பாப்பாப் பாடல்கள்

 

 

 

 

 

 

மாகாகவி சுப்ரமணியபாரதியார்  பாடிய

பாப்பாப் பாடல்கள்

 

ஓடி விளையாடு பாப்பா! - நீ

ஓய்ந்திருக்க லாகாது பாப்பா!

கூடிவிளையாடு பாப்பா! - ஒரு

குழைந்தையை வையாதே பாப்பா!     1

சின்னஞ் சிறுகுருவி போலே - நீ

திரிந்து பறந்துவா பாப்பா!

வன்னப் பறவைகளைக் கண்டு - நீ

மனதில் மகிழ்ச்சிகொள்ளு பாப்பா!      2

கொத்தித் திரியுமந்தக் கோழி - அதைக்

கூட்டி விளையாடு பாப்பா!

எத்தித் திருடுமந்தக் காக்காய் - அதற்கு

இரக்கப் படவேணும் பாப்பா!             3

 

பாலைப் பொழிந்துதரும்இ பாப்பா! - அந்தப்

பசுமிக நல்லதடி பாப்பா!

வாலைக் குழைத்துவரும் நாய்தான் - அது

மனிதர்க்குத் தோழனடி பாப்பா!           4

 

வண்டி இழுக்கும் நல்ல குதிரை  - நெல்லு

வயலில் உழுதுவரும் மாடு

அண்டிப் பிழைக்கும் நம்மை ஆடு  - இவை

ஆதரிக்க வேணுமடி பாப்பா!                5

 

காலை எழுந்தவுடன் படிப்பு - பின்பு

கனிவு கொடுக்கும் நல்ல பாட்டு

மாலை முழுதும் விளையாட்டு - என்று

வழக்கப் படுத்திக்கொள்ளு பாப்பா!          6

 

பொய்சொல்லக் கூடாது பாப்பா! - என்றும்

புறஞ்சொல்ல லாகாது பாப்பா!

தெய்வம் நமக்குத்துணை பாப்பா!- ஒரு

தீங்குவர மாட்டாது பாப்பா!                                        7

பாதகஞ் செய்பவரைக் கண்டால் - நாம்

பயங்கொள்ள லாகாது பாப்பா!

மோதி மிதித்துவிடு பாப்பா! - அவர்

முகத்தில் உமிழ்ந்துவிடு பாப்பா!                8

 

துன்பம் நெருங்கிவந்த போதும் - நாம்

சோர்ந்துவிட லாகாது பாப்பா!

அன்பு மிகுந்ததெய்வ முண்டு - துன்பம்

அத்தனையும் போக்கிவிடும் பாப்பா!             9

 

சோம்பல் மிகக்கெடுதி பாப்பா!- தாய்

சொன்ன சொல்லைத் தட்டாதே பாப்பா!

தேம்பி யழுங்குழந்தை நொண்டி - நீ

திடங்கொண்டு போராடு பாப்பா!                  10

 

தமிழ்த்திரு நாடுதன்னைப் பெற்ற - எங்கள்

தாயென்று கும்பிடடி பாப்பா!

அமிழ்தில் இனியதடி பாப்பா! - நம்

ஆன்றோர்கள் தேசமடி பாப்பா!                      11

 

சொல்லில் உயர்வுதமிழ்ச் சொல்லே - அதைத்

தொழுது படித்திடடி பாப்பா!

செல்வம் நிறைந்த ஹிந்துஸ் தானம் - அதைத்

தினமும் புகழ்ந்திடடி பாப்பா!                       12

 

வடக்கில் இமயமலை பாப்பா! - தெற்கில்

வாழும் குமரிமுனை பாப்பா!

