இம்மாதம் 17 ஆம் திகதி தனது பிறந்த தினத்தை கொண்டாடும் எழுத்தாளர், சீர்மியத் தொண்டர், திருமதி கோகிலா மகேந்திரன் அவர்களை நான் முதல் முதலில் சந்தித்த ஆண்டு 1984.
அவரது எழுத்துக்களை ஊடகங்களில்
படித்திருந்தாலும் நேருக்கு நேர் சந்திப்பதற்கான சந்தர்ப்பம் அதற்கு முன்னர் கிட்டவில்லை.
கோகிலாவின் இரண்டாவது கதைத்
தொகுதி முரண்பாடுகளின் அறுவடை நூலுக்கு முகப்பு ஓவியம் வரைந்தவரான பொன்னரி
( இயற்பெயர் கனகசிங்கம் ) வீரகேசரியில் எனது சமகால ஊழியர்.
அந்த நூலுக்கு தெல்லிப்பழை
மகாஜனா கல்லூரியில் அதன் அதிபர் எழுத்தாளர் த. சண்முகசுந்தரம் ( தசம் ) அவர்களின் தலைமையில்
வெளியீட்டு அரங்கினை ஒழுங்குசெய்துவிட்டு,
என்னை உரையாற்ற வருமாறு கோகிலா கடிதம் எழுதி
அழைத்திருந்தார்.
அக்காலப்பகுதியில் வீரகேசரி
வாரவெளியீட்டில் ரஸஞானி என்ற புனைபெயரில் வாரந்தோறும் இலக்கியப்பலகணி எனும் பத்தி எழுத்தை எழுதிவந்தேன்.
அக்காலப்பகுதியில் கொழும்பில்
பணியாற்றிக்கொண்டிருந்த எழுத்தாளர் புலோலியூர் இரத்தினவேலோன் ஊடாக நான்தான் அந்த ரஸஞானி என அறிந்துகொண்டு, என்னை உரையாற்ற வருமாறு அழைத்ததுடன், எனது பொருளாதார நிலையறிந்தோ
என்னவோ, எனது பயணப்போக்குவரத்துச்செலவுக்கும் பணம் அனுப்பியிருந்தார்.
அத்தகைய விந்தையான ஆளுமை
கோகிலா மகேந்திரனுக்கு பிறந்த தின வாழ்த்துக்கூறியவறே இந்தப்பத்தியை எழுதுகின்றேன்.
குறிப்பிட்ட நூல் வெளியீட்டு
விழாவுக்கு மல்லிகை ஜீவா, பேராசிரியர்கள் மெளனகுரு, சித்திரலேகா தம்பதியர் எழுத்தாளர்கள்
புலோலியூர் இரத்தினவேலோன், வேல் அமுதன், மற்றும்
தமிழ்நாட்டிலிருந்து வருகை தந்திருந்த கவிஞர் மேத்தா தாசன் ஆகியோருட்பட பல கலை, இலக்கியவாதிகளும்,
ஆசிரியர்களும் மாணவர்களும் வருகை தந்திருந்தனர்.
மகாஜனா கல்லூரியின் துரையப்பாபிள்ளை
அரங்கம் நிறைந்திருந்தது. அன்றுதான் அந்தக்கல்லூரியின் வாயிலில் முதல் முதலாக நான் காலடி எடுத்து வைக்கின்றேன்.
அந்த வாயிலில் மலர்ந்த முகத்துடன் என்னை கைகூப்பி வணங்கி அழைத்துச்சென்றவர்தான் கடந்த
அரைநூற்றாண்டு காலமாக சகோதர வாஞ்சையுடன் எமது இலக்கிய குடும்பத்தில் உறவாடும் மனிதநேயப்பண்புகள் நிறைந்த கோகிலா மகேந்திரன்.
சிறுகதை, நாவல், கட்டுரை, விமர்சனம், விஞ்ஞானம், நாடகம்,
கலைஞர் வரலாறு, சீர்மிய பதிவுகள் முதலான துறைகளில் தொடர்ந்தும் எழுதிவரும் கோகிலா,
சிறந்த பேச்சாளருமாவார்.
சீர்மியம்சார்ந்து இயங்கி, சமூகத்தில் பாதிக்கப்பட்டவர்கள் பலரை, குறிப்பாக பெண்களை ஆற்றுப்படுத்தியிருக்கிறார்.
மருத்துவக்கல்லூரிக்கு தெரிவானவர். அங்கு உயிரினங்களை வெட்டிச்சோதித்து படிக்கவேண்டியிருந்தமையால்,அந்தத்துறையிலிருந்து நழுவிச்சென்று, வேறு துறைகளில் பிரகாசித்தவர்களைப்பற்றி அறிந்திருப்பீர்கள்.
கோகிலாவும் அவ்வாறே மருத்துவக்கல்விக்கு விடைகொடுத்தவர்தான்.
அதனால் விஞ்ஞான பாட நெறி ஆசிரியரானார்.
உயிரினங்களை இறந்த கோலத்தில் தரிசிக்க மனவலிமையற்றிருந்த கோகிலா, பின்னாளில் மனோதத்துவ நிபுணராகி, உளவளச்சிகிச்சை செய்யும் சீரிமியத்தொண்டரானார்.
“ சர்வதேச
நிறுவனமொன்றின் ஆய்வில் மனச் சோர்வு, பதகளிப்பு போன்ற உளப்பிரச்சினைகள் பரந்தளவில்
காணப்படும் நாடுகளில் இந்தியா முதலிடத்தில் உள்ளது. அதில் இலங்கை தொடர்பான தகவல்கள்
இல்லை. சில வேளைகளில் இலங்கை தொடர்பில் சரியான தகவல்கள் வழங்கப்படாமல் இருக்கலாம்.
ஆனால், அதிகம் தற்கொலை செய்வோர் பட்டியலை வைத்து நோக்கினால், இந்த விடயத்திலும் இந்தியாவை
விட நாங்கள் முன்னுக்கு இருக்கலாம் என்பதனை ஊகித்துக் கொள்ளலாம். போதைவஸ்து பாவனை,
வீதி விபத்துக்கள், 
வாள்வெட்டுக்களால் ஏற்படுகின்ற சமூகப் பிரச்சினைகளை நாங்கள் நித்தமும்
அனுபவித்துக் கொண்டிருக்கிறோம்.
சமூக சேவை செய்வது என்பது ஒருவகையில் நியூட்டனின் மூன்றாவது
விதி போன்றது. நாங்கள் என்ன செய்கிறோமோ அது எங்களுக்கு திரும்பி வரும். நியூட்டன் சடப்
பொருள்களுக்கு கூறியிருந்தாலும், மனிதனுக்கும் மிகச் சரியாகவே அது பொருந்துகிறது.
No comments:
Post a Comment