சத்தித் தாயே வருவாய்! (அறுசீர் கழி நெடிலடி விருத்தம்)

  த. நந்திவர்மன்

திட்டந் தீட்டித் தீமை                    செய்வோர் கூடிப் போனார்           பட்டோந் துன்பம் அதனால்                    பார்த்துக் கொண்டோ இருப்பாய்?           இட்ட மான அன்பர்                    இன்னல் தீர்க்க இரந்தோம்           கொட்டம் அடக்கி ஆளக்                    கோமே தகமே வருவாய்!                 1             ஞால மீதில் தீயோர்                    நடத்தும் ஆட்சி கண்டுஞ்           சீலம் பலவுஞ் சிதைத்துச்                    சிறுமை பெருக்கக் கண்டும்           ஓலம் இட்டு அழுதோம்                    ஓயா துன்னைத் தொழுதோம்           நீல மயிலே வருவாய்                    நினைவில் அமைதி தருவாய்!                   2             கவளச் சோற்றுக் காகக்                    கண்ணீர் சிந்தி உழைப்பார்           அவலங் கண்டும் அதனை                    அழிக்கா திருத்தல் அழகோ?           கவலை தீர்க்க வேண்டும்                    கரங்கள் தொழுவோம் யாண்டும்           பவளக் கொடியே வருவாய்                    பாரில் அமைதி தருவாய்!                 3             திட்பங் கொண்ட தீயோர்,                    திருடர் கூடிப் போனார்           நட்புக் கொண்டோர் போலே                    நடித்து நம்மைக் கெடுப்பார்           நுட்பம் அறிந்து கொள்வாய்                    நொடியில் அழித்துக் கொல்வாய்           புட்ப ராக மணியே                    புவியில் அமைதி தருவாய்!              4             கோயில் சொத்தைக் கூடக்                    கொள்ளை அடித்துக் கொள்வார்           வாயில் வந்த வகையில்                    வசைகள் பாடி வாழ்வார்           தாயே இவரை அழிக்குந்                    தருணம் இதுவே அன்றோ?           மாயை தீர்த்து அருள்வாய்                    மரக தமேநீ வருவாய்!                      5             நாணிக் கொள்ள மாட்டார்                    நாளுங் கொடுமை செய்வார்           பேணிக் காப்பாய் எம்மைப்                    பிழைக்கச் செய்வாய் தாயே           காணிக் கையாய் தந்துன்                    கழலே பணிந்தோம் நாளும்           மாணிக் கமேநீ வருவாய்                    மனதில் அமைதி தருவாய்!               6                 பதர்கள் போலே ஏய்ப்பார்                    பரிவே இன்றிச் சாய்ப்பார்           விதமாய்த் தீமை செய்வார்                    விட்டே வைத்தல் அழகோ?           பதறித் தொழுதோம் உன்னைப்                    பாரில் நன்மை தருவாய்           முதலும் முடிவும் ஆனாய்                    முத்தே மணியே வருவாய்!               7             சூதும் வாதுஞ் செய்வார்                    சுற்றம் என்றும் பாரார்           பேதம் பேசி வெறுப்பைப்                    பேணிப் பேணி வளர்ப்பார்           நீதர் நிலைத்து நிற்க                    நீக்கா திருத்தல் அழகோ           மாதே இருளைக் களைவாய்                    வைர ஒளியே வருவாய்!                  8             சண்டை போடுஞ் சழக்கர்                    தரணி யெங்குந் தழைத்தார்           தொண்டர் பட்டார் துயரந்                    துடைக்கா திருத்தல் அழகோ?           பண்டை நாளில் அசுரர்                    பலத்தை அழித்தாய் அன்றோ?           வண்டார் குழலித் தாயே                    வைடூ ரியமே வருவாய்!                            9   கவிஞர் த. நந்திவர்மன் சிட்னி நவராத்திரி 2021