கிடக்கும் பெரியகடல் கண்டாய் - இதன்

கிழக்கிலும் மேற்கிலும் பாப்பா!                      13

 

வேத முடையதிந்த நாடு - நல்ல

வீரர் பிறந்ததிந்த நாடு

சேதமில் லாதஹிந்துஸ் தானம் - இதைத்

தெய்வமென்று கும்பிடடி பாப்பா!                    14

 

சாதிகள் இல்லையடி பாப்பா! - குலத்

தாழ்ச்சி உயர்ச்சிசொலல் பாவம்

நீதி உயர்ந்தமதி கல்வி - அன்பு

நிறைய உடையவர்கள் மேலோர்                     15

 

உயிர்க ளிடத்திலன்பு வேணும் - தெய்வம்

உண்மை யென்றறிதல் வேணும்

வயிர முடையநெஞ்சு வேணும் - இது

வாழும் முறைமையடி பாப்பா!

-----------------------------------------------------------------------------------------------------------                         

    

*தொடர்ந்து படியுங்கள்--

கீழே 22 பாப்பாப் பாடல்கள்

இயற்றியவர்  -- மருத்துவக்கலாநிதி  பாரதி இளமுருகனார்

  

                           

 

பாரதி இளமுருகனார் இயற்றிய பாப்பாப் பாடல்கள்

 

ஓடி ஆடிவிளை யாடு  - என்றும்

ஓற்றுமை தனைநாடு பாப்பா!

தேடி நல்லவரைக் கூடு – துணை

தெய்வம் எனப்பாடு பாப்பா!              1)

காலை யெழுந்துகடன் முடிப்பாய் - பின்பு

கடவுள் தொழுது பாடம் படிப்பாய்

மாலை உடற்பயிற்சி செய்வாய் - இதை

மனதிற் கொண்டிடடி பாப்பா!      2)

        

                                                

ஈழம் எங்களுயிர் நாடு – அதை

என்றும்  மறவாதே பாப்பா!

வாழும் செம்மைமொழி தமிழே – அதை

வாழ்த்தி வளர்த்திடடி பாப்பா!        3)

அன்னை மொழியின்பத் தமிழே – அதன்        

அரிய நூல்களெங்கள் செல்வம்

தொன்மை மொழியுந்தமிழ் அன்றோ? – எங்கும்

துணிவுடன் பேசிமகிழ் பாப்பா!       4)

 

இனிமை மொழியெங்கள் தமிழே  - அதை

என்றும் மறத்தல் கூடாது

கனிமை மொழியுந் தமிழ்அன்றோ? - அதைக்

கற்பதுன் கடமையே பாப்பா!          5)     

 

தூய்மை யானதமிழ் கற்பாய் - வம்சம்        

தொடரத் தமிழ்தொடர வைப்பாய்        

வாய்மை அன்புமன உறுதி - இவை        

வாழ்க்கைக் குகந்ததடி பாப்பா!.         6)

 

எண்ணெழுத் திகழ்தல் கூடாது - மற்றும்

ஈவதை மறத்தல் ஆகாது

கண்ணென உண்மையைப் போற்று - என்றும்

கடமை தவறாதே பாப்பா!     

                                        7)      

பெற்றவர் கண்கண்ட தெய்வம் - நீ

பெரியரைக் கனம்பண்ணு பாப்பா!

கற்றது கைமண்ணின் அளவு – என்றும்

கடுஞ்சினம் ஆகாதே பாப்பா!             8)

 

ஏழைக் கிரங்கிடுதல் வேண்டும் - நாளும்

எளிமை தனைவிரும்ப வேண்டும்

கோழைத் தனமென்றும் வேண்டாம் - கோபம்

குடியைக் கெடுத்திடுமே பாப்பா!          9)   

 

துயரினாற் சோர்வடை யாதே – என்றும்

சோம்பலுக் கிடங்கொடுக் காதே

அயரா முயற்சிதான் உன்னை – வெற்றி

அடைந்திட வைத்திடும் பாப்பா!           10)

 

சாதிகள் இரண்டுண்டு பாப்பா!– ஒளவை

சாற்றிய கூற்றுத்தான் உண்மை

ஞாதியர் தோற்றிட்ட பிரிவால் – துன்பம்

நாளும் பெருகுதடீ  பாப்பா!                11)

 

இன்னா செய்வோர்கள் எதிர்த்தால் - நீ

எதற்கும் அஞ்சாதிரு பாப்பா!

