உறவு சொல்ல ஒருவன் - பொன் விழா ஆண்டில் இந்த படங்கள் - ச. சுந்தரதாஸ்

 

நட்சத்திர நடிகர்களின் படங்களுக்கு மத்தியில் , சிறிய பஜெட்டில் , குறைத்த ஊதியத்தில் நடிக்கும் நடிகர்களை வைத்து படம் எடுத்து வெற்றி காணும் புது இயக்குநர்கள் தேவராஜ் மோகன். இவர்கள் இருவரும் பெரும்பாலும் முத்துராமன், சிவகுமார் இருவர் நடிப்பில் தான் படங்களை டைரக்ட் செய்து கொண்டிருக் கொண்டிருந்தார்கள். பிரபல டைரக்டர் பி. மாதவனிடம் நீண்ட காலம் உதவியாளர்களாக இருந்த இவ்விருவரும் அவர் தயாரிப்பில் இயக்கிய பொண்ணுக்கு தங்க மனசு படம் வெற்றி பெற்றதை தொடர்ந்து அடுத்து இயக்கிய படம் உறவு சொல்ல ஒருவன். 

 1975ம் ஆண்டு வெளிவந்த சிறந்த படங்களுள் ஒன்றாக இப் படம் கணிக்கப்பட்டது. குறிப்பாக எல்லாப் படங்களையும் கிண்டல் பண்ணி, குறை சொல்லி விமர்சனம் செய்யும் குமுதம், கல்கி போன்ற வார இதழ்களே இந்தப் படத்தை பாராட்டி எழுதியது வசிஷ்டர் வாயால் பிரம்மரிஷி என்பதாயிற்று. 


நர்ஸ் வேலை பார்க்கும் இந்திராவுக்கு வாழ்வில் செல்வமும்,

செல்வாக்கும் நிறைந்த ஒருவனை மணந்து ஆடம்பரமாக வாழ வேண்டும் என்ற ஆசை. இதனால் தன்னை விரும்பி காதலிக்கும் கிளார்க் வேலை செய்யும் பாஸ்கரின் காதலை துச்சமென நிராகரிக்கிறாள். போலி வாழ்க்கை நடத்தும் மோகனின் காதலை ஏற்கிறாள். ஆனால் அவன் ஒரு செல்லாக் காசு என்பதை அறிந்ததும் அதிர்ச்சியடைகிறாள். ஆனாலும் அவளின் ஆசை அடங்குவதாக இல்லை. தன் பராமரிப்பில் இருக்கும் நோயாளியான கோடீஸ்வரி சுமதியை தன் காதலன் மோகனுக்கு மணம் முடித்து கொடுக்கத் திட்டமிடுகின்றாள். சுமதி நோயால் இறந்ததும் சொத்துகள் யாவும் மோகனுக்கு வரும், அவனை மணந்து இன்ப வாழ்வு காணலாம் என்று மனக் கோட்டை கட்டுகிறாள். இதற்காக தன் காதலனையே பணயம் வைத்தது சூதாடுகிறாள். மோகன், சுமதி கல்யாணம் நடக்கிறது. ஆனால் இந்திராவின் ஆசை நிறைவேறியதா என்பதுதான் மீதி படம். 


அனைத்துக்கும் ஆசைப் படு என்பது போல் ஆசைப்படும் இந்திரவாக பத்மப்ரியா நடித்திருந்தார். அழகு, கவர்ச்சி இரண்டும் சேர அவரின் நடிப்பும் பாத்திரத்துடன் பொருந்தியது. இந்தப் படத்தில் தான் பத்மப்ரியாவின் பாத்திரமும், நடிப்பும் சோபித்தது எனலாம். ஆனால் சுமதியாக வரும் சுஜாதா பாத்திரமாகவே மாறி விட்டார். நோயாளி என்றால் இப்படித்தான் இருப்பாள் என்பதை நிரூபிக்கும் விதத்தில் அவரின் நடிப்பு உச்சம் தொட்டது. நோயாளியாக அவர் தோன்றும் காட்சிகள் எல்லாம் நெகிழ்ச்சியும், பச்சாதாபமும் ஏற்படுகிறது. அவள் ஒரு தொடர்கதை , மயங்குகிறாள் ஒரு மாது படங்களைத் தொடர்ந்து இந்தப் படம் சுஜாதாவுக்கு மற்றுமோர் மைல் கல்லானது . 

  மோகனாக வரும் முத்துராமன் சீரியஸாகவும், காமெடியாகவும்

நடிக்கிறார். அவருடன் வரும் சோ ஜோடியின்றி தனித்து நிற்கிறார். சிவகுமார் கௌரவ நடிகர் என்றால் அவரின் நடிப்பு, வேடம் இரண்டும் கௌரவமாக இருக்கிறது. இவர்களுடன் தாம்பரம் லலிதா, செந்தாமரை, எஸ் .என் .லஷ்மி, விஜயன், எஸ் .வரலஷ்மி ஆகியோரும் நடித்திருந்தனர். 

 படத்தில் வில்லன் இல்லை, அடிதடி இல்லை, கவர்ச்சி நடனமும் இல்லை! ஆனாலும் படம் சுவாரஸ்யமாகவே நகர்கிறது. 


படத்துக்கு வசனம் பஞ்சு அருணாசலம். அவரின் படிப்படியான வெற்றிக்கு இப் படம் ஒரு சான்று. விஜயபாஸ்கரின் இசையில் , கே. ஜே . ஜேசுதாஸ் பாடிய மோகன புன்னகை ஊர்வலமே பாடல் இதமாக ஒலித்தது. பிலிமாலயா என்ற சினிமா பத்திரிக்கையின் அதிபர் ராமசந்திரன் , பஞ்சு அருணாசலத்துடன் இணைந்து படத்தை தயாரித்தார். 

 வெற்றி பட இயக்குனர் ஸ்ரீதர், அவரின் வழித்தோன்றல் பி. மாதவன்,

அவரின் சீடர்கள் தேவராஜ், மோகன் என்று மூன்றாவது தலை முறையாக உருவான தேவராஜ், மோகன் இருவரும் இணைந்து தமிழ் திரைப் படப் பாணியில் ஒரு புது பரிணாமத்தை படைத்திருந்தார்கள். ரசிகர்களும் அதனை ஏற்றுக் கொண்டார்கள்!