வதேச விண்வெளி நிலையத்தைச் சென்றடைந்தது. அந்த ஏவுகணை வெற்றிகரமாக மிதக்கும் தளத்தில் தரையிறங்கியதும் ஸ்பேஸ் எக்ஸ் நிறுவனத்தின் கலிபோர்னிய ஹாவ்தோர்ன் நகரிலுள்ள கட்டுப்பாட்டு நிலையத்திலிருந்த அதிகாரிகளும் உத்தியோகத்தர்களும் 'அமெரிக்கா, அமெரிக்கா, அமெரிக்கா' என கோஷம் எழுப்பியவாறு மகிழ்ச்சி ஆரவாரம் செய்தனர்.
இது மீள உபயோகப்படுத்தக் கூடிய ஏவுகணைகள் தொடர்பான வரலாற்றின் புரட்சிகர ஆரம்பமாக கருதப்படுகிறது. நன்றி வீரகேசரி
வடகொரியாவால் கண்டம் விட்டு கண்டம் தாக்கக்கூடிய ஏவுகணை இயந்திரம் வெற்றிகரமாக பரிசோதனை
11/04/2016 வட கொரியாவானது அணு ஆயுதங்களை ஏந்தியவாறு கண்டம் விட்டு கண்டம் சென்று தாக்கக்கூடிய ஏவுகணையொன்றுக்காக வடிவமைக்கப்பட்டுள்ள இயந்திரமொன்றை வெற்றிகரமாக பரிசோதித்துள்ளது.
இந்தப் புதிய இயந்திரமானது அமெரிக்காவின் பிரதான நிலப் பகுதி மீது அணு ஆயுத தாக்குதலொன்றை நடத்துவதற்கான அந்நாட்டின் வல்லமைக்கு உத்தரவாதம் அளிக்கக்கூடியதாக உள்ளதாக கே.சி.என்.ஏ. செய்தி முகவர் நிலையம் செய்தி வெளியிட்டுள்ளது. இந்த இயந்திரப் பரிசோதனையானது அந்நாட்டின் மேற்கு கடற்கரைக்கு அருகிலுள்ள நீண்ட தூர ஏவுகணைகளை ஏவுவதற்கான தளத்தில் நடத்தப்பட்டுள்ளது.
இது அந்த நாட்டால் மேற்கொள்ளப்பட்ட ஒரு தொகை ஏவுகணை பரிசோதனைகளில் பிந்திய பரிசோதனையாகும். இந்நிலையில் வட கொரியாவின் இந்த செயற்பாட்டிற்கு அமெரிக்கா கடும் கண்டனம் தெரிவித்துள்ளது.
"இத்தகைய நடவடிக்கைகளை கைவிடும்படி வடகொரியாவுக்கு அழைப்பு விடுக்கிறோம். இது அந்தப் பிராந்தியத்தின் ஸ்திரத்தன்மை மேலும் குலையவே வழிவகை செய்வதாக உள்ளது" என தன்னால் வெளியிடப்பட்டுள்ள அறிக்கையில் குறிப்பிட்டுள்ள அமெரிக்கா, வட கொரியாவின் இந்த அத்துமீறல் நடவடிக்கை குறித்து கடும் நடவடிக்கை எடுக்கப்படும் என எச்சரித்துள்ளது.
மேற்படி இயந்திரத்தின் பரிசோதனை நடவடிக்கையானது வட கொரியத் தலைவர் கிம் யொங்–உன்னின் மேற்பார்வையின் கீழ் மேற்கொள்ளப்பட்டதாக அந்நாட்டு அரசாங்க ஊடகம் செய்தி வெளியிட்டுள்ளது.
அமெரிக்கா மீது அணு ஆயுதத்தை ஏந்திச் செல்லக்கூடிய ஏவுகணை மூலம் தாக்குதலை நடத்துவதற்கு தேவையான ஆற்றலை பெறும் இலக்கை வட கொரியா படிப்படியாக பூர்த்தி செய்து வருவதாக கிம் யொங் –உன் தெரிவித்ததாக அந்த ஊடகம் குறிப்பிட்டுள்ளது.
“எமது நாடு தற்போது அமெரிக்க பிரதான நிலப் பகுதி உள்ளடங்கலாக உலகின் எந்தவொரு பிசாசுகளின் சாக்கடைகுழியையும் தனது தாக்குதல் தூரத்துக்கு கொண்டு வந்துள்ளது" என அவர் கூறியதாக அந்த ஊடகம் மேலும் தெரிவித்தது. நன்றி வீரகேசரி
பள்ளிவாசலுக்கு அருகில் மோதல் ; லண்டனில் பரபரப்பு
13/04/2016 லண்டனிலுள்ள பள்ளிவாசலொன்றுக்கு வெளியில் அந்நாட்டு வலதுசாரி குழுவுக்கும் முஸ்லிம்களுக்குமிடையே உக்கிர மோதலொன்று இடம்பெற்றுள்ளது.
