மகாதேவ ஐயர் ஜெயராமசர்மா ...மெல்பேண் .... அவுஸ்திரேலியா
பட்டாசு சத்தமும் பளிச்சிடும் மத்தாப்பும்
புத்தரிசி புதுப்பானை பொங்கிவரும் வெண்பாலும்
புத்துணர்வு சுமந்துவர பூரிப்பாய் பொங்கல்வர
அத்தனைபேர் அகங்களுமே ஆனந்தம் பெருகிடுமே !
பட்டதுன்பம் அத்தனையும் பஞ்சாகப் பறந்துவிட
பார்பிடித்த பெருநோயும் படுகுழியில் வீழ்ந்துவிட
மட்டற்ற மகிழ்சியது மனமெல்லாம் நிறைந்துவிட
மங்கலமாய் பொங்கலது வந்துமே அமையட்டும் !
வீண்வாதம் விலகட்டும் வெறுப்புமே மடியட்டும்
மாண்பற்ற செயலெல்லாம் மங்கியே மழுங்கட்டும்
காண்கின்ற அத்தனையும் கண்ணியமாய் ஆகட்டும்
கனிவுதனை பொங்கலது காட்டிடவே வந்திடட்டும் !
வறுமையெனும் வாசகமே வெறுமையாய் ஆகட்டும்
வள்ளலெனும் நல்லார்கள் வளமுடனே வாழட்டும்
தருமமெனும் நல்வார்த்தை தரணியெங்கும் பரவட்டும்
தலைநிமிரப் பொங்கலது தான்வழியைக் காட்டட்டும் !
வயலுழுவார் வாழ்வில் மாற்றங்கள் நிறையட்டும்
வயோதிபர்கள் இல்லம் வழக்கின்றிப் போகட்டும்
மங்கலமாம் வெளிச்சம் மனையெங்கும் பரவட்டும்
பொங்கலது வாழ்வில் புதுப்பாதை காட்டிடட்டும் !
மதுவென்னும் நினைப்பு மனம்விட்டு அகலட்டும்
மங்கையரின் நினைப்பு மாண்நிறை ஆகட்டும்
வாலறிவன் நினைப்பு மனம்முழுக்க நிறையட்டும்
வரும்பொங்கல் நல்ல வரமெனவே அமையட்டும்
No comments:
Post a Comment