பேசுகின்ற வரம் மெமக்கு
பெருவர மாய் அமைந்திருக்கு
கூசு கின்ற வார்த்தைகளை
மாசெனவே ஒதுக்கி டுவோம்
ஆசை கொள்ளும் பாங்கினிலே
அழகு தமிழ் வார்த்தைகளை
பேசி நிற்போம் வாருங்கள்
காசினியே சுவை பயக்கும் !
சொல்லு கின்ற சொல்லெல்லாம்
சுவையாக இருக்க வேண்டும்
முள்ளாக வந்து நின்றால்
முழு மகிழ்வும் மறைந்துவிடும்
கள்ள முடன் மனமிருந்தால்
நல்ல சொற்கள் குறைந்துவிடும்
வெள்ளை மனம் உள்ளார்க்கு
நல்ல சொற்கள் நிறைந்துவிடும் !
கற்கின்ற நூல் எமக்கு
காட்டித் தரும் நல்வார்த்தை
கசடு அறக் கற்றிட்டால்
கண்டிடலாம் நல் வார்த்தை
வல் எழுத்து வார்த்தைகளை
வகை பிரித்து வைத்திட்டு
மெல் எழுத்தை தேர்ந்தெடுத்து
சொல்லி நிற்போம் சுவையாக !
No comments:
Post a Comment