பள்ளிவாசல்களுக்கு இனிமேலும் இடமில்லை எனக் குறிப்பிடும் பதாகைகளை ஏந்தியவாறு வைட்சபெல் எனும் இடத்தில் குறிப்பிட்ட பள்ளிவாசல் அமைந்துள்ள வீதிக்கு வந்த பிரிட்டன் பெர்ஸ்ட் அமைப் பைச் சேர்ந்த செயற்பாட்டாளர்கள், அந்தப் பள்ளிவாசலில் தொழுகையில் ஈடுபடுவதற்கு வந்தவர்களுடன் மோதலில் ஈடுபட்டுள்ளனர். இதன்போது அந்தக் குழுவினரில் ஒருவர் நபரொருவரை தனது காலால் உதைப்பதை படத்தில் காணலாம்.
நன்றி வீரகேசரி
பாரிய பணமோசடிக்கு வழிவகுத்து கொடுத்த நிறுவனம் முற்றுகை
13/04/2016 உலகில் பாரிய நிதி மோசடிக்கு வழிவகுத்து கொடுக்க உதவிய பனாமாவில் உள்ள மோசெக் பொன்சேகா சட்ட நிறுவனத்தை அந் நாட்டு பொலிஸார் நேற்று முற்றுகையிட்டுள்ளனர்.
உலகலாவிய ரீதியில் சர்ச்சையை ஏற்படுத்தியுள்ள பனாமா பணமோசடி சம்பவத்தை அந் நாட்டு பத்திரிகை ஒன்று அண்மையில் வெளிப்படுத்தியதை தொடர்ந்து பல நாடுகள் தற்போது விசாரணைகளை ஆரம்பித்துள்ளது.
உலகில் முக்கிய செல்வந்தர்கள், விளையாட்டு வீரர்கள், மற்றும் நடிகர் நடிகைகள் என பல பேர் தமது கணக்கில் வரதா சொத்துகளை பனாமாவில் மறைத்து வைத்திருந்தமை அண்மையில் வெளியாகியிருந்தமை குறிப்பிடத்தக்கது. நன்றி வீரகேசரி
400 பேர் அமெரிக்காவில் கைது
14/04/2016 அமெரிக்காவில் காங்ரஸ் வாரியத்தின் முன்னதாக நாட்டின் அரசியல் நிலைமை மற்றும் நிதி மோசடி தொடர்பில் எதிர்ப்பு போராட்டத்தை முன்னெடுத்தவர்களில் 400 மேற்ப்பட்டவர்களை அந்த நாட்டு பொலிஸார் கைது செய்துள்ளனர்.
நன்றி வீரகேசரி
வாட்ஸ்ஆப் தடை செய்யப்படுமா ?
14/04/2016 ஸ்மார்ட்போனில் குறுந்தகவல் அனுப்ப பெரும்பாலானோர் பயன்படுத்தும் செயலியாக வாட்ஸ்ஆப் இருக்கின்றது.
இந்தியாவில் மட்டுமே சுமார் 7 கோடிக்கும் அதிகமானோர் வாட்ஸ்ஆப் செயலியை பயன்படுத்தி வருகின்றனமை குறிப்பிடத்தக்கது. அதுமற்றுமன்றி வாட்ஸ்ஆப் பயனர்களின் எண்ணிக்கையும் நாளுக்கு நாள் அதிகரித்து கொண்டே இருக்கின்றது என்பதும் குறிப்பிடத்தக்கது.
அந்த வகையில் வாட்ஸ்ஆப் செயலியானது சமீபத்தில் முழுமையான என்க்ரிப்ஷன் (encryption) சேவையை சில தினங்களுக்கு முன் அறிவித்தது.
இதன் மூலம் வாட்ஸ்ஆப் வாடிக்கையாளர்களின் அனைத்து குறுந்தகவல்களும் முழுவதுமாக பாதுகாக்கப்படுகின்றது.
வாட்ஸ்ஆப் நிறுவனத்தின் புதிய என்க்ரிப்ஷன் சேவை வழங்கப்பட்டது முதல் இந்த செயலி இந்தியாவில் தடை செய்யப்படுவது குறித்து ஏராளமான தகவல்கள் இணையத்தில் உலவி வருகின்றது.
