வாழ்த்தியே நிற்பதுதான் மாண்புடைய வாழ்வாகும் !

மகாதேவ ஐயர் ஜெயராமசர்மா 

மேனாள் தமிழ்மொழிக் கல்வி இயக்குநர்

மெல்பேண் .... அவுஸ்திரேலியா 

வாழுகின்ற காலமோ யாருக்கும் தெரியாது

வீழுகின்ற காலமோ யாருக்கும் தெரியாது

வாழுகின்ற காலமதை வரமாக மனமெண்ணி

வாழ்த்தியே நிற்பதுதான் மாண்புடைய வாழ்வாகும் !

மனமுடைய வைப்பதற்கு வாழ்வெமக்கு வரவில்லை

மற்றவரைக் குழப்பதற்கும் வாழ்வெமக்குச் சொல்லவில்லை

குறைபார்த்து குழப்புதற்கும் வாழ்வெமக்கு புகட்டவில்லை

குறைகாணா நிறைகாண வாழ்வெமக்கு வாய்த்துளது  !

மற்றவரின் கண்ணீரால் வாழ்வெமக்கு வாய்க்காது

வம்புதும்பு பெருகிவிடும் வாழ்வெமக்குச் சுவைக்காது

உற்றநட்பை உருக்குலைக்க வாழ்வெமக்குச் சொன்னதில்லை

உண்மையுடன் வாழ்வென்று உணர்த்துவதே வாழ்வாகும் !

ஆசானை அவமதிக்க வாழ்வெமக்கு சொல்லவில்லை

அறமிழந்து அவதிப்பட வாழ்வெமக்கு வாய்க்கவில்லை

பேசாத மொழிபேசி பெருங்கலக்கம் உருவாக்க 

வாழ்வெமக்குச் சொல்லவில்லை மனமிருத்தல் அவசியமே ! 

கற்றலினைப் பெரிதென்று வாழ்வெமக்குச் சொல்கிறது

கற்றபடி நிற்பதுதான் கண்ணியமே என்கிறது 

கற்பவற்றைக் கசடறவே கற்கும்படி சொல்கிறது

கற்றவரைக் காலமெலாம் கரம்பிடிக்க நினைக்கிறது ! 

பெற்றவரைக் காலமெலாம் பேணும்படி சொல்கிறது

பெரியவரை நோகாது காக்கும்படி சொல்கிறது

வறியவரின் பசிபோக்க மனமெண்ணி இருப்பதுவே

வாழ்வினுக்கு பெருமையென வாழ்வெமக்குப் புகல்கிறது ! 

ஆணவத்தில் ஏறிவிட்டால் அழிவரும் என்கிறது

ஆசையுடன் ஒட்டிவிட்டால் அனைத்தும் போமென்கிறது 

அடக்கமுடன் இருந்திட்டால் அனைத்தும் வருமென்கிறது

அழகான வாழ்வதனை அகமெண்ணி வாழ்ந்திடுவோம்  !