வன்சொல் கொண்டுன்னை வைதால் - இனிய

வார்த்தையால் நாணச்செய் பாப்பா!        12)

 

உணவினைக் கண்டவுடன் காகம் - தன்

உற்றாரை அழைத்திடக் கரையும்

குணமதில் விருந்தினை ஓம்பும் - பண்புன்

குலத்திலே தொடரட்டும் பாப்பா!            13)

 

தேன்சேர்க்கும் சிட்டுகள் போலே – அறிவைத்

தினந்தேடிச் சேமிப்பாய் பாப்பா!

வான்நோக்கிப் பறந்திடும் பருந்தாய் - வாழ்வில்

வளஞ்சேர்த்து உயர்ந்திடு பாப்;பா!            14)

 

செய்ந்நன்றி மறந்திடாப் பண்பை – நீயும்

செய்கையில் தினமோம்பு பாப்பா!

பொய்பேசல் மிகப்பெரும் பாவம் - இதைப்

புரிந்து நடந்திடடி பாப்பா!                     15)   

 

செய்வன திருந்தச்செய் பாப்பா! - இதைத்

தினமும்  நீகடைப்பிடி பாப்பா!

மெய்யெனத் தெய்வத்தை நம்பு - இவை

மேலோர் வார்த்யைடி பாப்பா!

                                               16)     

பலஇன மக்கள் யாவரையும் - கூடிப்

பழகியே அன்புடன் மதிப்பாய்

உலகினி லுயர்வுதமிழப் பண்பே – அதை

ஓம்பி வளர்த்திடடி பாப்பா!

                                               17)

பரம்பொருள் ஒன்றேதான் பாப்பா! – அதைப்

பக்தியால் உன்னுள்ளே காண்பாய்

அரியவிப் பண்பினை வளர்த்தால் - உயிர்

அத்தனை யிலுந்தெய்வம் காண்பாய்!.            18)         

மாகாகவி சுப்ரமணியபாரதியார்  இன்று இருந்திருந்தால் கடுமையாகக் கண்டித்திருப்பார்.

ஆங்கிலம் கலந்து எழுதிச் செந்தமிழை மாசு படுத்தும் செயலைக் கண்டித்துச் சிறுவர்களுக்கு எனது அறிவுரை!

 

சாதனை என்றோ  தமிழொடு ஆங்கிலம்

சரியெனக் கலந்தே எழுதுகின்றார்?

வேதனை தருஞ்செயல் இதுவன்றோ? – இதை

வேரொடு களைந்திடல் வேண்டுமடீ!

                                                19)                      

புலம்பெயர் நாட்டிலே புதிதாய் - இன்று

பொன்மொழித் தமிழொடு ஆங்கிலத்தைக்

கலந்திடுஞ் செயல்தனைச் சாடுபாப்பா! - தூய

கன்னித் தமிழ்தனைப் பாடுபாப்பா!

                                                20)

தமிழொடு ஆங்கிலம் கலந்தெழுதல் - பெரும்

தவறென்றே நீயும் உணர்ந்திடுவாய்

அமிழ்தம் போன்றதன் தூய்மைதனைச் – சிலர்

அழிப்பதைத் தடுத்திட வேண்டுமடீ!

                                                21)        

செந்தமிழ் சிதைப்பேரின்; ஆக்கமெல்லாம்

'சீச்சீ'! அருவருப் பானதடீ!

பைந்தமிழ் படித்திட நல்லநூல்கள்

பாரிலே பலவுண்டு படித்திடடீ!                 22) =============================