உண்மையில் வாட்ஸ்ஆப் இந்தியாவில் தடை செய்யப்படுமா, இல்லையா.? நன்றி வீரகேசரி
ஜப்பானை உலுக்கிய இரு பூமியதிர்ச்சிகள் : 29 பேர் பலி, பலர் காயம், வீடுகளுக்கு சேதம்
16/04/2016 தென் ஜப்பானை வியாழக்கிழமை நள்ளிரவு கடந்த நிலையில் தாக்கிய அதி சக்திவாய்ந்த 6.4 ரிச்டர் பூமியதிர்ச்சியிலும் இன்று சனிக்கிழமை காலை இடம்பெற்ற 7.3 ரிச்டர் பூமியதிர்ச்சியிலும் சிக்கி குறைந்தது 29 பேர் பலியானதுடன் 1000 ற்கும் அதிகமானோர் காயமடைந்துள்ளனர்.
காயமடைந்தவர்களில் பலரின் நிலைமை கவலைக்கிடமாக உள்ளதாக மருத்துவ மனை வட்டாரங்கள் தெரிவிக்கின்றன.
இந் தப் பூமியதிர்ச்சிகளால் கட்டடங்கள் பலவும் இடிந்து விழுந்ததுடன் மின்சார இணைப்புகளும் சேதத்துக்குள்ளாகியுள்ளன.
இந்நிலையில் இடிந்து விழுந்த கட்டடங்களின் இடிபாடுகளின் கீழ் மேலும் பலர் சிக்கியிருக்கலாம் என அஞ்சப்படுகிறது.
இந்த பூமியதிர்ச்சிகளால் பல வீடுகள் இடிந்து விழுந்ததுடன் இரு தீ அனர்த்த சம்பவங்களும் இடம்பெற்றுள்ளன. நன்றி வீரகேசரி
சக்திவாய்ந்த நிலநடுக்கம், 30 பேர் பலி : சுனாமி எச்சரிக்கை.!
17/04/2016 தென் அமெரிக்காவின் வடக்கு கடற்கரையோர நகரமான ஈக்குவேடர் நாட்டில் இன்று அடுத்தடுத்து தாக்கிய இரு நிலநடுக்கங்களால் 30 பேர் பலியாகியுள்ளனர்.
தலைநகர் குவிட்டோவில் இருந்து 173 கிலோமீட்டர் வடமேற்கே பூமியின் அடியில் சுமார் 20 கிலோமீட்டர் ஆழத்தில் முதலில் ஒரு மிதமான நிலநடுக்கமும், அதற்கடுத்த சில நிமிடங்களில் சக்திவாய்ந்த மற்றொரு நிலநடுக்கமும் ஏற்பட்டதாக பசிபிக் பெருங்கடல் சுனாமி எச்சரிக்கை மையம் அறிவித்துள்ளது.
இன்று காலை சுமார் 6.30 அளவில் முதலில் ஏற்பட்ட நிலநடுக்கம் 4.8 ரிக்டராகவும், இரண்டாவதாக ஏற்பட்ட நிலநடுக்கம் 7.8 ரிக்டராகவும் பதிவாகியுள்ளது. இவ்விரு நிலநடுக்கங்களால் குவிட்டோ நகரில் உள்ள வீடு, கட்டிடங்கள் குலுங்கின. பீதியடைந்த மக்கள் வீடுகளைவிட்டு ஓடிவந்து வீதிகளில் தஞ்சம் அடைந்தனர்.
ஈக்குவேடரின் வர்த்தக நகரமான குயாகுவில் நகரில் ஒரு பாலம் இடிந்து விழுந்தது. மன்ட்டா நகரில் உள்ள விமான நிலையத்தில் கட்டுப்பாட்டு அறை கோபுரம் சாய்ந்து விழுந்தது.
மேற்கண்ட மூன்று நகரங்களிலும் பல வீடுகள் இடிந்து நாசமடைந்த நிலையில், இடிபாடுகளில் சிக்கி சுமார் 30 பேர் பலியானதாக உள்ளூர் ஊடகங்கள் செய்தி வெளியிட்டுள்ளன. இந்த நிலநடுக்கத்தின் தாக்கம் அண்டைநாடான பெருவின் வடபகுதிகளிலும் உணரப்பட்டதாக அந்த செய்திகள் குறிப்பிடுகின்றன.
இன்றைய நிலநடுக்கம் தாக்கிய பகுதியில் இருந்து சுமார் 300 கிலோமீட்டர் சுற்றளவில் உள்ள கடலோரப் பகுதிகளில் பேரலைகள் எழக்கூடும் என மதிப்பிடப்பட்டுள்ளதால், அப்பகுதிகளில் சுனாமி எச்சரிக்கை விடுக்கப்பட்டுள்ளது. நன்றி வீரகேசரி
