ரஷ்ய விமானம் வெளிக்காரணிகளாலேயே நடுவானில் பிளவடைந்து விழுந்து அனர்த்தத்துக்குள்ளாகியுள்ளது
தென் சூடான் விமான விபத்தில் 40 பேர் பலி
ஆப்கானில் திருமணத்துக்கு அப்பாலான உறவுக்காக இளம் பெண்ணுக்கு கற்களால் எறிந்து மரணதண்டனை
ரஷ்ய விமானம் வெளிக்காரணிகளாலேயே நடுவானில் பிளவடைந்து விழுந்து அனர்த்தத்துக்குள்ளாகியுள்ளது
03/11/2015 எகிப்தில் கடந்த சனிக்கிழமை விழுந்து நொறுங்கிய ரஷ்ய விமானம் வெளிக் காரணிகளால் நடுவானில் உடைந்து வீழ்ந்துள்ளதாக அந்த விமானத்தைச் செயற்படுத்தி வரும் விமான சேவை நிறுவனம் நேற்று திங்கட்கிழமை தெரிவித்துள்ளது.
அந்த விமானம் நடுவானில் உடைந்து விழுந்தமைக்கு தொழில்நுட்பக் கோளாறு ஒரு காரணமாக இருக்க முடியாது என கொகலிமவியா சார்ட்டர் விமானசேவையின் பணிப்பாளர் அலெக்ஸாண்டர் சிமிர்னோவ் கூறினார்.
இது விமானத்துக்கு வெளியில் இடம்பெற்ற நடவடிக்கையொன்றால் மட்டுமே ஏற்பட்ட அனர்த்தம் எனத் தெரிவித்த அவர், மேலதிக தகவல் எதனையும் வெளியிட மறுத்துள்ளார்.
இந்நிலையில் அவரது கூற்று அந்த விமா னத்தை தாமே சுட்டு வீழ்த்தியதாக ஐ.எஸ். தீவிரவாதிகள் உரிமை கோரியுள்ளதை உறு திப்படுத்துவதாக உள்ளதாக அரசியல் அவ தானிகள் சிலர் விமர்சிக்கின்றனர். இந்த விமான அனர்த்தம் தொடர்பில் விசாரணையாளர்கள் தீவிர விசாரணைகளை முன்னெடுத்துள்ள நிலையில், அந்த விமான அனர்த்தத்தில் கொல்லப்பட்ட 144 பேரின் சடலங்கள் ரஷ்ய நகரான சென்பீற்றர்ஸ்பேர்க்கிற்கு கொண்டு செல்லப்பட்டுள்ளன.
இந்த எயார் பஸ் 321 விமானம் எகிப்திய வட சினாய் தீபகற்பத்தில் விழுந்து நொறுங்கியதில் அதில் பயணம் செய்த 224 பேரும் உயிரிழந்துள்ளனர். பலியானவர்களில் அநேகர் ரஷ்யர்களாவர்.
மேற்படி அனர்த்தத்தையொட்டி ரஷ்யாவில் ஞாயிற்றுக்கிழமை ஒரு நாள் துக்க தினம் அனுஷ்டிக்கப்பட்டது.
அந்த விமானம் நடுவானில் பிளந்து கீழே விழுந்துள்ளதாக ரஷ்ய விமானப் போக்குவரத்து முகவர் நிலையத்தின் தலைவர் அலெக்ஸாண்டர் நெராட்கோ தெரிவித்தார்.
மேற்படி விமானத்தில் பயணித்து உயிரிழந்தவர்களில் 25 சிறுவர்கள் உட்பட 217 பயணிகளும் 7 விமான ஊழியர்களும் உள்ளடங்குகின்றனர். பயணிகளில் 4 பேர் உக்ரேனியர்களாவர். ஒருவர் பெலாரஸைச் சேர்ந்தவராவார்.
இந்நிலையில் இந்த விமான அனர்த்தத்தில் உயிரிழந்தவர்களில் ஒரு பகுதியினரின் சடல எச்சங்களுடன் ரஷ்ய அரசாங்க விமானமொன்று சென் பீற்றர்ஸ்பேர்க் நகரிலுள்ள புல்கொவோ விமான நிலையத்தில் திங்கட்கிழமை காலை தரையிறங்கியுள்ளது.
அதேசமயம் அன்றைய தினம் மாலை எஞ்சிய சடல எச்சங்களுடன் பிறிதொரு விமானம் சென் பீற்றர்ஸ்பேக் நகரை வந்தடைந்துள்ளது.
அந்த சடலங்கள் உறவினர்கள் அடையாளம் காண்பதற்காக அந்நகரிலுள்ள மயானத்துக்கு கொண்டு செல்லப்பட்டன.
இந்நிலையில் இந்த விமான அனர்த்தத்தில் உயிரிழந்தவர்களின் குடும்பங்களுக்கு நஷ்டஈட்டை வழங்குவதுடன் மரணச்சடங்குகளுக்கான ஏற்பாடுகளை செய்து தரவுள்ளதாக ரஷ்யா தெரிவிக்கிறது.
கடந்த சனிக்கிழமை ஷராம் எல் ஷெய்க் பிராந்தியத்திலிருந்து சென் பிற்றர்ஸ்பேர்க் நகரை நோக்கிச் சென்ற வேளை விழுந்து நொறுங்கிய அந்த விமானத்தின் சிதைவுகள் 20 சதுர கிலோமீற்றர் பரப்பளவில் சிதறியிருக்கக் காணப்பட்டன. இதுவரை 163 சடலங்கள் மீட்கப்பட்டுள்ளன.
