திருந்திட நினைப்போம் செகமுமே மகிழும் !

மகாதேவ ஐயர் ஜெயராமசர்மா மேனாள் தமிழ்மொழிக் கல்வி இயக்குநர் மெல்பேண் ... அவுஸ்திரேலியா 

தவறுகள் செய்வது மனிதனிதன் இயல்பு

திருந்திட முயன்றால் செறிந்திடும் வாழ்வு

அறிந்துமே செய்தால் அகன்றிடும் அனைத்தும்

திருந்திட நினைத்தல் சிறப்புடை செயலே   ! 

மற்றவர் அழுகை மகிழ்ச்சியைத் தருமா

மற்றவர் விழுகை எழுச்சியைத் தருமா

செத்திடும் வரையில் செய்திடும் அனைத்தும்

சொத்தெனக் குவியும் சுகமெலாம் அழிக்கும்  ! 

நலிந்தவர் மெலிந்தவர் நசுக்கிடல் கொடுமை

நாளுமே அரக்கராய் மாறிடல் கொடுமை 

அழிப்பதை நினைப்பினில் அமர்த்திடல் கொடுமை

ஆணவம் அகந்தையை அணைத்திடல் கொடுமை  !

ஏழையின் உழைப்பை பிடுக்குதல் கொடுமை

இயலாமை நிலையில் எடுப்பதும் கொடுமை

வாழ்வினை ஒழித்திடும் போதையும் கொடுமை

வன்முறை வழியை எடுப்பதும் கொடுமை  !

முதியவர் தம்மை இகழ்வதும் கொடுமை

மூத்தவர் அழுவதைப் பார்ப்பதும் கொடுமை

பழியினை செய்து பதுங்குதல் கொடுமை

பாரினில் தலையால் நடப்பதும் கொடும ! 

தாயினைத் தந்தையைத் தாழ்த்துதல் கொடுமை

தலைநிகர் குருவினை ஒதுக்கிடல் கொடுமை

வாய்மையை நேர்மையை மழித்திடல் கொடுமை

வார்த்தையில் விஷத்தை சேர்த்திடல் கொடுமை !

திருந்திட நினைத்தால் திசையது தெரியும்

திருந்திட நினைத்தால் தினமுமே வெளிக்கும்

திருந்திட நினைத்தால் சிறப்பெலாம் பெருகும்

திருந்திட நினைப்போம் செகமுமே மகிழும்  !