வீட்டைவிட்டு வெளியில் போகவிருப்பம் வருகுது
ஆனால் வீட்டைவிட்டு வெளியில் போனால்
வில்லங்கம் வருகுது வீட்டுக்குள்ளே இருக்கவிருக்க
வெறுப்பாய் இருக்குது வில்லன் கொரனோ
செய்த சதியால் வெந்து நிற்கிறோம் !
ஓடித்திரிந்த கால்களெல்லாம் ஓய்வாய் கிடக்குது
ஆடித்திருந்த நிலைகளிப்போ அடங்கிக் கிடக்குது
தேடியலைந்து பொருளைவாங்கும் நிலைக்குள் தள்ளியே
ஆடியெங்கும் ஆட்டம்போட்டு கொரனோ திரியுது !
உண்டுகளித்த விடுதியெல்லாம் உறங்கிக் கிடக்குது
ஊரைக்கூட்டும் சினிமாவரங்கு ஓய்ந்து படுக்குது
மண்டைகலக்கும் மதுக்கடைகள் முறைத்துப் பார்க்குது
மனிதவுயிரை காவுகொள்ள கொரனோ துடிக்குது !
பரப்பரப்பாம் விமானநிலையம் படுத்துக் கிடக்குது
பாயும்புலியாய் செல்லும்கார்கள் பதுங்கிச் செல்லுது
நிறைந்திருக்கும் வீதியெல்லாம் நித்திரை கொள்ளுது
நிமிர்ந்தபடி கொரனோமட்டும் தாவிக் குதிக்குது !
பார்த்திருந்த அரசுவெல்லாம் பதறித் துடித்துமே
பறந்துசெல்ல விமானப்பாதை திறக்க நினைக்குது
காத்திருந்த மக்களெல்லாம் கவனம் இன்றியே
கடைக்குள் சென்று பொருளைவாங்க நெருக்கியடிக்கிறார் !
கொரனோ ஒழிந்துவிட்டாதாக மனதில் நினைக்கிறார்
கோரமகன்று விட்டதாக எண்ணி மகிழுகிறார்
கையுறைகள் முகக்கவசம் எதற்கு என்கின்றார்
கட்டளைகள் எல்லாமே காற்றில் பறக்குதே !
வீட்டிலிருந்த கார்களெல்லாம் விரைவாய் பறக்குது
விருந்துகொடுக்க மக்களெல்லாம் விரும்பி நிற்கிறார்
வேதனைகள் சோதனைகள் எண்ண மறுக்கிறார்
விரைவாய் எம்மைப் பற்றிவிட கொரனோதுடிக்குது !
மரக்கறிகள் பழங்கள்வாங்க மக்கள் போகிறார்
முகக்கவசம் கையுறைகள் முடங்கிக் கிடக்குது
பொருளைவிற்கும் அவர்களெல்லாம் பணத்தை விரும்புறார்
கொரனோ மட்டும் சிரித்தபடி கொல்லநினைக்குது !
செல்லுவென அரசாங்கம் சொல்லி விட்டதால்
அல்லல்தனை யெண்ணாமல் அலைந்து திரிவதா
கொல்லும் கொரனோ இன்னுமகன்று செல்லவில்லையே
நல்லபடி சிந்தித்து நடக்க எண்ணுவோம் !
கட்டுப்பாடு தளர்ந்தாலே களிப்பைக் கண்டுமே
திட்டமின்றி குதித்துநின்றால் தீமை வந்திடும்
கொட்டமிட்டுக் கொரனோ நாட்டில் துள்ளிக்குதிக்குது
கொஞ்சம் பொறுமை எங்களுக்கு மிகவும்முக்கியம் !
No comments:
Post a Comment