நல்ல நாடு நாமிருந்தும்
உள்ள தெல்லாம் இங்கிருந்தும்
எண்ண மெலாம் பிறந்தநிலம்
எழுந் தெழுந்து வருகிறதே
துள்ளி யோடி விளையாடி
துணிவுடனே ஊரைச் சுற்றி
நண்ப ரெலாம் சூழ்ந்திடவே
நாமங்கு மகிழ்ந் திருந்தோம் !
கார் எமக்கு இருக்கவில்லை
கையில் போன் இருக்கவில்லை
விதம் விதமாய் கணனியையும்
வீட்டில் நாம் காணவில்லை
சண்டை பல இருந்தாலும்
உறவு அங்கு உதவியதே
வீடெல்லாம் கல கலப்பு
மன நிறைவைத் தந்ததுவே !
மாடி மனை ஏதுமில்லை
வசதியுடன் வீடும் இல்லை
சோறு கறி பஞ்சமில்லை
சொகுசான வாழ்வும் இல்லை
ஊர் முழுக்கக் கோயிலுண்டு
உவப்பான விழாவு முண்டு
தேரோட்டம் என்று விட்டால்
ஊர்முழுக்க நிற்கு மங்கே !
தோட்டத்து காய் கறிகள்
சுவை மிகுந்த கனிவகைகள்
நாட்டமுடன் உலாப் போக
நல்ல பல கடற்கரைகள்
அம்மாவின் கைச் சமையல்
அசுத்த மிலா நற்காற்று
எண்ணி யெண்ணி பார்த்திடவே
இன்பம் ஊறி வருகிறதே !
வாழ்கின்ற ஊர் எமக்கு
வசந்தங் காட்டி நிற்கிறது
வசதிநிறை பல விங்கே
வா வென்றே அழைக்கிறது
போர் ஒன்று வந்ததனால்
ஊர் துறந்து வந்துவிட்டோம்
வேர் விட்ட இடநினைவு
விலத்தி யெங்கும் போகவில்லை !
No comments:
Post a Comment