மேற்படி விமானத்தின் கறுப்புப் பெட்டி பதிவுகருவிகள் கண்டுபிடிக்கப்பட்டு பகுப்பாய்வுக்காக அனுப்பப்பட்டுள்ளன.
இந்த விமான அனர்த்தம் இடம்பெற்று சிறிது நேரத்தில் அந்த விமானத்தை தாமே சுட்டு வீழ்த்தியதாக ஐ.எஸ். தீவிரவாதிகள் உரிமை கோரியிருந்தனர்.
ஆனால் எகிப்பதிய பிரதமர் ஷரீப் இஸ்மாயில் தரையிலிருந்து சுமார் 31,000 அடி உயரத்தில் பறந்த விமானத்தை சுட்டு வீழ்த்தக்கூடிய ஆயுதங்கள் எதுவும் ஐ.எஸ். தீவிரவாதிகளிடம் இருப்பதற்கு சாத்தியமில்லை என நிபுணர்கள் கூறுவதாக தெரிவித்துள்ளார்.
இது தொடர்பில் ஐ.எஸ். தீவிரவாதிகளால் வெளியிடப்பட்டுள்ளதாக கூறப்படும் வீடியோ காட்சி தொடர்பிலும் அவர் மறுப்புத் தெரிவித்துள்ளார்.
அந்த வீடியோ காட்சி ஐ.எஸ். தீவிரவாதிகளின் உத்தியோகபூர்வ வீடியோ காட்சியாக தோன்றவில்லை என நிபுணர்கள் தெரிவிக்கின்றனர். அந்த வீடியோ காட்சி ஐ.எஸ். தீவிரவாதிகளின் உத்தியோகபூர்வ இணையத்தளங்கள் எவற்றிலும் காணப்படவில்லை என அவர்கள் கூறுகின்றனர்.
இந்நிலையில் எமிரேட்ஸ் எயார் பிரான்ஸ், கே.எல்.எம்., லுப்தான்ஸா மற்றும் கட்டார் எயார்வேய்ஸ் ஆகிய விமான சேவைகள் மேலதிக தகவல் எதுவும் கிடைக்கும் வரை சினாய் தீபகற்பத்துக்கு மேலாக தமது விமானங்களை சேவையில் ஈடுபடுத்துவதில்லை எனத் தீர்மானித்துள்ளன.
குறிப்பிட்ட ரஷ்ய விமானம் பறந்த அதே பாதையில் ஜேர்மனிய விமானங்கள் பயணத்தை மேற்கொள்ள மாட்டாது என ஜேர்மனிய போக்குவரத்து அமைச்சு தெரிவித்தது.
அதேசமயம் பிரித்தானிய எயார்வேய்ஸ் விமான சேவை இது தொடர்பில் தெரிவிக் கையில், தனது விமானங்களின் பயணப் பாதைகளின் பாதுகாப்பு குறித்து தாம் ஒழுங்கு முறையில் மதிப்பீடுகளை மேற்கொண்டு வருவதாக தெரிவித்தது. நன்றி வீரகேசரி
தென் சூடான் விமான விபத்தில் 40 பேர் பலி
04/11/2015 தென் சூடானின் ஜூபா விமான நிலையத்திலிருந்து புறப்பட்டுச் சென்ற சரக்கு விமானம் விபத்துக்குள்ளானதில் 40 பேர் உயிரிழந்திருக்கலாம் என சர்வதேச ஊடகங்கள் செய்தி வெளியிட்டுள்ளன.
ஓடுபாதையிலிருந்து 800 மீற்றர் தூரத்திலேயே குறித்த விபத்து இடம்பெற்றுள்ளமை குறிப்பிடத்தக்கது.
நன்றி வீரகேசரி
ஆப்கானில் திருமணத்துக்கு அப்பாலான உறவுக்காக இளம் பெண்ணுக்கு கற்களால் எறிந்து மரணதண்டனை
05/11/2015 ஆப்கானிஸ்தானில் தலிபான் தீவிரவாதிகளின் கட்டுப்பாட்டிலுள்ள பிராந்தியத்தில் திருமணத்துக்கு அப்பாலான உறவில் ஈடுபட்டமைக்காக இளம் பெண்ணொருவருக்கு கற்களால் எறிந்து மரணதண்டனை நிறைவேற்றப்பட்டுள்ளது.
பிரோஸொக் பிராந்தியத்தில் நிறைவேற்றப்பட்ட மேற்படி மரணதண்டனையை வெளிப்படுத்தும் 30 செக்கன் வீடியோ காட்சி இணையத்தளங்களில் வெளியிடப்பட்டுள்ளது.
ரொக்ஸஹனா என்ற மேற்படி 19 வயதுக்கும் 21 வயதுக்கும் இடைப்பட்ட வயதுடையவராகத் தோன்றும் குறிப்பிட்ட பெண், தரையில் ஏற்படுத்தப்பட்டிருந்த குழியொன்றில் அமர்ந்திருக்க, சுமார் 15 ஆண்கள் அவர் மீது கற்களை வீசி அவருக்கு மரண தண்டனை நிறைவேற்றுவதை இந்த வீடியோ காட்சி வெளிப்படுத்துகிறது. அந்த வீடியோ காட்சியில் கற்கள் உடல் மீது படுகையில் அந்தப் பெண் உச்ச ஸ்தாயியில் கூக்குரலிட்டு அழுகிறார்.
அங்கு இவ்வாறு திருமணத்துக்கு அப்பாலான உறவு குறித்து பெண்ணொருவருக்கு கற்களால் எறிந்து மரணதண்டனை நிறைவேற்றப்படு வது இந்த வருடத்தில் இதுவே முதல் தடவையாகும். நன்றி வீரகேசரி
No comments:
Post a Comment