எல்லாப்புகழும் இறைவனுக்கே ! - ( எம். ஜெயராமசர்மா .... மெல்பேண் .... அவுஸ்திரேலியா )

           எல்லாப் புகழும் இறைவனுக்கே 

             இயன்றவரை உதவிடுவோம் யாவர்க்குமே 

          நல்லவற்றை நினைத்திடுவோம் நாளெல்லாம்

               அல்லவற்றை அகற்றிடுவோம் அனைவருமே 

          சொல்லுவதை சுவையாகச் சொல்லிடுவோம்

                சோர்வின்றி நாளெல்லாம் உழைத்திடுவோம்

          கொல்லுகின்ற கொலைவெறியை மறந்திடுவோம்

                 குணமதனைச் சொத்தாக்கி உயர்ந்திடுவோம் ! 

         எல்லையில்லா ஆனந்தம் ஈந்தளிக்கும் 

             எல்லையில்லா இறையினைநாம் ஏற்றுநிற்போம் 

        வல்லமையின் வடிவான இறையினைநாம்

               வணங்காமல் இருந்துவிடல் முறையேயன்று 

        சொல்லளித்துச் சுவையளிக்கும் தூயசக்தி 

                துதிப்பார்க்கு காட்சிதரும் பெரியசக்தி 

         எல்லையில்லா உலகினையே படைத்தசக்தி

              இறையொன்றே என்றுநாம் நினைப்போமென்றும் ! 

         நினைப்பார்க்கு இறையாகக் காட்சிதந்து

             வெறுப்பார்க்கு நம்பிக்கை ஊட்டிநின்று 

        பொறுப்புடனே வாழ்வதற்கு வழியாய்நிற்கும் 

              போற்றுகின்ற பொருளே இறைவடிவமாகும் 

        கருத்துடனே நினைவார்க்கு கருணையாகி

               கவலையுடன் இருப்பார்க்கு கையுமாகி 

         இருக்கின்ற சக்திதான் இறையென்றெண்ணி

                இருக்கின்றார் இவ்வுலகில் பலருமின்று ! 

        இறைபற்றிக் கருத்துப்பல இருந்திட்டாலும்

             எல்லோரும் இறைபற்றி எண்ணுகின்றார் 

       எதிர்வாதம் இவ்வுலகில் எழுந்திட்டாலும்

              இறைபக்தி அற்றநிலை எங்குமில்லை 

        இறையிருக்கு இறையிருக்கு எனும்நினைப்பை

               எவர்வந்து தடுத்தாலும் பலனேயில்லை

          இறையிருந்து நல்லவழி காட்டிநிற்பார் 

                 இறைதொழுது எல்லோரும் இருப்போம்நாளும் !